Read ქართული ბიბლია, სრული ვერსია 2 Samuel 6 Bible Online

2 Samuel 6 - ქართული ბიბლია, სრული ვერსია bible

2 Samuel 6

¹და კვლავ შეკრიბა დავითმა ყველა რჩეული ვაჟკაცი ისრაელში, 30 ათასი.

²და მთელი თავისი ხალხითურთ ადგა დავითი და წავიდა იუდას ბაყალედან, რათა იქიდან ამოეტანათ ღვთის კიდობანი, რომელიც იწოდება ცაბაოთ უფლის სახელით, რომელიც ქერუბიმებზე ზის.

³და დაასვენეს ღვთის კიდობანი ახალ ურემზე და გამოაბრძანეს აბინადაბის სახლიდან, ბორცვზე[4] რომ დგას. აბინადაბის ვაჟებს: ყუზას და ახიოს მოჰყავდათ ახალი ურემი.

⁴და როცა მოჰყავდათ ღვთის კიდობნით დატვირთული აბინადაბის სახლიდან, ბორცვზე რომ არის, ახიო წინ მოუძღვოდა კიდობანს.

⁵ხოლო დავითი და მთელი ისრაელიანები უკრავდნენ უფლის წინაშე კვიპაროსის ხის საკრავებს, ქნარებს, ბობღნებს, დაფდაფებს, სანგებსა და წინწილებს.

⁶და როცა ნაქონის კალოსთან მივიდნენ, ხელი შეაშველა ყუზამ ღვთის კიდობანს, რადგან ურემი გადახარეს ხარებმა.

⁷და აღიგზნო უფლის რისხვა ყუზას მიმართ და იქვე დასცა იგი ღმერთმა ამ სითამამისთვის, და იქვე მოკვდა იგი ღვთის კიდობანთან.

⁸და შეწუხდა დავითი, რომ განგმირა უფალმა ყუზა. დღემდე ეწოდება იმ ადგილს ფერეც-ყუზა.

⁹და შეეშინდა დავითს იმ დღეს უფლისა და თქვა: „როგორ შემოვა ჩემთან უფლის კიდობანი?“

¹⁰და აღარ ინდომა დავითმა უფლის კიდობნის წაღება თავისთან, დავითის ქალაქში, და გათელი ყობედ-ედომის სახლისკენ გაახვევინა.

¹¹და დარჩა სამ თვეს უფლის კიდობანი გათელი ყობედ-ედომის სახლში. და აკურთხა უფალმა ყობედ-ედომი და მთელი მისი სახლი.

¹²როცა შეატყობინეს დავით მეფეს, რომ აკურთხა უფალმა ღვთის კიდობნის გამო ყობედ-ედომის სახლი და მთელი მისი საბადებელი, წავიდა დავითი და სიხარულით წამოასვენა ღვთის კიდობანი ყობედ-ედომის სახლიდან დავითის ქალაქში.

¹³და როცა უფლის კიდობნის მტვირთავნი ექვს ნაბიჯს გადადგამდნენ, იგი მსხვერპლად სწირავდა თითო ხარსა და ცხვარს.

¹⁴და რაც ძალი და ღონე ჰქონდა, როკავდა დავითი უფლის წინაშე. და სელის ეფოდი ემოსა დავითს.

¹⁵ყიჟინითა და ბუკის ბერვით მიასვენებდნენ უფლის კიდობანს დავითი და ისრაელის მთელი სახლი.

¹⁶და როცა უფლის კიდობანი შევიდა დავითის ქალაქში, სარკმლიდან გადმოიხედა მიქალმა, საულის ასულმა, დაინახა უფლის წინაშე მოხტუნავე და მროკველი დავითი და გულში დასცინა მას.

¹⁷და მიიტანეს უფლის კიდობანი და დაასვენეს თავის ადგილზე შუა კარავში, რომელიც მისთვის მოაწყო დავითმა. და შესწირა დავითმა უფალს სრულადდასაწველი და სამშვიდობო მსხვერპლი.

¹⁸როცა მორჩა დავითი სრულადდასაწველი და სამშვიდობო მსხვერპლის შეწირვას, ცაბაოთ უფლის სახელით დალოცა ერი.

¹⁹და ჩამოურიგა მთელს ერს, ისრაელის მთელს კრებულს, კაცსა და ქალს, თითო პურის კვერი, თითო ხორცის წილობი და თითო კვერი ჩამიჩისა. მერე თავ-თავის სახლებში წავიდა მთელი ხალხი.

²⁰როცა დაბრუნდა დავითი თავისი სახლის დასალოცად, გამოეგება მიქალი, საულის ასული, და უთხრა: „როგორ განდიდდა დღეს ისრაელის მეფე, რომ გაშიშვლდა თავის მხევალთა თვალწინ, როგორც შიშვლდება ხოლმე ქარაფშუტა ვინმე.“

²¹და უთხრა დავითმა მიქალს: „უფლის წინაშე, რომელმაც მე მამჯობინა მამაშენსა და მთელ მის სახლს, როცა ამომირჩია უფლის ერის, ისრაელის წინამძღოლად, იმ უფლის წინაშე სიხარულით ვიხტუნებ და ვიროკებ,

²²და მე მსურს უფრო დავმცირდე, ვიდრე ახლა ვარ და დავმდაბლდე ჩემს თვალში; და უფრო დიდებული გამოვჩნდე იმ მხევალთა წინაშე, შენ რომ ახლა ახსენე.“

²³ხოლო მიქალი, საულის ასული, ისე მოკვდა, რომ შვილი არ შესძენია.