Read ქართული ბიბლია, სრული ვერსია 1 Kings 11 Bible Online

1 Kings 11 - ქართული ბიბლია, სრული ვერსია bible

1 Kings 11

¹გარდა ფარაონის ასულისა, მეფე სოლომონმა შეიყვარა მრავალი უცხოელი ქალი — მოაბელები, ყამონელები, ედომელები, ციდონელები და ხეთელები —

²იმ ხალხთა ქალები, რომელთა შესახებ ნაბრძანები ჰქონდა უფალს ისრაელიანთათვის: „ნუ შეხვალთ მათთან და ნურც ისინი შემოვლენ თქვენთან, თორემ უეჭველად მიდრეკენ თქვენს გულებს თავიანთი ღმერთებისაკენ.“ მათ მიეწება სოლომონი სიყვარულით.

³და ჰყავდა 700 ცოლი დედოფლად და 300 ხარჭა. და გარყვნეს მისი გული ცოლებმა.

⁴და როცა ხანში შევიდა, მიდრიკეს მისი გული მისმა ცოლებმა უცხო ღმერთებისაკენ. და ისე წრფელი არ იყო მისი გული უფლისადმი, როგორც მამამისის, დავითის გული.

⁵და შეუდგა სოლომონი ციდონელთა ღმერთის — ყაშთორეთის და ყამონელთა სიბილწის — მილქომის კვალს.

⁶ბოროტებას სჩადიოდა სოლომონი უფლის თვალში და ისე არ ერთგულებდა უფალს, როგორც მამამისი დავითი.

⁷მაშინ აუგო სოლომონმა სამსხვერპლო ქემოშს, მოაბის სიბილწეს, მთაზე, იერუსალიმის პირდაპირ, და მოლეხს, ყამონიანთა სიბილწეს.

⁸ასევე მოიქცა ყველა თავისი უცხოელი ცოლის გამო, რომელნიც უკმევდნენ და მსხვერპლს სწირავდნენ თავ-თავიანთ ღმერთებს.

⁹და განურისხდა უფალი სოლომონს, რადგან გული აიცრუა მან უფალზე, ისრაელის ღმერთზე, რომელიც ორჯერ გამოეცხადა მას,

¹⁰და უბრძანა, არ დასდგომოდა უცხო ღმერთების კვალს, მაგრამ არ შეასრულა მან უფლის ბრძანება.

¹¹და უთხრა უფალმა სოლომონს: „იმის გამო, რომ ასე იქცევი: არ ასრულებ ჩემს აღთქმას და წესებს, რომლებიც გამცნე, წაგართმევ სამეფოს და მივცემ შენს მსახურს;

¹²ოღონდ შენს სიცოცხლეში არ გავაკეთებ ამას მამაშენის, დავითის გამო. შენს შვილს კი გამოვგლეჯ ხელიდან.

¹³მაგრამ მთელს სამეფოს არ გამოვგლეჯ; ერთ ტომს შენს შვილს დავუტოვებ დავითის, ჩემი მსახურის გამო და იერუსალიმის გამო, რომელიც მე ავირჩიე.“

¹⁴და გაუჩინა უფალმა მტერი სოლომონს — ედომელი ჰადადი, ედომის მეფეთა მოდგმისა.

¹⁵როცა დავითი ედომში იყო, და როცა მხედართმთავარი იოაბი ამოვიდა დახოცილთა დასამარხად და ერთიანად გაწყვიტა მამაკაცები ედომში, —

¹⁶რადგან ექვს თვეს დარჩნენ იქ იოაბი და ისრაელიანები, ვიდრე არ მოსპეს მამაკაცის სახსენებელი ედომში, —

¹⁷მაშინ გაიქცა ეს ჰადადი ეგვიპტეში, და მასთან ერთად რამდენიმე ედომელი, მამამისის მსახურნი; ჰადადი მაშინ პატარა ბიჭი იყო.

¹⁸და აიყარნენ მიდიანიდან და მივიდნენ ფარანს, და წაიყვანეს ფარანიდან ხალხი და მივიდნენ ფარაონთან, ეგვიპტის მეფესთან. ჰადადი შევიდა ფარაონთან, და მისცა მან სახლი და მიწა მას, და სარჩოც დაუნიშნა.

¹⁹და დიდი მადლი ჰპოვა ჰადადმა ფარაონის თვალში, ისე რომ მან მიათხოვა ცოლად თავისი ცოლისდა, დედოფალ თახფენესის და.

²⁰და უშვა მას თახფენესის დამ ვაჟი — გენუბათი. თახფენესმა ბავშვი ფარაონის სახლში გაზარდა. და ცხოვრობდა გენუბათი ფარაონის შვილებთან ერთად.

²¹და როცა მიუვიდა ამბავი ეგვიპტეში ჰადადს, რომ განისვენა დავითმა თავის მამებთან, და რომ მოკვდა მხედართმთავარი იოაბი, უთხრა ჰადადმა ფარაონს: გამიშვი, ჩემს ქვეყანაში წავალო.

²²და უთხრა ფარაონმა: „რა გაკლია ჩემთან, შენს ქვეყანაში რომ განიზრახეო წასვლა?“ და მიუგო მან: „არაფერი, მაგრამ მაინც გამიშვი.“

²³კიდევ გაუჩინა სოლომონს ღმერთმა მტერი — რეზონი, ძე ელიადაყისა, რომელიც გაექცა თავის ხელმწიფეს, ცობას მეფე ჰადადყეზერს.

²⁴შემოიკრიბა ხალხი და გახდა მძარცველთა მეთაური, ხოლო მას შემდეგ, რაც დავითმა ჰადადყეზერს სძლია, რეზონი დამასკოში გაეშურა, აიღო ის და დამასკოს მეფე გახდა.

²⁵ისრაელის მტერი იყო იგი სოლომონის სიცოცხლეში, იმ ხანად, როცა ისრაელს ჰადადიც მტრობდა. მას სძულდა ისრაელი და არამზე მეფობდა.

²⁶იერობოყამ ნებატის ძემაც, ეფრათელმა ცერედადან, სოლომონის მსახურმა, რომლის დედა იყო ცერუაყი, ქვრივი ქალი, აღმართა ხელი მეფეზე.

²⁷აი, რის გამო მოხდა, ხელი რომ აღმართა მეფე სოლომონზე: მილოს აშენებდა სოლომონი, დანგრეულს აღადგენდა დავითის, მამამისის, ქალაქში.

²⁸მამაცი კაცი იყო იერობოყამი. და დაინახა სოლომონმა, რომ ვარგოდა საქმეში ეს ყმაწვილი, და ზედამხედველად დაუყენა იოსების სახლიდან გამოყვანილ ბეგრის ხალხს.

²⁹ისე მოხდა იმხანად, რომ გასული იყო იერუსალიმიდან იერობოყამი და შეხვდა გზად შილოელი წინასწარმეტყველი ახია, რომელსაც ახალი მოსასხამი ეხვია. ამ ორის მეტი არავინ იყო მინდვრად.

³⁰და აიღო ახიამ თავისი ახალი მოსასხამი და თორმეტ ნაჭრად დახია.

³¹და უთხრა იერობოყამს: „აიღე შენთვის ათი ნაჭერი, რადგან ასე ბრძანა უფალმა, ისრაელის ღმერთმა: ‘აჰა, მე სამეფოს ვგლეჯ სოლომონს ხელიდან და შენ გაძლევ მის ათ შტოს.

³²მას ერთი შტო დარჩება ჩემი მსახურის, დავითის გამო და იერუსალიმის გამო, ქალაქისა, რომელიც ავირჩიე მე ისრაელის ყველა შტოდან.

³³ეს იმიტომ, რომ დამივიწყეს და თაყვანს სცემენ ყაშთორეთს — ციდონელთა ღმერთს, ქემოშს — მოაბის ღმერთს, და მილქომს — ყამონელთა ღმერთს. არ იარეს ჩემს გზაზე, რომ სიმართლე ექნათ ჩემს თვალში, დაეცვათ ჩემი წესი და სამართალი, როგორც მამამისი, დავითი იცავდა.

³⁴და არ ვგლეჯ ხელიდან მთელს სამეფოს, რადგან მთავრად დავადგინე იგი მთელი მისი სიცოცხლე ჩემი მსახურის, დავითის გულისთვის, რომელიც მე ავირჩიე და რომელიც იცავდა ჩემს მცნებებსა და წესებს.

³⁵მის შვილს გამოვგლეჯ ხელიდან სამეფოს და შენ მოგცემ მის ათ შტოს.

³⁶ხოლო მის შვილს ერთ შტოს მივცემ, რათა სამარადჟამოდ დაურჩეს ლამპარი დავითს, ჩემს მსახურს, ჩემს წინაშე, იერუსალიმში, ქალაქში, რომელიც ჩემთვის ავირჩიე ჩემი სახელის იქ დასამკვიდრებლად.

³⁷ახლა შენ ამყავხარ, რათა იმბრძანებლო ყველაფერზე, რასაც შენი სული მოისურვებს, და რომ ისრაელის მეფე გახდე.

³⁸და თუ შეისმენ ყველაფერს, რასაც მე გიბრძანებ, და ივლი ჩემს გზაზე, თუ გააკეთებ ჩემს მოსაწონს, დაიცავ ჩემს წესებსა და მცნებებს, როგორც ჩემი მსახური, დავითი აკეთებდა, მაშინ შენთან ვიქნები, აგიშენებ მტკიცე სახლს, როგორც დავითს ავუშენე და მოგცემ ისრაელს.

³⁹და მოვთრგუნავ ამის გულისთვის დავითის მონაგარს, ოღონდ არა სამარადჟამოდ.’“

⁴⁰და ცდილობდა სოლომონი იერობოყამის მოკვლას, მაგრამ ადგა და გაიქცა იერობოყამი ეგვიპტეში, შიშაკთან, ეგვიპტის მეფესთან, და იქ დარჩა სოლომონის სიკვდილამდე.

⁴¹სოლომონის დანარჩენი საქმეები, ყველაფერი, რაც მან გააკეთა, და მისი სიბრძნე, სოლომონის საქმეთა წიგნშია აღწერილი.

⁴²ხანი სოლომონის მეფობისა იერუსალიმში მთელს ისრაელზე იყო 40 წელი.

⁴³და განისვენა სოლომონმა თავის მამებთან და დამარხეს დავითის, მამამისის ქალაქში, და გამეფდა მის ნაცვლად მისი ძე რეხობოყამი.