Read ქართული ბიბლია, სრული ვერსია 1 Kings 15 Bible Online

1 Kings 15 - ქართული ბიბლია, სრული ვერსია bible

1 Kings 15

¹იერობოყამ ნებატის ძის მეფობის მეთვრამეტე წელს აბიამი გამეფდა იუდაზე.

²სამ წელიწადს მეფობდა იგი იერუსალიმში. დედამისი იყო მაყაქა, აბესალომის ასული.

³და დადიოდა ყველა იმ ცოდვით, რასაც მის წინ მამამისი სჩადიოდა, და არ იყო სრულად მინდობილი მისი გული უფლისადმი, როგორც მისი წინაპრის, დავითის გული.

⁴უფალმა, მისმა ღმერთმა, დავითის გამო მისცა მას ლამპარი იერუსალიმში, რომ დაუსვა ძე მემკვიდრედ და შეუნარჩუნა იერუსალიმი.

⁵რადგანაც სწორად იქცეოდა დავითი უფლის თვალში და მთელს მის სიცოცხლეში არ გადასულა ყოველივე იმას, რაც მან აღუთქვა მას, გარდა ურია ხეთელის ამბისა.

⁶გამუდმებული ბრძოლა იყო რეხობოყამსა და იერობოყამს შორის.

⁷აბიამის დანარჩენი საქმენი, ყველაფერი, რაც მან გააკეთა, იუდას მეფეთა მატიანეშია ჩაწერელი. ბრძოლა იყო გაჩაღებული აბიამსა და იერობოყამს შორის.

⁸და განისვენა აბიამმა თავის მამებთან, და დამარხეს იგი დავითის ქალაქში. მის ნაცვლად მისი ძე — ასა გამეფდა.

⁹ისრაელის მეფის, იერობოყამის მეფობის მეოცე წელს იუდაზე გამეფდა ასა

¹⁰და 41 წელიწადს მეფობდა იერუსალიმში. დედამისს, აბესალომის ასულს, მაყაქა ერქვა.

¹¹უფლის მოსაწონად იქცეოდა ასა დავითის, მამამისის მსგავსად.

¹²გაყარა ტაძრის მსიძავნი ქვეყნიდან და ერთიანად მოიშორა კერპები, რომლებიც მის მამებს ჰქონდათ გაკეთებული.

¹³თვით დედამისი, მაყაქაც კი ჩამოაშორა დედოფლობას, რადგან კერპი ჰქონდა დადგმული აშერასთვის. აჩეხა ასამ მისი კერპი და კიდრონის ხევში დაწვა.

¹⁴გორაკები კი არ მოუშორებია, თუმცა სრულად იყო ასას გული მინდობილი უფლისადმი მთელი თავისი სიცოცხლის მანძილზე.

¹⁵და შეიტანა უფლის სახლში თავისი შეწირული და მამამისის შეწირული ნივთები — ოქრო-ვერცხლი და ჭურჭელი.

¹⁶გამუდმებული ბრძოლა იყო ასასა და ისრაელის მეფე ბაყაშას შორის მთელი მათი სიცოცხლის მანძილზე.

¹⁷და გავიდა ისრაელის მეფე — ბაყაშა იუდას წინააღმდეგ და იწყო რამას შენება, რათა არავინ გამოეშვა ასასგან, იუდას მეფისგან, და არავინ შეეშვა მასთან.

¹⁸და აიღო ასამ მთელი ოქრო-ვერცხლი, რაც კი უფლის ტაძრის საგანძურსა და სამეფო სახლის საგანძურებში იყო დარჩენილი და ხელში მისცა თავის მსახურთ, და გააგზავნა ისინი მეფე ასამ ბენ-ჰადადთან, ხეზიონის ძის, ტაბრიმონის ძესთან, არამის მეფესთან, დამასკოში რომ ცხოვრობდა, და შეუთვალა:

¹⁹იყოს კავშირი მე და შენს შორის, როგორც იყო მამაჩემსა და მამაშენს შორის; აჰა, გიგზავნი ძღვნად ოქრო-ვერცხლს; გაწყვიტე კავშირი ბაყაშასთან, ისრაელის მეფესთან, რათა ჩამომეხსნას.

²⁰და დაუჯერა ბენ-ჰადადმა მეფე ასას, და გაგზავნა თავისი მხედართმთავრები ისრაელის ქალაქთა წინააღმდეგ. და დალაშქრა ყიონი, დანი, აბელ-ბეთ-მაყაქა, მთელი ქინერეთი და ნაფთალის მთელი მხარე.

²¹ეს რომ შეიტყო ბაყაშამ, შეწყვიტა რამას შენება და თირცაში დაბრუნდა.

²²და მოუხმო მეფე ასამ უკლებლივ მთელს იუდას და გაზიდეს რამას ქვები და ხე-ტყე, რასაც სამშენებლოდ იყენებდა ბაყაშა. და ააშენა ამით მეფე ასამ ბენიამინის გებაყი და მიცფა.

²³ასას ყველა დანარჩენი საქმეები და ყველა მისი გმირობა და ყველაფერი, რაც გააკეთა, ქალაქები რომ ააშენა, იუდას მეფეთა მატიანეშია ჩაწერილი, გარდა იმისა, რომ სიბერეში ფეხები სტკიოდა.

²⁴განისვენა ასამ თავის მამებთან და დაიმარხა მათ გვერდით დავითის, მამამისის ქალაქში. და მის ნაცვლად მისი ძე — იოშაფატი გამეფდა.

²⁵ისრაელზე იერობოყამის ძე ნადაბი გამეფდა ასას, იუდას მეფის მეორე წელს, და ორი წელი მეფობდა ისრაელზე.

²⁶ცუდს აკეთებდა იგი უფლის თვალში, და მიჰყვებოდა მამამისის გზას და მის ცოდვებს, და ისრაელსაც აცდუნებდა.

²⁷აუჯანყდა მას ბაყაშა, ახიას ძე, ისაქარის სახლის შვილი, და მოკლა იგი ბაყაშამ ფილისტიმის გიბეთონში, როცა ნადაბი და მთელი ისრაელი გიბეთონს ედგნენ ალყად.

²⁸მოკლა იგი ბაყაშამ იუდას მეფე ასას მეფობის მესამე წელს და მის ნაცვლად გამეფდა.

²⁹გამეფდა თუ არა, მუსრი გაავლო იერობოყამის მთელ სახლს. ცოცხალი არავინ დაუტოვა იერობოყამს, ვიდრე მთლიანად არ გაანადგურა, უფლის სიტყვისამებრ, როგორც მან თავისი მსახურის, შილოელი ახიას პირით ბრძანა,

³⁰იერობოყამის ცოდვების გამო, თვითონ რომ შესცოდა და ისრაელიც აცდუნა, როცა გულისწყრომით აავსო უფალი, ისრაელის ღმერთი.

³¹ნადაბის დანარჩენი საქმენი, ყველაფერი, რაც მან გააკეთა, ისრაელის მეფეთა მატიანეში არის ჩაწერილი.

³²და გამუდმებული ომი იყო ასასა და ისრაელის მეფეს, ბაყაშას შორის.

³³იუდას მეფე ასას მეფობის მესამე წელს გამეფდა ბაყაშა, ახიას ძე მთელს ისრაელზე თირცაში და 24 წელი იმეფა.

³⁴ბოროტებას სჩადიოდა უფლის თვალში, მიჰყვებოდა იერობოყამის გზას და მის ცოდვებს, და ისრაელსაც აცდუნებდა.