Read საპატრიარქო იგავნი სოლომონისა 30 Bible Online

იგავნი სოლომონისა 30 - საპატრიარქო bible

იგავნი სოლომონისა 30

¹სიტყვები აგურ იაკეს ძისა, მასაელისა. ამ კაცის ნათქვამი იეთიელის, იეთიელისა და უქალის მიმართ:

²კაცთაგან ყველაზე უმეცარი ვარ და ადამიანური გონება არ გამაჩნია.

³ვერ ვისწავლე სიბრძნე და ღვთიურისა არაფერი გამეგება.

⁴ვინ ავიდა ზეცად და ვინ ჩამოვიდა? ქარი ვინ შეკრიბა თავისი პეშვით? სამოსელში ვინ გამოხვია წყალი? ვინ დაადგინა ქვეყნის ყველა საზღვარი? რა არის მისი სახელი? მის ძეს რა ჰქვია? იცი ეს?

⁵უფლის ყოველი სიტყვა სარწმუნოა; იგი ფარია მის მოიმედეთათვის.

⁶ნურას მიუმატებ მის სიტყვებს, თორემ გამხილებს და მატყუარა გამოხვალ.

⁷ორ რამესა გთხოვ და უარს ნუ მეტყვი, სანამ მოვკვდებოდე:

⁸სიცრუე და ტყუილი მაშორე, ნურც სიღარიბეს მიმცემ და ნურც სიმდიდრეს, საარსებო პურით მასაზრდოვე,

⁹რომ გამაძღარმა არ უარგყო და არა ვთქვა, ვინ არის უფალიო? ხოლო გაღატაკებულმა არ ვიქურდო და ჩემი ღვთის სახელს არ შევცოდო.

¹⁰მონას ცილს ნუ დასწამებ თავისი ბატონის წინაშე, თორემ დაგწყევლის და დადანაშაულდები.

¹¹არის ხალხი, რომელიც წყევლის თავის მამას და საკუთარ დედას არ ლოცავს.

¹²არის ხალხი, რომელსაც თავი სუფთა ჰგონია, მაგრამ სიბინძურისგან არ განბანილა.

¹³არის ხალხი - და როგორი ამპარტავანი და ქედმაღლად მომზირალი!

¹⁴არის ხალხი, რომლის კბილები მახვილებია, რომლის ღოჯები დანებია, ქვეყნად ღვთისმოსავთა და კაცთა შორის ღარიბ-ღატაკთა შესაჭმელად.

¹⁵წურბელას ორი ასული ჰყავს: მომე, მომე! ეს სამნი გაუმაძღარნი არიან და ოთხნი არ იტყვიან: კმარა!

¹⁶შავეთი, უნაყოფო საშო, წყლით გაუმაძღარი მიწა და ცეცხლი არ იტყვიან: კმარა!

¹⁷მამის დამცინავ და დედის ურჩ თვალებს ხევის ყვავები ამოკორტნიან და არწივის მართვენი შეჭამენ.

¹⁸სამი რამ მაოცებს და ოთხი რამ არის, რომ ვერ გამიგია:

¹⁹ცაში არწივის კვალი, კლდეზე გველის კვალი, შუაგულ წყალში ხომალდის კვალი და ქალწულში კაცის კვალი.

²⁰ბოზი ქალის ზნე ასეთია: შეჭამს, პირს მოიწმენდს და იტყვის, ცუდი არაფერი ჩამიდენიაო.

²¹სამი რამე არყევს ქვეყანას, ოთხი რამე ვერ აუტანია:

²²გამეფებული მონა, პურით გამძღარი არამზადა,

²³საძულველი ქალი, როცა გათხოვდება, და მონაქალი, რომელიც თავისი ქალბატონის ადგილს იჭერს.

²⁴აჰა, ოთხნი მცირენი დედამიწის ზურგზე, მაგრამ ბრძენთა ბრძენნი:

²⁵ჭიანჭველები ძლიერნი არ არიან და თავიანთ საზრდოს ზაფხულობით აგროვებენ;

²⁶კურდღლები მაგრები არ არიან და თავიანთ სახლებს კლდეზე დგამენ;

²⁷კალიებს მეფე არა ჰყავთ და ყველანი მწყობრად გამოდიან.

²⁸ხვლიკი ხელით შეიპყრობა, მაგრამ მეფის სასახლეებშია.

²⁹ეს სამნი თამამად დააბიჯებენ, ეს ოთხნი თამამად დადიან:

³⁰ლომი - ცხოველთა მეუფე, გზაზე რომ არავის ჩამოეცლება;

³¹დარახტული ცხენი, ჯიხვი და მეფე თავისი ამალით.

³²თუ შენ შენი ამპარტავნობით სისულელე ჩაიდინე ან თუ ავი განიზრახე, პირზე მიიფარე ხელი.

³³რძის ჯანჯღარით კარაქი გამოდის, ცხვირში ჯანჯღარით სისხლი გამოდის, ბრაზის ჯანჯღარით ჩხუბი გამოდის.