Read ქართული ბიბლია, სრული ვერსია 2 Samuel 5 Bible Online

2 Samuel 5 - ქართული ბიბლია, სრული ვერსია bible

2 Samuel 5

¹და მოვიდა ისრაელის ყველა შტო დავითთან ხებრონში და ასე უთხრეს: „აგერ, ძვალი და ხორცი ვართ შენი.

²გუშინაც და გუშინწინაც, როცა საული მეფობდა ჩვენზე, შენ გამოგყავდა და შეგყავდა ისრაელი, და უფალმა გითხრა: შენ უნდა დამწყსო ჩემი ერი, ისრაელი, და შენ უნდა იყოო ისრაელის წინამძღოლი.“

³როცა მოვიდა ისრაელის მთელი უხუცესობა მეფესთან ხებრონს, დადო დავითმა მათთან აღთქმა ხებრონში უფლის წინაშე. და სცხეს დავითს ისრაელის მეფედ.

⁴30 წლისა იყო დავითი, როცა გამეფდა, და 40 წელი იმეფა.

⁵ხებრონში შვიდ წელიწადს და ექვს თვეს მეფობდა იგი იუდაზე; იერუსალიმში კი 33 წელი მეფობდა მთელს ისრაელსა და იუდაზე.

⁶და როცა გაილაშქრეს მეფე დავითმა და მისმა კაცებმა იერუსალიმზე იმ ქვეყნის მკვიდრთა, იებუსელთა წინააღმდეგ, ასე უთხრეს დავითს: „ვერ შემოხვალ, რადგან ბრმები და კოჭლებიც კი გაგაქცევენ უკან,“ — ეს ნიშნავდა: აქ ვერ შემოვაო დავითი.

⁷მაგრამ აიღო დავითმა სიონის ციხესიმაგრე: ეს არის დავითის ქალაქი.

⁸და თქვა იმ დღეს დავითმა: „იებუსელთა ყოველმა მძლეველმა სატევრით მოსრას კოჭლებიც და ბრმებიც — დავითის მოძულენი.“ ამიტომაც ამბობენ: „კოჭლი და ბრმა ვერ შევაო სახლში.“[3]

⁹და დადგა დავითი ციხესიმაგრეში, და უწოდა მას დავითის ქალაქი. და ააშენა დავითმა ირგვლივ მილოდან და შიგნით.

¹⁰და წარემართებოდა დავითს და აღემატებოდა, რადგან უფალი, ცაბაოთ ღმერთი იყო მასთან.

¹¹და გამოუგზავნა ხირამმა, ცორის მეფემ, დესპანი დავითს და კედარის ხე-ტყე, ხუროები, ქვისმთლელები, და აუშენეს მათ სახლი დავითს.

¹²და მიხვდა დავითი, რომ მტკიცედ ჰყავდა დადგენილი იგი უფალს ისრაელის მეფედ და რომ აღამაღლა მისი მეფობა თავისი ერის — ისრაელის გამო.

¹³და კიდევ მოიყვანა იერუსალიმში დავითმა ხარჭები და ცოლები ხებრონიდან მოსვლის შემდეგ. და კიდევ შეეძინა დავითს ძენი და ასულნი.

¹⁴ეს არის მათი სახელები, რომლებიც იერუსალიმში შეეძინა მას: შამუაყი, შობაბი, ნათანი და სოლომონი,

¹⁵იბხარი, ელიშუაყი, ნეფეგი და იაფიაყი,

¹⁶ელიშამაყი, ელიადაყი და ელიფელეტი.

¹⁷როცა შეიტყვეს ფილისტიმელებმა, რომ ისრაელის მეფედ სცხეს დავითს, დაიძრნენ მთელი ფილისტიმელნი დავითის საძებნელად. შეიტყო ეს დავითმა და მიუვალ ადგილას ჩავიდა.

¹⁸მოვიდნენ ფილისტიმელები და რეფაიმის ველზე განლაგდნენ.

¹⁹და დაეკითხა დავითი უფალს: „გავიდე ფილისტიმელებზე? ხელში ჩამიგდებ მათ?“ უთხრა უფალმა დავითს: „გადი, რადგან ხელში ჩაგიგდებ ფილისტიმელებს.“

²⁰და მივიდა დავითი ბაყალ-ფერაციმში და იქ სძლია მათ; და თქვა: „წალეკა უფალმა ჩემი მტერი ჩემგან, როგორც წყალდიდობამ.“ ამიტომაც ეწოდა ამ ადგილს ბაყალ-ფერაციმი.

²¹და იქ მიატოვეს მათ თავიანთი კერპები, ხოლო დავითმა და მისმა კაცებმა აიღეს ისინი.

²²და კვლავ მოვიდნენ ფილისტიმელები და რეფაიმის ველზე განლაგდნენ.

²³და დაეკითხა დავითი უფალს, და მან უთხრა: „პირისპირ ნუ მიეჭრები, ზურგიდან მოუარე და თუთის ჭალის მხრიდან მიადექი.

²⁴როგორც კი თუთის ხეთა კენწეროებიდან შრიალის ხმა შემოგესმება, იმწამსვე შეიმართე, რადგან სწორედ მაშინ წაგიძღვება უფალი ფილისტიმელთა ჯარების შესამუსრად.“

²⁵ისე გააკეთა დავითმა, როგორც უბრძანა უფალმა, და გებაყიდან გეზერამდე მუსრი გაავლო ფილისტიმელებს.