Read ქართული ბიბლია, სრული ვერსია 2 Samuel 2 Bible Online

2 Samuel 2 - ქართული ბიბლია, სრული ვერსია bible

2 Samuel 2

¹ამის შემდეგ დაეკითხა დავითი უფალს, და უთხრა: „შევიდე იუდას რომელიმე ქალაქში?“ და უთხრა უფალმა: „შედი.“ უთხრა დავითმა: „სად შევიდე?“ მან უთხრა: „ხებრონში.“

²და წავიდნენ იქ დავითი და მისი ორივე ცოლი: იზრეყელელი ახინოყამი და აბიგაილი, ნაბალის ქვრივი, ქარმელელი.

³და თავისთან მყოფი ხალხიც მოიყვანა დავითმა მათი სახლებიანად, და დასახლდნენ ხებრონის ქალაქებში.

⁴მოვიდნენ იუდაელნი და დავითი მეფედ სცხეს იუდას სახლზე. და შეატყობინეს დავითს, რომ გალაადის იაბეშელებმა უკვე დამარხესო საული.

⁵და გაგზავნა მოციქულები დავითმა გალაადის იაბეშელებთან და შეუთვალა: „კურთხეულნი ხართ უფლისგან, ეს წყალობა რომ მიაგეთ თქვენს ბატონს — საულს — და დამარხეთ.

⁶უფალმა მოგაგოთ წყალობა და მადლი, და მეც გადაგიხდით ამ კეთილი საქმისთვის, თქვენ რომ გააკეთეთ.

⁷ახლა მკლავნი გაიმაგრეთ და ვაჟკაცურად იყავით, რადგან მკვდარია თქვენი პატრონი, საული, და მე მცხო იუდას სახლმა თავის მეფედ.“

⁸ხოლო აბნერმა, ნერის ძემ, საულის მხედართმთავარმა, წაიყვანა იშ-ბოშეთი, საულის ძე, და გადაიყვანა მახანაიმში,

⁹და გაამეფა გალაადზე, და აშურელებზე, და იზრეყელზე, და ეფრემზე, და ბენიამინზე, და მთელს ისრაელზე.

¹⁰40 წლისა იყო იშ-ბოშეთი, საულის ძე, როცა გამეფდა ისრაელზე, და ორ წელიწადს იმეფა. მხოლოდ იუდას სახლი გაჰყვა დავითს.

¹¹და იყო დავითის მეფობის ხანი ხებრონში იუდას სახლზე შვიდი წელი და ექვსი თვე.

¹²და გამოვიდა აბნერი, ნერის ძე, იშ-ბოშეთის, საულის ძის მსახურებთან ერთად მახანაიმიდან გიბეონისაკენ.

¹³გამოვიდა იოაბ ცერუიას ძეც დავითის მსახურებთან ერთად, და შეეყარნენ ისინი ერთმანეთს გიბეონის ტბორთან, და გამაგრდნენ: ერთნი ტბორს იქითა ნაპირას, მეორენი — აქეთა ნაპირას.

¹⁴და უთხრა აბნერმა იოაბს: „გამოვიდნენ ჭაბუკები და იასპარეზონ ჩვენს წინაშე.“ მიუგო იოაბმა: „გამოვიდნენ!“

¹⁵და ადგა და გამოვიდა 12 ბენიამინელი იშ-ბოშეთის, საულის ძის მხრიდან და 12 დავითის მსახურთა მხრიდან.

¹⁶და ჩაავლეს ერთმანეთს თავში ხელი და მახვილები ჩასცეს ფერდში, და დაეცნენ ერთად. და ეწოდა მას შემდეგ იმ ადგილს ხელკათ-ჰაცურიმი, რომელიც გიბეონთან არის.

¹⁷და გაიმართა იმ დღეს უსასტიკესი ბრძოლა, და იძლივნენ აბნერი და ისრაელიანები დავითის მსახურთა მიერ.

¹⁸იქ იყო ცერუიას სამი ძე: იოაბი, აბიშაი და ყასაელი. ყასაელი ხომ ფეხმარდი იყო, როგორც ქურციკი ველზე.

¹⁹და გამოუდგა ყასაელი აბნერს, პირდაპირ მისდევდა, არ გაუხვევია არც მარჯვნივ, არც მარცხნივ, კვალდაკვალ მისდევდა აბნერს.

²⁰უკან მოიხედა აბნერმა და უთხრა: „ყასაელი ხარ?“ და თქვა: „მე ვარ.“

²¹და უთხრა აბნერმა: „გადაუხვიე ხელმარცხნივ ან ხელმარჯვნივ, დაიჭირე რომელიმე ამ ჭაბუკთაგანი და წაართვი საჭურველი.“ მაგრამ ყასაელმა არ ინდომა და არ ჩამოეცალა მას.

²²და კვლავ უთხრა აბნერმა ყასაელს: „ჩამომცილდი, თუ არ გინდა, რომ მიწას დაგაკლა! რა პირითღა უნდა შევხედო მერე იოაბს, შენს ძმას?“

²³მაგრამ არ მოინდომა მან ჩამოცილება, და უკუსცა აბნერმა მას შუბი მუცელში და მეორე მხარეს გაატანა შუბმა. იქვე დაეცა ყასაელი და ადგილზევე მოკვდა. და ვინც კი მოდიოდა იმ ადგილას, სადაც დაეცა ყასაელი და მოკვდა, ყველა ჩერდებოდა.

²⁴და დაედევნენ იოაბი და აბიშაი აბნერს. და მზის ჩასვლისას იმ ბორცვს მიაწიეს, გიახის გასწვრივ რომ არის, გიბეონის უდაბნოს გზაზე.

²⁵და შეიყარნენ ბენიამინის ძენი აბნერთან, ერთი რაზმი შეადგინეს და ერთი ბორცვის თავზე დადგნენ.

²⁶და გასძახა აბნერმა იოაბს: „როდემდე უნდა ჭამოს მახვილმა? ნუთუ არ იცი, რომ ბოლო მწარე იქნება? როდემდე არ უნდა უბრძანო შენს ხალხს, თავი დაანებონ თავიანთი ძმების დევნას?“

²⁷და უთხრა იოაბმა: „ღმერთია მოწამე, შენ რომ არ გამოგეწვია, დილიდანვე მოეშვებოდა ხალხი თავისი ძმების დევნას.“

²⁸და დაჰბერა ბუკი იოაბმა და შედგა მთელი ხალხი, და აღარ დაედევნა ისრაელიანთ და აღარც ერთმანეთს შებრძოლებიან.

²⁹და აბნერი და მისი ხალხი მთელი ღამე მიდიოდნენ ყარაბაზე, და გავიდნენ იორდანეს გაღმა, გაიარეს მთელი ხეობა და მიაღწიეს მახანაიმს.

³⁰და იოაბმა, როცა აბნერის დევნიდან დაბრუნდა, შეჰყარა მთელი ხალხი. დავითის მსახურთაგან აკლდა მხოლოდ 19 კაცი და ყასაელი.

³¹ხოლო დავითის მსახურებმა ბენიამინის ძეთაგან და აბნერის მებრძოლთაგან დახოცეს 360 კაცი.

³²და წაასვენეს ყასაელი და დამარხეს ბეთლემს, მამამისის სამარხში. და იარეს მთელი ღამე იოაბმა და მისმა კაცებმა და გამთენიისას ჩააღწიეს ხებრონში.