Read ქართული ბიბლია, სრული ვერსია 1 Kings 10 Bible Online

1 Kings 10 - ქართული ბიბლია, სრული ვერსია bible

1 Kings 10

¹მისწვდა შებას დედოფალს სოლომონის ამბავი, უფლის სადიდებელი, და მოვიდა, რომ გამოცანებით გამოეცადა იგი.

²მოვიდა იერუსალიმში დიდი ამალით, აქლემებს მოჰქონდათ ნელსაცხებლები, აურაცხელი ოქრო და ძვირფასი თვლები. და მოვიდა სოლომონთან და ემასლაათა ყველაფერზე, რაც გულში ჰქონდა.

³ყველა კითხვაზე გასცა პასუხი სოლომონმა. არაფერი იყო მეფისთვის დაფარული, რომ უპასუხოდ დაეტოვებინა იგი.

⁴ნახა შებას დედოფალმა სოლომონის მთელი სიბრძნე, და ნახა მისი აშენებული სახლი;

⁵მისი სუფრის სანოვაგე; მის მსახურთა გალიაკები, მათი ჩასაცმელ-დასახურავი, მათი წესი და რიგი; მისი მწდენი; მისი სრულადდასაწველი მსხვერპლი, რომელსაც აღავლენდა უფლის სახლში და გაოგნებულმა

⁶უთხრა მეფეს: „მართალი ყოფილა, რაც ჩემს ქვეყანაში მქონდა გაგონილი შენს საქმეებსა და შენს სიბრძნეზე.

⁷სიტყვების არ მჯეროდა, ვიდრე თავად არ მოვედი და ჩემი თვალით არ ვიხილე. აჰა, თურმე ნახევარიც კი არ უთქვამთ ჩემთვის. უფრო მეტი სიბრძნე და დოვლათი გქონია, ვიდრე გამეგონა.

⁸ბედნიერია შენი ხალხი. ბედნიერები არიან ეს შენი მსახურნი, მუდამ შენს წინაშე რომ დგანან და ისმენენ შენს სიბრძნეს.

⁹კურთხეულ იყოს უფალი, შენი ღმერთი, რომელმაც მოგისურვა, რათა ისრაელის ტახტზე დაესვი. უფალს, საუკუნო სიყვარულის გამო ისრაელისადმი, დაუდგენიხარ მეფედ სამართლისა და სიმართლის გასაჩენად.“

¹⁰და უბოძა მეფეს 120 ტალანტი ოქრო, დიდძალი ნელსაცხებელი და ძვირფასი თვლები. მეტჯერ აღარ შემოსულა იმდენი ნელსაცხებელი, რამდენიც შებას დედოფალმა უბოძა მეფე სოლომონს.

¹¹ხირამის ხომალდმაც, რომელიც ოქროს ეზიდებოდა ოფირიდან, მოიტანა ოფირიდანვე დიდძალი სანდალოზის ხე და თვალ-მარგალიტი.

¹²და გაუკეთა მეფემ სანდალოზის ხის მოაჯირები უფლის ტაძარსა და მეფის სასახლეს; გააკეთა ებნები და ქნარები მგალობელთათვის. მეტად აღარ შემოუტანიათ და მას მერე არავის უნახავს იმდენი სანდალოზის ხე.

¹³და მისცა მეფე სოლომონმა შებას დედოფალს ყველაფერი, რაც კი მან ინება და სთხოვა, გარდა იმისა, რაც თავისით ჰქონდა ნაჩუქარი, როგორც მეფე სოლომონს ეკადრებოდა. და უკან გაბრუნდა და წავიდა იგი თავის ქვეყანაში თავის მსახურებთან ერთად.

¹⁴666 ტალანტი ოქრო შემოსდიოდა სოლომონს ყოველწლიურად,

¹⁵იმას გარდა, რაც შემოდიოდა მოქარავნეთაგან, ვაჭართაგან, არაბთა მეფეებისა და მხარეთა განმგებლებისაგან.

¹⁶და გააკეთა მეფე სოლომონმა 200 დიდი ფარი ოქროთი ნაჭედი. 600 შეკელი ოქრო დაიხარჯა თითოეულ ფარზე.

¹⁷და 300 პატარა ფარი ოქროთი ნაჭედი, სამი მანა ოქრო დასჭირდა თითოეულ ფარს. და დააწყო ისინი მეფემ ლიბანის მაღნარის სახლში.

¹⁸და გააკეთა მეფემ სპილოს ძვლისაგან დიდი ტახტი და ხალასი ოქროთი დაფერა.

¹⁹ექვსი საფეხური ჰქონდა ტახტს, საზურგეს ზემოდან მომრგვალებული იყო, საჯდომის ორსავე მხარეს სანიდაყვეები ჰქონდა, ხოლო სანიდაყვეებს ორი ლომი ედგა გვერდით.

²⁰ექვს საფეხურზე, აქეთ-იქით, სხვა 12 ლომი იდგა. არც ერთ სამეფოში არ ყოფილა ამის მსგავსი რამ.

²¹სოლომონის ყველა სასმისი ოქროსი იყო, ლიბანის მაღნარის სახლში მთელი ჭურჭელი სუფთა ოქროსი იყო; ვერცხლისა არაფერი იყო, რადგან ვერცხლი არაფრად მიაჩნდათ სოლომონის დროს.

²²რადგან მეფის თარშიშული ხომალდები ხირამის ხომალდებთან ერთად გადიოდნენ ზღვაში. სამ წელიწადში ერთხელ შემოდიოდნენ თარშიშული ხომალდები და მოჰქონდათ ოქრო-ვერცხლი, სპილოს ძვალი, და მოჰყავდათ ყაფუზუნები და ფარშევანგები.

²³ქვეყნიერების ყველა მეფეს აღემატებოდა მეფე სოლომონი დოვლათითა და სიბრძნით.

²⁴მთელი ქვეყანა ესწრაფოდა სოლომონის ნახვას, რომ მოესმინათ მისი სიბრძნე, რომელიც გულში ჩაუდო ღმერთმა.

²⁵ყველას თავისი ძღვენი მოჰქონდა: ოქროს ჭურჭელი და ვერცხლის ჭურჭელი, შესამოსელი, საჭურველი, ნელსაცხებლები, ცხენები და ჯორები, ასე იყო წლიდან წლამდე.

²⁶თავი მოუყარა სოლომონმა ეტლებსა და ცხენოსნებს; და ჰყავდა 1400 ეტლი და 12 ათასი ცხენოსანი. განალაგა ისინი ეტლების სადგომ ქალაქებსა და იერუსალიმში, თავისთან.

²⁷მეფემ ისე გააკეთა, რომ ვერცხლი იერუსალიმში ქვასავით ეყარა, ხოლო კედარი — სიკომორივით, შეფელაში რომ ხარობს.

²⁸სოლომონის ცხენები ეგვიპტიდან და კევედან იყო მოყვანილი, მეფის ვაჭრები ყიდულობდნენ კევეში ფულით.

²⁹ეტლები 600 შეკელ ვერცხლად ამოჰქონდათ ეგვიპტიდან, ხოლო ცხენები — 150 ვერცხლად. ასევე მიჰქონდათ თავიანთი ხელით ეს ყოველივე ხეთელთა და არამის მეფეებისთვისაც.