Read საპატრიარქო იგავნი სოლომონისა 6 Bible Online

იგავნი სოლომონისა 6 - საპატრიარქო bible

იგავნი სოლომონისა 6

¹შვილო თუ თავდებად დაუდგები შენს ახლობელს, ხელი ხელს დაჰკრავ უცხოს გულისთვის,

²მახეში ხარ გაბმული შენი ბაგის ნათქვამით, დაჭერილი ხარ შენი ბაგის ნათქვამით.

³ამ დროს ასე მოიქეცი, შვილო, და იხსენი თავი, რადგან შენი ახლობელის ხელში ხარ ჩავარდნილი. მიდი, თავი შეაცოდე შენს ახლობელს და შეევედრე.

⁴თვალებს ძილს ნუ მისცემ და წამწამებს - თვლემას.

⁵იხსენი თავი, როგორც ქურციკმა მონადირის ხელიდან, როგორც ფრინველმა ფრინველმჭერის ხელიდან.

⁶მიდი ჭიანჭველასთან, მცონარავ, დააკვირდი მის ქცევას და ჭკუა ისწავლე.

⁷არა ჰყავს მას არც უფროსი, არც ზედამხედველი, არც ბატონი.

⁸ზაფხულობით იმარაგებს თავის პურს, აგროვებს თავის საზრდოს მოსავლის აღებისას.

⁹როდემდე უნდა გეძინოს, მცონარავ? როდის გაიღვიძებ ძილისგან?

¹⁰მცირე ხანს გასტანს შენი ძილი, მცირე ხანს გასტანს შენი თვლემა, მცირე ხანს გასტანს შენი ხელდაკრეფა დასაძინებლად.

¹¹ყარიბივით მოგადგება შენი სიღარიბე და იარაღასხმული კაცივით - შენი გაჭირვება.

¹²უგვანი ადამიანი, ბოროტი კაცი ცბიერი ბაგეებით დადის.

¹³თვალებს ჭუტავს, ფეხებით ლაპარაკობს, თითებით ასწავლის;

¹⁴ღალატია მის გულში, ავს ფიქრობს, სულმუდამ შუღლს თესავს.

¹⁵ამიტომაც ანაზდად ეწევა უბედურებას, ერთბაშად განადგურდება და არავინ იქნება მხსნელი.

¹⁶აჰა, ექვსი რამ უფლის საძულველი, და აჰა, შვიდი სიბილწე მის თვალში:

¹⁷ამპარტავანი თვალები, ცრუ ენა, უბრალო სისხლის მღვრელი ხელები,

¹⁸ავისმზრახველი გული, საბოროტოდ მარდი ფეხები,

¹⁹ტყუილების აღმომსუნთქველი, ცრუ მოწმე და ძმათა შორის შუღლის მთესველი.

²⁰დაიმარხე, შვილო, მამაშენის ანდერძი და დედაშენის რჯულს ნუ გადახვალ.

²¹სამუდამოდ გქონდეს გულზე მიბმული, ყელზე შემოხვეული,

²²მგზავრობისას წინამძღვრად გეყოლება, ძილში დაგიფარავს, გამოღვიძებისას მოსაუბრედ გეყოლება.

²³რადგან ლამპარია ანდერძი და სინათლეა რჯული, სიცოცხლის გზაა სამხილებელი შეგონება,

²⁴რომ გიფარავდეს ავი ქალისგან, უცხო ქალის ლაქარდიანი ენისგან.

²⁵გული ნუ მიგივა მის სილამაზეზე, არ გამოგიჭიროს თავისი წამწამებით.

²⁶რადგან მეძავი ქალის ფასი ერთი პურის ნაჭერია და გათხოვილი ქალი კი ძვირფასი სულის მომნადირებელი.

²⁷თუ ჩაიდებს კაცი ცეცხლს უბეში ტანისამოსზე წაუკიდებლად?

²⁸თუ გაივლის კაცი ნაკვერჩხლებზე ფეხების დაუწველად?

²⁹ასევე, არავინ დარჩება დაუსჯელი, ვინც კი მივა ახლობლის ცოლთან და მიეკარება მას.

³⁰არ კიცხავენ ქურდს, როცა ქურდობს ლუკმა-პურისთვის, როცა მშიერია;

³¹წაუსწრებენ და შვიდწილად ზღავს, სახლის მთელ ქონებას გადაიხდის.

³²ვინც ქალთან მრუშობს, უჭკუოა, თავისი სულის წარწყმედელად აქცევს მას.

³³ცემას და დამცირებას ჰპოვებს და მისი სირცხვილი არ წარიხოცება.

³⁴რადგან ეჭვიანობა ქმრის რისხვაა და არ შეიბრალებს შურისგების დღეს.

³⁵არ პატიობს, არ აიღებს არავითარ გამოსასყიდს, არ ინდომებს, კიდეც რომ შესთავაზო უზომო ქრთამი.