Read ქართული ბიბლია, სრული ვერსია 1 Kings 13 Bible Online

1 Kings 13 - ქართული ბიბლია, სრული ვერსია bible

1 Kings 13

¹და აჰა, იუდადან ბეთელში მოვიდა ღვთისკაცი უფლის შეგონებით, როცა იერობოყამი სამსხვერპლოსთან იდგა საკმევლის საკმევად.

²და მიმართა უფლის სიტყვა სამსხვერპლოს და თქვა: „სამსხვერპლო, სამსხვერპლო! ასე ამბობს უფალი: ‘აჰა, დაებადება ძე დავითის სახლს და იოშია იქნება მისი სახელი, და მსხვერპლად შეგწირავს ის გორაკთა მღვდლებს, რომლებიც საკმეველს აკმევენ შენზე, და შენზე დაწვავს ადამიანთა ძვლებს.’“

³და იმავე დღეს ნიშანიც გაუცხადა და უთხრა: „აი, ნიშანი იმისა, რომ უფლის ნაბრძანებია ეს სიტყვები: ‘აჰა, დაიშლება ეს სამსხვერპლო და გაიფანტება ნაცარი, ზედ რომ ყრია.’“

⁴როცა გაიგონა მეფემ ღვთისკაცის სიტყვები, სამსხვერპლოს რომ უთხრა ბეთელში, ხელი გამოიშვირა იერობოყამმა სამსხვერპლოდან და ბრძანა: შეიპყარითო! და უმალ გაუშეშდა გაშვერილი ხელი და ვეღარ შეძლო მოხრა.

⁵და დაინგრა სამსხვერპლო და ნაცარიც გაიფანტა იმ ნიშნის თანახმად, ღვთისკაცმა რომ გააცხადა უფლის სიტყვით.

⁶და მიუგო მეფემ და უთხრა ღვთისკაცს: „შეევედრე უფალს, შენს ღმერთს, და ილოცე ჩემთვის, რომ ხელის მოხრა შევძლო.“ შეევედრა ღვთისკაცი უფალს და შეძლო მეფემ ხელის მოხრა ძველებურად.

⁷და უთხრა მეფემ ღვთისკაცს: „შინ წამომყევი და დანაყრდი; თან საჩუქარიც მინდა მოგცე.“

⁸და უთხრა ღვთისკაცმა მეფეს: „ნახევარი სახლიც რომ მომცე, არ წამოგყვები, არც პურს შევჭამ და არც წყალს დავლევ ამ ადგილას,

⁹რადგან ასე მაქვს ნაბრძანები უფლის სიტყვით: პურს ნუ შეჭამ იქ და წყალს ნუ დალევ, და ნურც იმ გზით დაბრუნდები, რომლითაც მოხვედიო.“

¹⁰და სხვა გზით დაბრუნდა უკან. იმ გზით არ წასულა, რომლითაც მოვიდა ბეთელში.

¹¹ერთი მოხუცი წინასწარმეტყველი ცხოვრობდა ბეთელში. მოვიდნენ მისი შვილები და უამბეს ყველაფერი, რაც ღვთისკაცმა გააკეთა იმ დღეს ბეთელში. და მეფესთან მისი ნალაპარაკევიც უამბეს მამას.

¹²შეეკითხა მამა: რომელი გზით წავიდაო? და დაანახეს შვილებმა ის გზა, რომლითაც იუდადან მოსული ღვთისკაცი წავიდა.

¹³და უთხრა შვილებს: „შემიკაზმეთ სახედარი.“ და შეუკაზმეს სახედარი და ზედ შეჯდა

¹⁴და გაჰყვა ღვთისკაცს. მუხის ქვეშ მჯდომარე იპოვა იგი და უთხრა: „შენა ხარ ის ღვთისკაცი, იუდადან რომ იყო მოსული?“ და მიუგო: „მე ვარ.“

¹⁵და უთხრა: „შინ წამომყევი და ჭამე პური.“

¹⁶და თქვა: „ვერ დავბრუნდები შენთან ერთად და ვერც შენთან მოვალ, ვერც პურს შევჭამ და ვერც წყალს დავლევ ამ ადგილას,

¹⁷რადგან უფლის სიტყვით მაქვს ნაბრძანები: ნურც პურს შეჭამ და ნურც წყალს დალევ იქ, და ნურც იმ გზით გაბრუნდები, რომლითაც მიხვედიო.“

¹⁸და უთხრა: „მეც შენსავით წინასწარმეტყველი ვარ. ანგელოზი მელაპარაკა უფლის ბრძანებით და მითხრა: შენი სახლისკენ გააბრუნე ეს კაცი, პურიც ჭამოს და წყალიც დალიოსო,“ — იცრუა მან.

¹⁹და დაბრუნდა იგი მასთან ერთად, პურიც ჭამა მის სახლში და წყალიც დალია.

²⁰სუფრას რომ უსხდნენ, უფლის სიტყვა გამოეცხადა წინასწარმეტყველს, რომელმაც გამოაბრუნა იგი,

²¹და უთხრა მან იუდადან მოსულ ღვთისკაცს: „ასე ამბობს უფალი: რაკი უფლის სიტყვას გადახვედი და არ შეასრულე მისი ბრძანება, რაც უფალს, შენს ღმერთს, ჰქონდა შენთვის ნაბრძანები,

²²არამედ გაბრუნდი, პური ჭამე და წყალი დალიე იმ ადგილას, რომელზეც გიბრძანა: ნურც პურს შეჭამ და ნურც წყალს დალევო, ამიტომ არ ჩავა შენი გვამი შენი მამების სამარხებში.“

²³შემდეგ კი, როცა პური ჭამა და წყალი დალია მან, სახედარი შეუკაზმა წინასწარმეტყველს, რომელიც წეღან გზიდან გამოაბრუნა.

²⁴და წავიდა და შემოეყარა გზად ლომი და მოკლა იგი ლომმა. გზაზე ეგდო მისი გვამი და სახედარი ედგა გვერდით, და ლომიც იდგა გვამთან.

²⁵დაინახა ჩამვლელმა ხალხმა გზაზე დაგდებული გვამი და იქვე მდგომი ლომი, მივიდნენ და მიიტანეს ამბავი ქალაქში, სადაც ის მოხუცი წინასწარმეტყველი ცხოვრობდა.

²⁶და გაიგო ეს ამბავი წინასწარმეტყველმა, რომელმაც გზიდან გამოაბრუნა ის კაცი და თქვა: „ეს ის ღვთისკაცია, უფლის ბრძანებას რომ გადავიდა; უფალმა მისცა ლომს, რომელსაც დაუტორავს და მოუკლავს, უფლის სიტყვისამებრ, როგორც ნათქვამი ჰქონდა მისთვის.“

²⁷და თავის შვილებს უთხრა: „შემიკაზმეთ სახედარი.“ და შეუკაზმეს.

²⁸და წავიდა და იპოვა გზაზე დაგდებული მისი გვამი, სახედარი და ლომი იდგნენ გვამთან. ლომს არც გვამი შეუჭამია და არც სახედარი დაუტორავს.

²⁹და აიღო წინასწარმეტყველმა ღვთისკაცის გვამი, გადაჰკიდა სახედარს და უკან წამოიღო. და მოვიდა ქალაქში მოხუცი წინასწარმეტყველი, რათა დაეტირა და დაემარხა იგი.

³⁰და ჩაასვენა გვამი თავის სამარხში და დასტიროდა მას: ვაი, ძმაო ჩემოო!

³¹და როცა დამარხა, უთხრა თავის შვილებს: „როცა მოვკვდები, დამმარხეთ სამარხში, სადაც ღვთისკაცი მარხია, მისი ძვლების გვერდით დაასვენეთ ჩემი ძვლები,

³²რადგან ახდება სიტყვა, რაც უფლის ჩაგონებით მიმართა მან ბეთელში მდგარ სამსხვერპლოს და გორაკთა სახლებს, სამარიის ქალაქებში რომ არის აღმართული.“

³³ამ ამბების შემდეგაც არ მიუტოვებია იერობოყამს ბოროტ გზაზე სიარული, და კვლავ განაწესებდა ხალხიდან გორაკთა მღვდლებს; ვინც მოეწონებოდა, იმას აუვსებდა ხელს და ის ხდებოდა გორაკთა ქურუმი.

³⁴ეს იყო მიზეზი, რომ ცოდვაში ჩავარდა იერობოყამის სახლი, რომ მოისპო და წარიხოცა პირისაგან მიწისა.