Read ქართული ბიბლია, სრული ვერსია 2 Kings 13 Bible Online

2 Kings 13 - ქართული ბიბლია, სრული ვერსია bible

2 Kings 13

¹იუდას მეფის, იოაშ ახაზიას ძის ოცდამესამე წელს გამეფდა იეჰოახაზ იეჰუს ძე ისრაელზე სამარიაში და იმეფა 17 წელი.

²ბოროტებას ჩადიოდა უფლის თვალში და მიჰყვებოდა იერობოყამ ნებატის ძის ცოდვების კვალს, რომელმაც აცდუნა ისრაელი, და არ განრიდებია მათ.

³და აღეგზნა უფლის რისხვა ისრაელიანთა მიმართ და ჩაყარა ისინი არამის მეფის, ხაზაელისა და ხაზაელის ძის, ბენ-ჰადადის ხელში დიდი ხნით.

⁴და შეევედრა იეჰოახაზი უფალს და უსმინა მას უფალმა, რადგან დაინახა ისრაელიანთა გასაჭირი, თუ როგორ აჭირვებდა მათ არამის მეფე.

⁵და მისცა უფალმა ისრაელს მხსნელი, და დააღწიეს თავი არამის ბატონობას, და იწყეს ცხოვრება ისრაელიანთ თავ-თავის კარვებში, როგორც წინათ ცხოვრობდნენ.

⁶ოღონდ არ განრიდებიან იერობოყამის სახლის ცოდვებს, რომელმაც აცდუნა ისრაელი; მისდევდნენ მათ და აშერაც კვლავინდებურად იდგა სამარიაში.

⁷50 ცხენოსანი, 10 საომარი ეტლი და 10 ათასი ქვეითიღა შერჩა იეჰოახაზს, რადგან გაანადგურა მათი საომარი ძალები არამის მეფემ და მიწის მტვერივით გადათელა.

⁸იეჰოახაზის დანარჩენი საქმენი, ყველაფერი, რაც გააკეთა, და მისი გმირობანი ისრაელის მეფეთა მატიანეშია ჩაწერილი.

⁹და განისვენა იეჰოახაზმა თავის მამებთან, და დამარხეს იგი სამარიაში. და მის ნაცვლად მისი ძე, იოაში, გამეფდა.

¹⁰იუდას მეფე იოაშის ოცდამეჩვიდმეტე წელს გამეფდა იეჰოაშ იეჰოახაზის ძე ისრაელზე სამარიაში და 16 წელი იმეფა.

¹¹ბოროტებას იქმოდა უფლის თვალში; არ მიუტოვებია ცოდვები იერობოყამ ნებატის ძისა, რომელმაც აცდუნა ისრაელი, არამედ მისდევდა იმ ცოდვებს.

¹²იოაშის დანარჩენი საქმენი, ყველაფერი, რაც გააკეთა, მისი გმირობანი, იუდას მეფეს, ამაციას რომ ეომებოდა, ისრაელის მეფეთა მატიანეშია ჩაწერილი.

¹³და განისვენა იოაშმა თავის მამებთან, და დაჯდა მის ტახტზე იერობოყამი. და იოაში სამარიაში დაიმარხა ისრაელის მეფეთა გვერდით.

¹⁴და დასნეულდა ელისე და მოკვდა კიდეც იმ სენით. და ჩავიდა მასთან იოაში, ისრაელის მეფე, თავზე დასტიროდა და ეუბნებოდა: „ჩემო მამავ, ჩემო მამავ! ისრაელის ეტლო და მხედრობავ!“

¹⁵და უთხრა ელისემ: „აიღე მშვილდ-ისარი!“ მანაც აიღო მშვილდ-ისარი.

¹⁶და უთხრა ისრაელის მეფეს: „დაადე ხელი მშვილდს!“ მანაც დაადო ხელი. და ელისემ მეფის ხელზე დააწყო ხელები.

¹⁷და თქვა: „გააღე აღმოსავლეთის სარკმელი!“ და გააღო. და თქვა ელისემ: „სტყორცნე!“ და სტყორცნა. და თქვა: ძლევის ისარი უფლისაგან და ძლევის ისარი არამისკენ. სძლევ არამს აფეკში საბოლოოდ.

¹⁸თქვა: „აიღე ისრები!“ და აიღო. და უთხრა ისრაელის მეფეს: „დაჰკარი მიწას!“ სამგზის დაჰკრა მიწას და გაჩერდა.

¹⁹გაუბრაზდა ღვთისკაცი და უთხრა: „ხუთგზის ან ექვსგზის რომ დაგეკრა, საბოლოოდ სძლევდი არამს. ახლა სამგზის სძლევ არამს.“

²⁰და მოკვდა ელისე და დამარხეს იგი. და მოაბის ურდოები დაეცნენ ქვეყანას მომდევნო წლის დამდეგს.

²¹ერთხელ ვიღაც კაცს მარხავდნენ, და აჰა, როცა დაინახეს მარბეველნი, ჩააგდეს ეს კაცი ელისეს სამარხში; და როგორც კი შეეხო კაცი ელისეს ძვლებს, მყისვე გაცოცხლდა და ფეხზე წამოდგა.

²²ხაზაელი, არამის მეფე, აჭირვებდა ისრაელიანთ იეჰოახაზის მეფობის მთელს ხანში.

²³და შეიბრალა ისინი უფალმა და შეიწყალა, და მოხედა მათ აბრაამთან, ისააკთან და იაკობთან დადებული აღთქმის გამო, და არ ინება მათი მოსპობა. და თავიდან არ მოუშორებია ისინი დღესაქამომდე.

²⁴და მოკვდა ხაზაელი, არამის მეფე, და მის ნაცვლად მისი ძე ბენ-ჰადადი გამეფდა.

²⁵და უკანვე დაიბრუნა იეჰოაშ იეჰოახაზის ძემ ბენ-ჰადად ხაზაელის ძისგან ქალაქები, რომლებიც ბრძოლით ჰქონდა წართმეული მისი მამის, იეჰოახაზისთვის. სამგზის სძლია მას იოაშმა და დაიბრუნა ისრაელის ქალაქები.