Read საპატრიარქო იგავნი სოლომონისა 7 Bible Online

იგავნი სოლომონისა 7 - საპატრიარქო bible

იგავნი სოლომონისა 7

¹შვილო, დაიმარხე ჩემი ნათქვამი და ჩემი ანდერძი დაიუნჯე.

²დაიმარხე ჩემი ანდერძი და იცოცხლებ, და ჩემი რჯული - თვალისჩინივით.

³მიიბი შენს თითებზე და გულის ფიცარზე დაიწერე.

⁴უთხარი სიბრძნეს: ჩემი და ხარ-თქო და ჭკუა-გონებას მეგობარი უწოდე.

⁵რომ თავი დაიფარო უცხო ქალისგან, სხვისი ცოლისგან, მისი ლაქარდიანი ენისგან.

⁶როცა სახლის სარკმლიდან, ცხაურს იქით გადავიხედე,

⁷დავინახე ბრიყვთა შორის, გავარჩიე ყმაწვილებს შორის ერთი ბიჭი, ჭკუათხელი.

⁸ქუჩაში მიდიოდა, იმის კუთხესთან, იმის სახლის გზით მიაბიჯებდა.

⁹მიმწუხრზე, დღის მიწურულზე, ღამის ბნელში და უკუნეთში.

¹⁰და აჰა, ქალი გამოდის მის შესახვედრად, მეძავის საბურველში, გულმზაკვარი.

¹¹ხმაურიანია და თავნება, შინ ფეხი არ უდგება;

¹²ხან ქუჩაშია, ხან მოედანზე - ყოველ კუთხეშია ჩასაფრებული;

¹³აჰა, ჩაიჭირა იგი, კოცნის და ურცხვად ეუბნება:

¹⁴სამადლობელი მსხვერპლი მქონდა შესაწირავი, დღეს გადვიხადეო საღმრთო.

¹⁵ამიტომაც გამოვედი შენს შესახვედრად, შენის სასის საძებრად და აჰა, გიპოვე კიდეც.

¹⁶ხალიჩები მაქვს დაფენილი ჩემს სარეცელზე, ეგვიპტური ჭრელი ნაქსოვი.

¹⁷დავაფრქვიე მური ჩემს საწოლზე.

¹⁸წამო, დილამდე დავთვრეთ სიყვარულით, ალერსით ვინეტაროთ.

¹⁹რადგან შინ არ არის ქმარი, შორ გზაზეა წასული;

²⁰ვერცხლის ქისა წაიღო თან, სრულმთვარობისას დაბრუნდებაო შინ.

²¹შეაცდინა თავისი ლაქლაქით, ლაქარდიანი ენით შეიტყუა.

²²იმწამსვე უკან გაჰყვა, როგორც დასაკლავი ხარი, როგორც შებორკილი გიჟი დასასჯელად.

²³ვიდრე ისარს არ გაუგლეჯია მისი ღვიძლი; როგორც ფრინველი, ხაფანგისკენ რომ ისწრაფვის და არ იცის, რომ სიცოცხლეს წააგებს.

²⁴ახლა მისმინეთ შვილებო, და ყური ათხოვეთ ჩემს ნათქვამს.

²⁵ნუ გაიმრუდებს თავის გზას თქვენი გული, ნუ აერევა თავისი ბილიკები.

²⁶რადგან ბევრი დაეცა მისგან სასიკვდილოდ, ბევრი ძლევამოსილია მისგან დახოცილი.

²⁷მისი სახლი შავეთის გზაა, სიკვდილის სამყოფელში ჩამავალი.