Read ქართული ბიბლია, სრული ვერსია 2 Samuel 7 Bible Online

2 Samuel 7 - ქართული ბიბლია, სრული ვერსია bible

2 Samuel 7

¹მას შემდეგ, რაც დაემკვიდრა მეფე თავის სახლში და მოასვენა იგი უფალმა გარეშემო მტრებისგან,

²უთხრა მეფემ ნათან წინასწარმეტყველს: „აჰა, შეხედე, მე კედარის სახლში ვცხოვრობ, ღვთის კიდობანი კი კარავში ასვენია.“

³და უთხრა ნათანმა მეფეს: „გააკეთე, რასაც გული გეტყვის, რადგან შენთან არის უფალი.“

⁴მაგრამ იმავე ღამით იყო, რომ ჩაესმა ნათანს უფლის სიტყვა:

⁵„წადი და უთხარი ჩემს მსახურს, დავითს, ასე ამბობს-თქო უფალი: ‘განა შენ უნდა ამიშენო სახლი ჩემს დასავანებლად?

⁶მე არ დავმკვიდრებულვარ სახლში იმ დროიდან მოყოლებული, რაც ისრაელიანები ეგვიპტიდან გამოვიყვანე, მუდამ კარავსა და სავანეში ვტრიალებდი დღემდე.

⁷სადაც კი მივლია ისრაელიანთა შორის, თუ ერთხელ ერთი სიტყვა მაინც წამომცდენია ისრაელის რომელიმე ტომის წინაშე, ვისთვისაც ჩემი ერის, ისრაელის მწყემსობა მიბრძანებია, და მითქვამს: კედარის სახლს რატომ არ მიშენებთ-მეთქი?’

⁸ახლა ასე უთხარი ჩემს მსახურს — დავითს: ‘ასე ამბობს-თქო ცაბაოთ უფალი: ცხვრის ფარიდან წამოგიყვანე, რომ ჩემი ერის, ისრაელის წინამძღოლი ყოფილიყავი.

⁹ყველგან თან გდევდი, სადაც კი მიდიოდი, და ვანადგურებდი შენს მტრებს შენს წინაშე, და განვადიდე შენი სახელი, მსგავსად ამ ქვეყნის დიადთა სახელისა;

¹⁰და ადგილს დავუდგენ ჩემს ერს, ისრაელს, და დავაფუძნებ მას, და იცხოვრებს იგი მშვიდად თავის ადგილზე, და მეტად აღარ შეშფოთდება, და ბოროტების ძენი აღარ შეაჭირვებენ მას უწინდებურად.

¹¹მას შემდეგ, რაც მსაჯულები დავუყენე ჩემს ხალხს, ისრაელს, მოვასვენე ყველა მტრისგან. უფალი გატყობინებს, რომ მას სურს აგიგოს სახლი.

¹²როცა აღივსებიან შენი დღეები და შენს მამებთან განისვენებ, მე აღვადგენ შენს შემდგომად შენს თესლს, რომელიც შენი საზარდულიდან გამოვა, და მის მეფობას განვამტკიცებ.

¹³და ის ამიშენებს მე ტაძარს და მე განვამტკიცებ მისი მეფობის ტახტს საუკუნოდ.

¹⁴მე მამა ვიქნები მისთვის, ის კი ძე იქნება ჩემთვის. თუ შემცოდავს, კაცთა წესით ვგვემ და ვცემ ადამიანთა ჩვეულებით.

¹⁵თუმცა არ მოვუშლი მას ჩემს წყალობას, როგორც წავართვი საულს, რომელიც ჩამოგაცილე შენი სახის წინაშე;

¹⁶არამედ მტკიცედ იდგება შენი სახლი და შენი სამეფო უკუნისამდე ჩემი სახის წინაშე. მყარი იქნება შენი ტახტი უკუნისამდე.’“

¹⁷ეს სიტყვები და ეს ხილვა გაუზიარა ნათანმა დავითს.

¹⁸და მივიდა მეფე დავითი და წარსდგა უფლის წინაშე და თქვა: „ვინა ვარ მე, უფალო ღმერთო, და რა არის ჩემი სახლი, რომ ასე განმადიდე?

¹⁹ესეც გემცრო თვალში, ჩემო უფალო ღმერთო, და წინასწარ ილაპარაკე შენი მსახურის სახლზე. ადამის ძეთა წესია ეს, უფალო ღმერთო!

²⁰და კიდევ რა უნდა გითხრას დავითმა? შენ თავად იცნობ შენს მსახურს, უფალო ღმერთო!

²¹შენი სიტყვისა და შენი გულისთქმისამებრ მოიმოქმედე ეს დიადი საქმეები, რათა ამცნო შენს მსახურს.

²²ამიტომაც დიდი ხარ შენ, უფალო, ჩემო ღმერთო, რადგან არავინაა შენი მსგავსი, და არ არის ღმერთი შენს გარდა, ყოველივე იმის თანახმად, რაც ჩვენი ყურით მოვისმინეთ.

²³და ვინ არის შენი ხალხის, ისრაელის მსგავსი? ის ერთადერთია დედამიწაზე, რომლისთვისაც მოვიდა ღმერთი, რომ თავის ხალხად დაეხსნა და განედიდებინა თავისი სახელი და დიდი და საშინელი ამბები გექნა შენი ერის წინაშე, რომელიც შენთვის დაიხსენ ეგვიპტისგან, წარმართთაგან და მათი ღმერთებისგან.

²⁴შენ აირჩიე შენს ერად ისრაელი, რათა უკუნისამდე შენი ერი ყოფილიყო და შენ, უფალო, მისი ღმერთი გახდი!

²⁵და ახლა უფალო, ღმერთო ჩემო, იმოქმედე შენი აღთქმისამებრ და აღასრულე შენი სიტყვა, შენს მსახურსა და მის სახლზე თქმული,

²⁶რათა განდიდდეს შენი სახელი უკუნისამდე და თქვან: ცაბაოთ უფალი ღმერთი არისო ისრაელზე! მტკიცე იყოს შენს წინაშე შენი მსახურის, დავითის სახლი!

²⁷რადგან შენ იყავი, ყოვლისმპყრობელო უფალო, ისრაელის ღმერთო, რომ გამოუცხადე შენს მსახურს და უთხარი: სახლს აგიშენებო. ამიტომაც გაუწია გულმა შენს მსახურს, ასეთი ლოცვით ელოცა შენს მიმართ.

²⁸ახლა, უფალო ღმერთო, შენა ხარ ის ღმერთი, რომლის სიტყვებიც ჭეშმარიტია, და შენი მსახურისათვის ეს სიკეთე გაქვს გამოცხადებული.

²⁹ახლა ინებე და აკურთხე შენი მსახურის სახლი, რომ საუკუნოდ შენს წინაშე იყოს, რადგან ეს შენ წარმოთქვი, უფალო ჩემო! იკურთხოს შენი კურთხევით შენი მსახურის სახლი საუკუნოდ!“