Read ქართული ბიბლია, სრული ვერსია 2 Kings 14 Bible Online

2 Kings 14 - ქართული ბიბლია, სრული ვერსია bible

2 Kings 14

¹ისრაელის მეფის, იოაშ იოახაზის ძის მეორე წელს გამეფდა ამაცია, იოაშის ძე, იუდას მეფე.

²25 წლისა იყო, როცა გამეფდა და 29 წელი იმეფა იერუსალიმში. დედამისი იყო იერუსალიმელი იეჰოყადინი.

³სწორად იქცეოდა უფლის თვალში, ოღონდ არა ისე, როგორც მისი წინაპარი დავითი. ყველაფერს ისე აკეთებდა, როგორც მამამისი იოაში.

⁴ოღონდ გორაკები არ იყო ჯერ კიდევ გაუქმებული. და გორაკებზე სწირავდა ხალხი მსხვერპლს და აკმევდა საკმეველს.

⁵და როცა განიმტკიცა მეფობა, დახოცა თავისი მსახურები, რომელთაც მოკლეს მეფე, მამამისი.

⁶მკვლელთა შვილები კი არ დაუხოცია, როგორც სწერია მოსეს რჯულის წიგნში, უფლის ბრძანებისამებრ: „არ უნდა დაისაჯონ სიკვდილით მამები შვილთა გამო, და შვილები მამათა გამო არ უნდა დაისაჯონ სიკვდილით, არამედ თითოეული თავისი დანაშაულისათვის უნდა დაისაჯოს სიკვდილით.“

⁷მან სძლია 10 ათას ედომელს მარილოვან ველზე და ბრძოლით აიღო სელაყი და სახელად უწოდა იოკთეელი, როგორც დღევანდლამდე რჩება.

⁸მაშინ გაუგზავნა ამაციამ მოციქულები ისრაელის მეფეს, იეჰოაშს, იეჰუს ძის იეჰოახაზის ძეს, და შეუთვალა: „მოდი, პირისპირ შევხვდეთ.“

⁹და შეუთვალა იეჰოაშმა, ისრაელის მეფემ, ამაციას, იუდას მეფეს: „ლიბანის ძეძვის ბუჩქმა შეუთვალა ლიბანის კედარს: ‘ცოლად მიათხოვეო შენი ასული ჩემს ვაჟს’; მაგრამ ჩაიარა ლიბანის მხეცმა და გადათელა ძეძვი.

¹⁰შენ დაგიმარცხებია ედომელნი და გადიდგულებულხარ. ღირსეულად გეჭიროს თავი და შენთვის იჯექი შინ. რატომ ტეხ შფოთს შენს საუბედუროდ? შენც დაეცემი და იუდაც — შენთან ერთად.“

¹¹მაგრამ ყური არ ათხოვა ამაციამ. მაშინ გამოვიდა იეჰოაში, ისრაელის მეფე, და შეხვდნენ პირისპირ ის და იუდას მეფე ამაცია ბეთ-შემეშთან, იუდაში რომ არის.

¹²და დამარცხდნენ იუდაელნი ისრაელიანებთან ბრძოლაში და თავიანთ კარვებში გაიფანტნენ.

¹³ხოლო იუდას მეფე ამაცია, ძე იეჰოაშისა, ახაზიას ძისა, შეიპყრო ისრაელის მეფე იეჰოაშმა ბეთ-შემეშში და მიადგა იერუსალიმს. დაანგრია იერუსალიმის კედელი ეფრემის კარიბჭიდან კუთხის კარიბჭემდე 400 წყრთის სიგრძეზე;

¹⁴და წაიღო მთელი ოქრო-ვერცხლი და მთელი ჭურჭელი, რაც კი უფლის ტაძრისა და მეფის სახლის საგანძურებში ინახებოდა, და წაასხა მძევლები და გაბრუნდა სამარიაში.

¹⁵იეჰოაშის დანარჩენი საქმენი, რაც გააკეთა, და გმირობანი, რომ ესხმოდა ამაციას, იუდას მეფეს, ისრაელის მეფეთა მატიანეშია ჩაწერილი.

¹⁶და განისვენა იეჰოაშმა თავის მამებთან და დაიმარხა სამარიაში ისრაელის მეფეთა გვერდით, და მის ნაცვლად მისი ძე იერობოყამი გამეფდა.

¹⁷ისრაელის მეფის, იეჰოაშ იეჰოახაზის ძის სიკვდილის შემდეგ 15 წელი იცოცხლა იუდას მეფე ამაცია იოაშის ძემ.

¹⁸ამაციას დანარჩენი საქმენი იუდას მეფეთა მატიანეშია ჩაწერილი.

¹⁹აუჯანყდნენ მას იერუსალიმში და მან თავი შეაფარა ლაქიშს. და მიუგზავნეს კაცები ლაქიშში და იქ მოკლეს.

²⁰და წამოასვენეს ცხენებით და დამარხეს იერუსალიმში თავისი მამების გვერდით, დავითის ქალაქში.

²¹გამოიყვანა იუდას მთელმა ხალხმა ყაზარია, 16 წლის ყმაწვილი, და მამამისის, ამაციას ნაცვლად გაამეფეს.

²²მან აღადგინა ელათი და კვლავ დაუბრუნა იუდას. მერე განისვენა მეფემ თავის მამებთან.

²³იუდას მეფის, იეჰოაშის ძის, ამაციას მეთხუთმეტე წელს გამეფდა იერობოყამი, იოაშის ძე, ისრაელის მეფე, სამარიაში და 41 წელი იმეფა.

²⁴ბოროტებას სჩადიოდა იგი უფლის თვალში და არ მიუტოვებია იერობოყამ ნებატის ძის ცოდვები, რომელმაც აცდუნა ისრაელი.

²⁵მან აღადგინა ისრაელის საზღვრები ხამათის ყელიდან ყარაბას ზღვამდე, როგორც ნათქვამი ჰქონდა უფალს, ისრაელის ღმერთს, თავისი მსახურის, გათ-ხეფერელი წინასწარმეტყველის, იონა ამითაის ძის პირით.

²⁶რადგან დაინახა უფალმა ისრაელის ძალზე მძიმე გაჭირვება. და არ დარჩენილა არც ყმა და არც აზატი, და არ ჰყავდა შემწე ისრაელს.

²⁷და არ ინება უფალმა ისრაელის სახსენებლის ამოძირკვა ცისქვეშეთიდან და იერობოყამ იოაშის ძის ხელით იხსნა იგი.

²⁸იერობოყამის დანარჩენი საქმენი და ყველაფერი, რაც გააკეთა და მისი გმირობანი, როგორ იბრძოდა და როგორ დაუბრუნა ისრაელს დამასკო და ხამათი, იუდას რომ ეჭირა, ისრაელის მეფეთა მატიანეშია ჩაწერილი.

²⁹და განისვენა იერობოყამმა თავის მამებთან, ისრაელის მეფეებთან, და მის ნაცვლად მისი ძე ზაქარია გამეფდა.