Read ქართული ბიბლია, სრული ვერსია 1 Kings 9 Bible Online

1 Kings 9 - ქართული ბიბლია, სრული ვერსია bible

1 Kings 9

¹როცა დაასრულა სოლომონმა უფლის ტაძრისა და მეფის სახლის შენება და ყველაფერი, რისი გაკეთებაც სურდა,

²მეორედ გამოეცხადა უფალი სოლომონს, როგორც გიბეონში გამოეცხადა.

³და უთხრა უფალმა: „შევისმინე შენი ლოცვა-ვედრება, რომ მევედრებოდი. მე ვაკურთხე ეს სახლი, შენ რომ ააშენე ჩემი სახელის დასამკვიდრებლად უკუნისამდე. ჩემი თვალი და გული სამარადჟამოდ აქ იქნება.

⁴შენ კი, თუ ივლი ჩემს წინაშე, როგორც მამაშენი, დავითი დადიოდა წმიდა გულითა და სიმართლით, ყველაფერს აღასრულებ, რაც ნაბრძანები მაქვს შენთვის, დაიცავ ჩემს წესს და სამართალს,

⁵მაშინ მე განვამტკიცებ შენს ტახტს ისრაელში საუკუნოდ, როგორც დავითისთვის, მამაშენისთვის მითქვამს: არ დაილევა-მეთქი შენგან ისრაელის ტახტზე მჯდომელი.

⁶მაგრამ თუ განმიდგებით თქვენ და თქვენი შვილები, არ დაიცავთ ჩემს ბრძანებებს და წესებს, მე რომ მოგეცით, შეუდგებით უცხო ღმერთებს და თაყვანს სცემთ მათ,

⁷მაშინ მე აღვგვი ისრაელს იმ მიწის პირისგან, რომელიც მას მივეცი, მოვიშორებ სახლს, რომელიც ჩემს სახელზე ვაკურთხე, და ისრაელი სხვა ხალხების საიგავო და დასაცინი გახდება.

⁸ყველა, ვინც ჩაუვლის ამ მაღალ სახლს, შეძრწუნდება და დაუსტვენს და იტყვის: ასე რატომ მოექცაო უფალი ამ ქვეყანას და ამ ტაძარს?

⁹და ეტყვიან: ‘იმად, რომ დაივიწყეს უფალი, თავიანთი ღმერთი, რომელმაც ეგვიპტიდან გამოიყვანა მათი მამები, სხვა ღმერთებს მოეჭიდნენ, და თაყვანს მათ სცემდნენ და ემსახურებოდნენ, — ამიტომ დააწია უფალმა ყველა ეს უბედურება.’“

¹⁰20 წლის თავზე დაასრულა სოლომონმა ორი სახლის — უფლის ტაძრისა და მეფის სახლის — შენება,

¹¹მშენებლობისთვის ხირამი, ცორის მეფე, უგზავნიდა სოლომონს კედარისა და კვიპაროსის ხე-ტყეს და ოქროს, მისი სურვილისამებრ. და მისცა მეფე სოლომონმა ხირამს 20 ქალაქი გალილეის მხარეში.

¹²გავიდა ხირამი ცორიდან სოლომონის მიცემული ქალაქების სანახავად და არ მოეწონა ისინი.

¹³და თქვა: „ეს რა ქალაქები მოგიცია, ძმაო?“ და უწოდა მათ ქაბულის ქვეყანა; და ასე ეწოდება მათ დღემდე.

¹⁴და მოართვა ხირამმა მეფეს 120 ტალანტი ოქრო.

¹⁵ეს არის სოლომონ მეფისგან დაწესებული ბეგარა უფლის ტაძრის, თავისი სახლის, მილოს, იერუსალიმის კედლის, ხაცორის, მეგიდოს და გეზერის შენებისთვის.

¹⁶და ამოვიდა ფარაონი, ეგვიპტის მეფე, აიღო გეზერი და გადაწვა ცეცხლით. და ამოხოცა ქანაანელები, ქალაქში მცხოვრებნი, ხოლო იგი მზითევში მისცა თავის ასულს, სოლომონის ცოლს.

¹⁷და ააშენა სოლომონმა გეზერი და ქვემო ბეთ-ხორონი,

¹⁸ბაყალათი, თამარი ქვეყნის უდაბნოში,

¹⁹სამარაგო ქალაქები, რომლებიც კი სოლომონს ჰქონდა, მეეტლეთა ქალაქები, მხედრიონთა ქალაქები, და ყველაფერი, რისი აშენებაც სურდა იერუსალიმსა და ლიბანში, და მთელ თავის სამფლობელოში.

²⁰მთელი ხალხი, ვინც კი დარჩა ამორეველთაგან, ხეთელთაგან, ფერიზელთაგან, ხიველთაგან და იებუსელთაგან, რომელიც არ იყო ისრაელიანთა მოდგმისა,

²¹მათი შთამომავლები, მათს შემდეგ რომ დარჩნენ ქვეყანაში და არ გაუწყვეტიათ ისრაელიანთ, ბეგარაზე მომუშავეებად განაწესა სოლომონმა და ასე არიან დღემდე.

²²ისრაელიანთაგან არავისთვის დაუდვია სოლომონს ბეგარა, რადგან მეომრებად ჰყავდა ისინი, თავის მსახურებად, მეთაურებად და მხედართმთავრებად, თავისი ეტლებისა და მხედრობის მეთაურებად.

²³550 კაცი ჰყავდა სოლომონს სამუშაოების ზედამხედველებად, რომელნიც უძღვებოდნენ მუშა ხალხს.

²⁴ფარაონის ასული ავიდა დავითის ქალაქიდან თავის სახლში, რომელიც აუშენა მას სოლომონმა; შემდეგ ააშენა მან მილო.

²⁵წელიწადში სამჯერ სწირავდა სოლომონი სრულადდასაწველ და სამშვიდობო მსხვერპლს სამსხვერპლოზე, რომელიც უფალს აუშენა, და იქვე აკმევდა საკმეველს უფლის წინაშე. და ასე დასრულდა სახლის შენება.

²⁶ხომალდი ააგო მეფე სოლომონმა ყეციონ-გებერში, ელოთთან რომ არის, მეწამული ზღვის ნაპირას, ედომის ქვეყანაში.

²⁷და გაგზავნა ხირამმა ხომალდით თავისი მსახურნი, ხომალდის ოსტატები, ზღვის მცოდნენი სოლომონის მსახურებთან ერთად;

²⁸და მივიდნენ ისინი ოფირში და წამოიღეს იქიდან 420 ტალანტი ოქრო და მოართვეს მეფე სოლომონს.