Read ქართული ბიბლია, სრული ვერსია 1 Kings 6 Bible Online

1 Kings 6 - ქართული ბიბლია, სრული ვერსია bible

1 Kings 6

¹ისრაელიანთა ეგვიპტიდან გამოსვლის ოთხასმეოთხმოცე წელს, ისრაელზე სოლომონის მეფობის მეოთხე წელს, ზივის თვეში, რომელიც არის მეორე თვე, სოლომონი შეუდგა უფლის ტაძრის შენებას.

²სახლი, რომელსაც სოლომონი უშენებდა უფალს, სიგრძით 60 წყრთა იყო, სიგანით — 20 წყრთა, სიმაღლით — 30 წყრთა.

³ტაძრის წინა დერეფანი სიგრძით 20 წყრთა იყო, ტაძრის სიგანის შესაბამისად, ხოლო სიგანე — ათი წყრთა.

⁴და გაუკეთა სახლს ცხაურიანი, ყრუ სარკმლები.

⁵მიადგა სახლის კედლებს ირგვლივ სართულები, ტაძრისა და დაბირის ირგვლივ კედელი შემოარტყა და მის მთელს სიგრძეზე სენაკები ჩააშენა.

⁶ქვედა სართული ხუთი წყრთა იყო სიგანით, შუა — ექვსი წყრთა სიგანით, ხოლო მესამე — შვიდი წყრთა სიგანით, რადგან სახლს ირგვლივ შვერილი კოჭები ჰქონდა გარედან დატანებული, რომ სახლის კედლებს ხარაჩოები არ მიჰკარებოდა.

⁷სახლს ზოდებად მოჭრილი ქვით აშენებდნენ. შენებისას არც ჩაქუჩის, არც კვერის და არც სხვა რაიმე რკინის იარაღის ხმა არ ისმოდა შენებისას.

⁸შუა სართულზე ასასვლელი სახლს მარჯვენა ფრთაზე ჰქონდა. დახვეული კიბით ადიოდნენ შუამდე და შუადან — მესამეზე.

⁹და დაასრულა ტაძრის შენება და კედარის ფიცრითა და კოჭებით გადახურა სახლი.

¹⁰სართულები მიუშენა მთელ ტაძარს, თითო ხუთი წყრთის სიმაღლისა, და კედარის ძელებით მიამაგრა სახლს.

¹¹და გამოეცხადა სოლომონს უფლის სიტყვა და უთხრა:

¹²„აჰა, შენ აშენებ ამ სახლს; და თუ ივლი ჩემს წესზე და ჩემს სამართალს გააჩენ, დაიცავ და გაჰყვები ჩემს ბრძანებებს, მაშინ შეგისრულებ სიტყვას, რომელიც დავითს, მამაშენს მივეცი,

¹³და დავმკვიდრდები ისრაელიანთა შორის და არ მივატოვებ ჩემს ერს, ისრაელს.“

¹⁴და აგებდა სოლომონი სახლს და დაასრულა იგი.

¹⁵კედარის ფიცრებით მოაპირკეთა სახლის კედლები შიგნიდან — იატაკიდან ჭერამდე; ლამფა ხისა გააკრა და იატაკი კვიპაროსის ფიცრისა დააგო.

¹⁶ტაძრის უკანა მხარეს, გვერდითი კედლიდან ოც წყრთაზე გააკეთა შუა კედელი, და ააკრა კედლებსა და ჭერს კედარის ფიცარი და განაკუთვნა იგი დაბირისთვის, წმიდათა წმიდისათვის.

¹⁷40 წყრთა იყო სახლი, ანუ ტაძრის ნაწილი დაბირის წინ.

¹⁸სახლის შიგნით, კედარის ფიცრებზე კიტრები და გაშლილი ყვავილები იყო ამოჩუქურთმებული. იქ ყველაფერი კედრით იყო დაფარული, ქვა არ ჩანდა.

¹⁹შუა სახლში მოაწყო დაბირი, რომ იქ უფლის აღთქმის კიდობანი დაედგა.

²⁰დაბირის სიგრძე 20 წყრთა იყო, სიგანე — 20 წყრთა, სიმაღლე — 20 წყრთა. წმიდა ოქროთი მოჭედა იგი, ოქროთივე მოჭედა კედარის სამსხვერპლო.

²¹და მოჭედა შიგნიდან სახლი წმიდა ოქროთი სოლომონმა, და გადაჭიმა ოქროს ჯაჭვები დაბირის წინ, რომელიც ოქროთი მოჭედა.

²²სახლი მთლიანად ოქროთი მოჭედა, სახლი და მთელი სამსხვერპლო, დაბირის წინ რომ იდგა, ოქროთი მოჭედა

²³და გააკეთა დაბირში ორი ქერუბიმი ზეთისხილის ხისგან, სიმაღლით თითოეული ათი წყრთა იყო.

²⁴ერთი ფრთა ხუთი წყრთა ჰქონდა ქერუბიმს, მეორე ფრთაც ხუთი წყრთა. ათი წყრთა იყო ერთი ფრთის ბოლოდან მეორე ფრთის ბოლომდე.

²⁵ათი წყრთა იყო მეორე ქერუბიმიც. ორივე ქერუბიმს ერთი ზომა და ერთი სახე ჰქონდა.

²⁶ერთი ქერუბიმის სიმაღლე ათი წყრთა იყო, ასევე მეორე ქერუბიმისაც.

²⁷დადგა ქერუბიმები შიდა სახლის შუაგულში. გაშლილი ჰქონდათ ფრთები ქერუბიმებს, ერთი ქერუბიმის ფრთა ერთ კედელს სწვდებოდა, მეორე ქერუბიმისა — მეორე კედელს, ხოლო სახლის შუაგულისკენ მიმართული მათი ფრთები ერთმანეთს ეხებოდნენ.

²⁸ოქროთი მოჭედა ქერუბიმები.

²⁹სახლის მთელს კედლებზე ირგვლივ — შიგნიდან და გარედან, ქერუბიმების, ფინიკის ხეებისა და გაშლილი ყვავილების გამოსახულებანი ამოაჩუქურთმა.

³⁰სახლის იატაკიც ოქროთი მოჭედა, შიგნითაც და გარეთაც.

³¹დაბირში შესასვლელად გააკეთა ზეთისხილის ხის კარედი, რომლის ჩარჩო და წირთხლები კედლის სიმაღლის მეხუთედი იყო.

³²ზეთისხილის ხის ორ კარედზე ქერუბიმები, ფინიკის ხეები და გაშლილი ყვავილები ამოაჩუქურთმა და ოქროთი მოჭედა. მოჭედა ქერუბიმებიც და ფინიკის ხეებიც.

³³ტაძრის შესასვლელთანაც ასევე გააკეთა ზეთისხილის ხის ოთხკუთხა წირთხლები.

³⁴და კვიპაროსის ხის ორი კარედი. ერთი კარედის ორივე ფრთა იკეცებოდა, მეორე კარედის ორივე ფრთაც იკეცებოდა.

³⁵და ამოაჩუქურთმა ქერუბიმები, ფინიკის ხეები და გაშლილი ყვავილები და ოქროთი დაფერა ჩუქურთმის ღარები.

³⁶და მოაწყო შიდა ეზო სამი წყება თლილი ქვისა და ერთი წყება კედარის ძელებისაგან.

³⁷მეოთხე წელს, ზივის თვეში ჩაყარეს უფლის ტაძრის საძირკველი.

³⁸მეთერთმეტე წელს, ბულის თვეში, რომელიც არის მერვე თვე, გაასრულა სახლი ყოველი წესისა და რიგის მიხედვით. შვიდ წელიწადს აშენებდა სახლს.