Read ქართული ბიბლია, სრული ვერსია 1 Kings 14 Bible Online

1 Kings 14 - ქართული ბიბლია, სრული ვერსია bible

1 Kings 14

¹იმ ხანად დასნეულდა იერობოყამის ძე — აბია.

²და უთხრა ცოლს იერობოყამმა: „ადექი და გადაიცვი, რათა ვერ გიცნონ, იერობოყამის ცოლი რომ ხარ, და წადი შილოში. იქ არის წინასწარმეტყველი ახია; მან მე მიწინასწარმეტყველა, ამ ერის მეფე გახდებიო.

³მიართვი იმ ღვთის კაცს ათი პური, კვერები ბავშვებისათვის და ერთი ქილა თაფლი. მიდი და ის გეტყვის, რა მოუვა ბავშვს.“

⁴ასე გააკეთა იერობოყამის ცოლმა: ადგა და წავიდა შილოში, და მივიდა ახიას სახლში. მაგრამ ვეღარ ხედავდა ახია, რადგან სიბერის გამო თვალისჩინი წართმეოდა.

⁵უფალმა უთხრა ახიას: „აჰა, იერობოყამის ცოლი მოდის, თავისი ავადმყოფი ბავშვის ამბავი რომ გკითხოს; ასე და ასე ელაპარაკე; როცა შემოვა, სხვა ვინმედ მოგაჩვენებს თავს.“

⁶როცა გაიგონა ახიამ კართან მომდგარი ქალის ფეხის ხმა, დაუძახა: „შემოდი, იერობოყამის ცოლო! სხვა ვინმედ რად გვაჩვენებ თავს? მძიმე ამბავი უნდა გამცნო.

⁷წადი, უთხარი იერობოყამს: ასე ამბობს-თქო უფალი, ისრაელის ღმერთი: ‘მე აღგაზევე შენ ამ ერში და ისრაელის ერისმთავრად დაგადგინე;

⁸მე გამოვგლიჯე დავითის სახლს მეფობა და შენ მოგეცი, თუმცა არ ჰგავხარ ჩემს მსახურს, დავითს, რომელიც იცავდა ჩემს მცნებებს, მთელი გულით მომყვებოდა და მხოლოდ იმას აკეთებდა, რაც ჩემს თვალში სიწრფელე იყო.

⁹შენ ყველა მათგანზე უარესად მოიქეცი, ვინც კი შენამდე ყოფილა: წახვედი და უცხო ღმერთები და კერპები გაიჩინე ჩემს გასარისხებლად; თავად მე კი ზურგი მადრიკე.

¹⁰ამიტომ აჰა, უბედურებას დავატეხ იერობოყამის სახლს და ამოვძირკვავ ყველა კაცს, ყმასა და ისრაელში დარჩენილ აზატს და გავხვეტ იერობოყამის სახლს, როგორც ნაგავს გახვეტენ ხოლმე პირწმინდად.

¹¹ვინც ქალაქში მოუკვდება იერობოყამს, იმას ძაღლები შეჭამენ, ვინც ველად მოუკვდება, ცის ფრინველები დაჯიჯგნიან;’ ასე ბრძანა-თქო უფალმა.

¹²ახლა ადექი და შინ წადი; როგორც კი ფეხს შეადგამ ქალაქში, ბავშვი მოგიკვდება.

¹³და დაიტირებს მთელი ისრაელი და დამარხავენ. ეგ ერთადერთი იქნება იერობოყამის მთელი სახლიდან, ვინც საფლავში დაიმარხება, რადგან მხოლოდ მასში აღმოჩნდა რაღაც სიკეთე უფლის, ისრაელის ღმერთის წინაშე.

¹⁴უფალი აღიდგენს ისრაელზე თავის სასურველ მეფეს, რომელიც დასცემს იერობოყამის სახლს იმ დღეს; თუმცა, რატომ ახლავე არა?

¹⁵და დალახვრავს უფალი ისრაელს და დაემსგავსება იგი ლერწამს, წყალში რომ ირყევა, და აღმოფხვრის ისრაელიანთ ამ დალოცვილი მიწიდან, რომელიც მათ მამებს მისცა, და მდინარის გაღმა გადარეკავს მათ, რადგან აშერები გაიჩინეს უფლის გასარისხებლად.

¹⁶და გასწირავს ისრაელს იერობოყამის გამო, თავადაც რომ სცოდა და ისრაელიც შეიყვანა ცოდვაში.“

¹⁷და ადგა იერობოყამის ცოლი და წავიდა, და მივიდა თირცაში. და ვიდრე ზღურბლს გადააბიჯებდა, მოკვდა ყმაწვილი.

¹⁸და დამარხეს ის, და დაიტირა მთელმა ისრაელმა, როგორც ნათქვამი ჰქონდა უფალს თავისი მსახურის, ახია წინასწარმეტყველის პირით.

¹⁹იერობოყამის დანარჩენი საქმენი, როგორ იბრძოდა იგი და როგორ გამეფდა, ისრაელის მეფეთა მატიანეშია ჩაწერილი.

²⁰ხანი იერობოყამის მეფობისა იყო 22 წელი. და განისვენა მან თავის მამებთან, და მის ნაცვლად ნადაბი გამეფდა, მისი ძე.

²¹ხოლო რეხობოყამი, სოლომონის ძე, იუდაში მეფობდა. 41 წლისა იყო რეხობოყამი, როცა გამეფდა, და ჩვიდმეტ წელს იმეფა იერუსალიმში, ქალაქში, რომელიც ისრაელის ყველა შტოდან ამოირჩია უფალმა თავისი სახელის იქ დასამკვიდრებლად. დედამისს ერქვა ნაყამა, ყამონელი ქალი იყო ის.

²²ბოროტებას სჩადიოდა იუდა უფლის თვალში, და თავიანთ მამებს გადაამეტეს ცოდვებში, რითაც გულისწყრომით ავსებდნენ უფალს.

²³ყოველ მაღალ ბორცვზე ააგეს სვეტები და მოაწყვეს აშერები და ბომონები დაბურული ხეების ქვეშ.

²⁴ტაძრის მსიძავნიც იყვნენ ქვეყანაში, სჩადიოდნენ იმ ხალხების ყოველგვარ სიბილწეს, რომელნიც განდევნა უფალმა ისრაელიანთაგან.

²⁵რეხობოყამის მეფობის მეხუთე წელს ეგვიპტის მეფე შიშაკი თავს დაესხა იერუსალიმს.

²⁶და წაიღო უფლის ტაძრისა და სამეფო სახლის განძეულობა, ყველაფერი წაიღო, წაიღო ოქროს ფარებიც, სოლომონმა რომ გააკეთებინა.

²⁷მათ ნაცვლად მეფე რეხობოყამმა ბრინჯაოს ფარები დაამზადებინა და ისინი დაცვის უფროსებს ჩააბარა, რომელნიც სამეფო სახლის შესასვლელს დარაჯობდნენ.

²⁸როცა მეფე უფლის სახლში შედიოდა, მცველებს მიჰქონდათ ისინი, და მერე ისევ აბრუნებდნენ მცველთა ოთახში.

²⁹რეხობოყამის დანარჩენი საქმენი, ყველაფერი, რაც გააკეთა, იუდას მეფეთა მატიანეშია ჩაწერილი.

³⁰რეხობოყამი და იერობოყამი მთელი მათი სიცოცხლის მანძილზე ებრძდნენ ერთმანეთს.

³¹განისვენა რეხობოყამმა თავის მამებთან, და დაიმარხა თავისი მამების გვერდით დავითის ქალაქში. დედამისი იყო ნაყამა, ყამონელი ქალი. და გამეფდა მის ნაცვლად მისი ძე — აბიამი.