Read ქართული ბიბლია, სრული ვერსია 1 Kings 4 Bible Online

1 Kings 4 - ქართული ბიბლია, სრული ვერსია bible

1 Kings 4

¹და მეფობდა სოლომონი მთელს ისრაელზე.

²და ესენი არიან მისი მთავრები: ცადოკ მღვდლის ძე ყაზარია;

³ელიხორეფი და ახია, შიშას ძენი — მწიგნობრები; იოშაფატ ახილუდის ძე — მემატიანე;

⁴ბენაია იეჰოიადაყის ძე — მხედართმთავარი; ცადოკი და აბიათარი — მღვდლები;

⁵ყაზარია ნათანის ძე — მოურავთა ზედამხედველი, ზაბუდ ნათანის ძე — მღვდელი, მეფის მეგობარი;

⁶ახიშარი — სასახლის ზედამხედველი, ადონირამ ყაბდას ძე — ხარკის განმგებელი.

⁷12 მოურავი ჰყავდა სოლომონს მთელს საისრაელოში, ისინი სარჩოთი ამარაგებდნენ მეფესა და მის სახლს. თითოეული წელიწადში ერთი თვის მანძილზე უზიდავდა სარჩოს.

⁸აი მათი სახელები: ბენ-ხური — ეფრემის მთაზე;

⁹ბენ-დეკერი — მაკაცსა და შაყალბიმში, ბეთ-შემეშში, ელონსა და ბეთ-ხანანში;

¹⁰ბენ-ხესედი — არუბოთში. მისი იყო სოქო და ხეფერის მთელი მხარე;

¹¹ბენ-აბინადაბი — მთელს ნაფათ-დორზე. სოლომონის ასული, ტაფათი ჰყავდა ცოლად.

¹²ბაყანა ახილუდის ძე — თაყანაქსა და მეგიდოში და მთელს ბეთ-შეანში, ცართანთან ახლოს რომ არის, იზრეყელის ქვემოთ, ბეთ-შეანიდან ვიდრე აბელ-მეხოლამდე და თვით იოკმეყამის გაღმა მხარემდე.

¹³ბენ-გებერი — გალაადის რამოთში. მისი იყო შენები იაირისა, მანაშეს ძისა, გალაადსა და არგობის მხარეში, ბაშანში რომ არის; 60 დიდი ქალაქი, გალავნიანი და ბრინჯაოს საკეტებიანი.

¹⁴ახინადაბ ყიდოს ძე — მახანაიმში;

¹⁵ახიმაყაცი — ნაფთალის მხარეში. მასაც სოლომონის ასული, ბასემათი ჰყავდა ცოლად.

¹⁶ბაყანა, ხუშაის ძე — აშერსა და ბეყალოთში.

¹⁷იოშაფატი, ფარუახის ძე — ისაქარში.

¹⁸შიმეყი, ელას ძე — ბენიამინის მხარეში.

¹⁹გებერი, ხურის ძე — გალაადის ქვეყანაში, სიხონის, ამორეველთა მეფის, ქვეყანაში, და ყოგის, ბაშანის მეფის, ქვეყანაში. მხოლოდ ერთი მოურავი იყო ამ ქვეყანაში.

²⁰მაგრამ ზღვის ქვიშასავით მრავალრიცხოვანი იყო იუდა და ისრაელი. ჭამდნენ, სვამდნენ და ხარობდნენ.

²¹და ეპყრა სოლომონს ყველა სამეფო მდინარე ევფრატიდან ფილისტიმელთა ქვეყნამდე და ეგვიპტის საზღვრამდე. და უგზავნიდნენ ძღვენს და ემორჩილებოდნენ სოლომონს მთელს მის სიცოცხლეში.

²²სოლომონის ყოველდღიური სარჩო იყო: 30 ქორი გამტკიცული ფქვილი და 60 ქორი შერეული ფქვილი,

²³10 ზუარაკი და 20 ნაიალაღარი ხარი, 100 ცხვარი; ამას გარდა ნანადირევი ირმები და ქურციკები, არჩვები და ნაკვები შინაური ფრინველები.

²⁴რადგან ის ბატონობდა მდინარე ევფრატის მთელს გამოღმა მხარეზე, თიფსახიდან ღაზამდე, და ევფრატის გამოღმელ ყველა მეფეზე; და მშვიდობიანად იყო ირგვლივ ყველა ქვეყანასთან.

²⁵უშიშრად ცხოვრობდა სოლომონის დროს იუდა და ისრაელი თავისი ვაზის ხეივნებისა და ლეღვის ჩრდილებში, დანიდან ბეერ-შებაყამდე.

²⁶და ჰქონდა სოლომონს 4 ათასი თავლა ეტლის ცხენებისათვის და სადგომი 12 ათასი მხედრისათვის.

²⁷და ამარაგებდნენ ის მოურავები მეფე სოლომონს ყოველივეთი, რაც საჭირო იყო მისი სუფრისთვის, თითოეული თავის განკუთვნილ თვეში, და არაფერს აკლებდნენ.

²⁸მოჰქონდათ ქერი და თივა ცხენებისთვის და ბედაურებისთვის, თითოეულს მისთვის მიჩენილ ადგილას.

²⁹და მისცა ღმერთმა სოლომონს სიბრძნე, დიდი ჭკუა და ზღვის სანაპიროს ქვიშასავით ვრცელი გონება.

³⁰სოლომონის სიბრძნე აღემატებოდა აღმოსავლეთის ბრძენთა მთელ სიბრძნეს და ეგვიპტელთა მთელ სიბრძნეს.

³¹ყველა ადამიანზე ბრძენი იყო იგი: ეთან ეზრახელზე, ჰემანზე, ქალქოლზე და დარდაყ მახოლის ძეზე; და განითქვა მისი სახელი ყველა ხალხში, ვინც კი ირგვლივ სახლობდა;

³²მან წარმოთქვა 3 ათასი იგავი და შეთხზა 1005 გალობა.

³³ლაპარაკობდა ხეებზე — ლიბანის კედრიდან დაწყებული უსუპამდე, კედელზე რომ იზრდება; ლაპარაკობდა ცხოველებსა და ფრინველებზე, ქვემძრომებსა და თევზებზე.

³⁴მოდიოდა ყველა ჯურის ხალხი სოლომონის სიბრძნის მოსასმენად, ქვეყნის ყველა სამეფოდან, ვისაც კი გაგონილი ჰქონდა მისი სიბრძნის ამბავი.