Read ქართული ბიბლია, სრული ვერსია 2 Kings 12 Bible Online

2 Kings 12 - ქართული ბიბლია, სრული ვერსია bible

2 Kings 12

¹იეჰუს მეშვიდე წელს გამეფდა იეჰოაში და 40 წელი იმეფა იერუსალიმში. დედამისი იყო ციბია ბეერ-შებაყიდან.

²სწორედ იქცეოდა უფლის თვალში იეჰოაში მთელი თავისი სიცოცხლე, სანამ მღვდელი იეჰოიადაყი მოძღვრავდა მას.

³ოღონდ გორაკები არ ყოფილა გაუქმებული. კვლავაც იქ სწირავდა ხალხი მსხვერპლს და აკმევდა საკმეველს.

⁴და უთხრა იეჰოაშმა მღვდლებს: „მთელი ფული, რაც შეიწირება უფლის ტაძრისადმი — ფული თითოეული ასაკსრული კაცისა, რომელიც უკვე სულად ირაცხება, და ფული, რომელსაც გამოიმეტებს კაცის გული უფლის ტაძრისათვის,

⁵აიღონ მღვდლებმა თავისთვის თავ-თავისი ნაცნობებისაგან და შეაკეთონ ტაძარში ყველაფერი, რასაც შესაკეთებელს აღმოაჩენენ.“

⁶და როცა მეფე იეჰოაშის ოცდამესამე წელს მაინც არ ჰქონდათ შეკეთებული მღვდლებს ყველაფერი, რაც შესაკეთებელი იყო უფლის სახლში,

⁷დაუძახა მეფე იეჰოაშმა იეჰოიადაყ მღვდელს და სხვა მღვდლებს და უთხრა: „რატომ არ შეგიკეთებიათ სახლი? მეტად ნუღარ აიღებთ თქვენი ნაცნობებისგან ფულს, არამედ სახლის შესაკეთებლად მიეცით ის.“

⁸და შეთანხმდნენ მღვდლები, აღარ აეღოთ ვერცხლი სახლის შესაკეთებლად.

⁹და აიღო იეჰოიადაყ მღვდელმა ერთი კიდობანი, ზემოდან ნახვრეტი გაუკეთა და სამსხვერპლოს მარჯვნივ დადგა, საიდანაც უფლის სახლში შემოდიოდნენ. და მასში ყრიდნენ ზღურბლის მცველი მღვდლები უფლის სახლში შემოტანილ მთელ ფულს.

¹⁰და როცა ნახავდნენ, რომ ბევრი ფული დაგროვდა ყუთში, მოვიდოდნენ მეფის მწიგნობარი და მღვდელმთავარი, გადმოყრიდნენ და დაითვლიდნენ უფლის სახლში შეგროვებულ ფულს.

¹¹და ხელში აბარებდნენ დათვლილ ფულს სამუშაოთა მწარმოებლებს, რომელნიც უფლის სახლში იყვნენ განწესებულნი. და ესენი ურიგებდნენ დურგლებს და მშენებლებს — უფლის სახლში მომუშავეთ,

¹²ქვისმთლელებს და ქვითხუროებს. ყიდულობდნენ ხე-ტყეს და თლილ ქვას უფლის ტაძრის შესაკათებლად, და ყველაფერს, რაც გასამაგრებლად იყო საჭირო.

¹³ოღონდ უფლის ტაძრისთვის საჭირო ვერცხლის თასები, მაშები, სასხურებლები, საყვირები, ოქროსა და ვერცხლის ყოველგვარი ჭურჭელი არ მზადდებოდა უფლის სახლში შემოსული ფულით,

¹⁴რადგან სამუშაოთა მწარმოებლებს ეძლეოდათ, რომ ამით შეეკეთებინათ უფლის სახლი.

¹⁵და ანგარიშს არ სთხოვდნენ იმ პირებს, რომელნიც სამუშაოთა მწარმოებლებს აბარებდნენ ხელში ფულს, რადგან პატიოსნად იქცეოდნენ.

¹⁶დანაშაულის მსხვერპლის ფული და ცოდვის გამოსასყიდი ფული არ შემოდიოდა უფლის სახლში. მღვდლებს ეკუთვნოდა იგი.

¹⁷მაშინ გაემართა სალაშქროდ ხაზაელი, არამის მეფე, ომი დაიწყო გათის წინააღმდეგ და აიღო იგი. და იერუსალიმზე გალაშქრებაც განიზრახა ხაზაელმა.

¹⁸და აიღო იეჰოაშმა, იუდას მეფემ, მთელი შემოწირულობა, რაც შემოწირული ჰქონდათ ტაძრისთვის იოშაფატს, იორამს და ახაზიას, მის მამებს, იუდას მეფეებს, თავისი შემოწირულობაც და მთელი ოქროულობა, რაც კი მოიპოვებოდა უფლის სახლში და მეფის სახლის საგანძურებში, და გაუგზავნა ხაზაელს, არამის მეფეს. და ისიც გაეცალა იერუსალიმს.

¹⁹იოაშის დანარჩენი საქმენი, ყველაფერი, რაც გააკეთა, იუდას მეფეთა მატიანეშია ჩაწერილი.

²⁰და აღდგნენ მისი მსახურნი და შეითქვნენ მის წინააღმდეგ, და მოკლეს იოაში მილოს სახლში, სილას ჩასავალთან.

²¹მისმა მსახურებმა, იოზაქარ შიმეყათის ძემ და იეჰოზაბად შომერის ძემ მოკლეს იგი. და მოკვდა და დამარხეს მის მამათა გვერდით, დავითის ქალაქში. და მის ნაცვლად მისი ძე, ამაცია გამეფდა.