Read საპატრიარქო იგავნი სოლომონისა 31 Bible Online

იგავნი სოლომონისა 31 - საპატრიარქო bible

იგავნი სოლომონისა 31

¹ლემუილის, მასას მეფის სიტყვვბი,რომლითაც დედამისი შეაგონებდა.

²რაო, შვილო? რაო, ჩემი მუცლის ნაშიერო? რაო, ჩემი აღთქმების ნაშიერო?

³ქალებს ნუ შეალევ შენს ძალას და მეფეთა დამღუპველ დიაცებს - შენს გზებს.

⁴არა ხამს მეფეთათვის, ლემუილ, არა ხამს მეფეთათვის ღვინის სმა და არც მთავართათვის თაფლუჭის სმა.

⁵თორემ დალევენ და დაივიწყებენ კანონს და ყველა დაჩაგრულის სამართალს შეცვლიან.

⁶მიეცი ლუდი გაუბედურებულს და ღვინო - სულგამწარებულს;

⁷შესვას და დაივიწყოს თავისი სიღარიბე და თავისი სატანჯველი აღარ გაიხსენოს.

⁸გახსენი პირი დამუნჯებულისთვის ყველა ობლისთვის სამართლის გასაჩენად.

⁹გახსენი პირი სიმართლით განსასჯელად და ღარიბ-ღატაკთათვის სამართლის გასაჩენად.

¹⁰ვინ იპოვის გამრჯე დედაკაცს? მარგალიტზე ძვირია მისი ფასი.

¹¹მისი ქმრის გული მასზე იქნება დანდობილი და შემოსავალი არ მოაკლდება.

¹²მთელი სიცოცხლე სიკეთეს მიაგებს და არა ბოროტებას.

¹³ის ეძებს მატყლსა და სელს და ბეჯითად მუშაობს საკუთარი ხელებით;

¹⁴სავაჭრო ხომალდების მსგავსად შორიდან მოაქვს თავისი პური.

¹⁵ჯერ კიდევ ღამიანად დგება და სახლს საზრდოს აძლევს და მხევლებს - წესსა და რიგს.

¹⁶იგი ყანაზე ფიქრობს და ყიდულობს კიდეც; საკუთარი ხელების ნაყოფით ვენახსა ჰყრის:

¹⁷ძლიერებით ისარტყლავს წელს და მკლავს იმაგრებს.

¹⁸გრძნობს, რომ კარგია მისი შენაძენი, მისი ლამპარი ღამით არ ჩაქრება.

¹⁹ჯარაზე ხელს იწვდის და თითებით თითისტარი უჭირავს.

²⁰ღარიბისთვის ხელი გაშლილი აქვს და უპოვარს ხელს უწვდის.

²¹მის სახლს თოვლის არ ეშინია, რადგან მთელი მისი სახლი ორკეცად არის შემოსილი.

²²ფარდაგებს თავად იკეთებს და იგი სელითა და ძოწეულით იმოსება.

²³მისი ქმარი ცნობილია კარიბჭესთან, როცა ქვეყნის უხუცებს შორის ზის.

²⁴მოსასხამებს ამზადებს და ჰყიდის, სარტყლებს მოვაჭრეებს აძლევს.

²⁵ძალით და მშვენებით არის მოსილი და მომავალ დღეს გაღიმებით შესცქერის.

²⁶პირს სიბრძნითა ხსნის და ენაზე მადლიანი დარიგება აქვს.

²⁷თვალ-ყურს ადევნებს, რაც მის სახლში ხდება, და პურს მუქთად არა სჭამს.

²⁸დგებიან მისი ვაჟები და ლოცავენ მას, მისი ქმარი - და აქებს მას.

²⁹მრავალმა ასულმა გამოიჩინა მხნეობა, მაგრამ შენ გადაამეტე ყველას.

³⁰მაცთუნებელია სიკოხტავე და სილამაზე ამაოებაა უფლის მოშიში დედაკაცია საქებარი.

³¹მიაგეთ მას მისი შრომის საზღაური და მისმა საქმეებმა იგი კარიბჭეებთან განადიდონ.