Read ქართული ბიბლია, სრული ვერსია 2 Kings 15 Bible Online

2 Kings 15 - ქართული ბიბლია, სრული ვერსია bible

2 Kings 15

¹ისრაელის მეფის, იერობოყამის, ოცდამეშვიდე წელს გამეფდა ყაზარია, იუდას მეფის, ამაციას ძე.

²16 წლისა იყო, რომ გამეფდა და 52 წელი იმეფა იერუსალიმში. დედამისი იყო იერუსალიმელი იექოლია.

³უფლის მოსაწონად იქცეოდა, ისევე როგორც მამამისი ამაცია.

⁴ოღონდ, გორაკები არ მოუსპია, და გორაკებზე სწირავდა მსხვერპლს ხალხი და აკმევდა საკმეველს.

⁵და დასაჯა უფალმა მეფე და სიკვდილამდე კეთროვანი იყო, და ცხოვრობდა განცალკევებულ სახლში. იოთამი, მეფის ძე, სასახლეს ზედამხედველობდა და განსჯიდა ქვეყნის ერს.

⁶ყაზარიას დანარჩენი საქმენი, ყველაფერი, რაც გააკეთა, იუდას მეფეთა მატიანეშია ჩაწერილი.

⁷და განისვენა ყაზარიამ თავის მამებთან და დამარხეს იგი თავის მამებთან დავითის ქალაქში. და მის ნაცვლად მისი ძე, იოთამი გამეფდა.

⁸იუდას მეფის, ყაზარიას ოცდამეთვრამეტე წელს იერობოყამის ძე ზაქარია გამეფდა ისრაელზე სამარიაში და ექვსი თვე იმეფა.

⁹ბოროტებას სჩადიოდა უფლის თვალში, როგორც მისი მამები აკეთებდნენ. და არ განრიდებია იერობოყამ ნებატის ძის ცოდვებს, რომელმაც აცდუნა ისრაელი.

¹⁰და აუჯანყდა მას შალუმი, იაბეშის ძე, დაჰკრა და მოკლა იგი, და გამეფდა მის ნაცვლად.

¹¹დანარჩენი, რაც ზაქარიაზე არის ნათქვამი, იხილე ისრაელის მეფეთა მატიანეში.

¹²ასეთი იყო უფლის სიტყვა, რომელიც მან იეჰუს გამოუცხადა: „მეოთხე თაობამდე ისხდებიან შენი ძენი ისრაელის ტახტზე.“ და ახდა კიდეც.

¹³შალუმ, იაბეშის ძე, გამეფდა იუდას მეფის, ყუზიას ოცდამეცხრამეტე წელს, და ერთ თვეს მეფობდა სამარიაში.

¹⁴და წამოვიდა მენახემი, თირცელი გადის ძე, და მოადგა სამარიას, და დაამარცხა შალუმი, იაბეშის ძე სამარიაში და მოკლა იგი, და გამეფდა მის ნაცვლად.

¹⁵შალუმის დანარჩენი საქმენი და მისი აჯანყების ამბავი, რომელიც მოაწყო, ისრაელის მეფეთა მატიანეშია ჩაწერილი.

¹⁶მაშინ მოსრა მენახემმა თიფსახი და ყველაფერი, რაც მასში იყო. და მოსრა მთელი მხარე თირცადან მოყოლებული, რადგან არ გააღეს კარიბჭეები. შუაზე გააპო ყველა ორსული ქალი.

¹⁷იუდას მეფის, ყაზარიას ოცდამეცხრამეტე წელს გამეფდა ისრაელის მეფე მენახემი, გადის ძე, და ათი წელი იმეფა სამარიაში.

¹⁸ბოროტებას სჩადიოდა უფლის თვალში, და არ განრიდებია მთელი თავისი სიცოცხლე იერობოყამ ნებატის ძის ცოდვებს, რომელმაც აცდუნა ისრაელი.

¹⁹და მოვიდა ქვეყანაში ფული, აშურის მეფე. და მისცა მენახემმა ფულს ათასი ტალანტი ვერცხლი, რათა ყოფილიყო მისი მფარველობის ქვეშ და მტკიცედ სჭეროდა ხელში მეფობა.

²⁰და დააკისრა მენახემმა ეს ვერცხლი ისრაელიანთ, ყველა შეძლებულ კაცს — ყოველ კაცზე 50 შეკელი ვერცხლი — აშურის მეფისთვის მისაცემად. და უკან გაბრუნდა აშურის მეფე, არ გაჩერებულა იმ მიწაზე.

²¹მენახემის დანარჩენი საქმენი, ყველაფერი, რაც გააკეთა, ისრაელის მეფეთა მატიანეშია ჩაწერილი.

²²და განისვენა მენახემმა თავის მამებთან. და მის ნაცვლად გამეფდა მისი ძე ფეკახია.

²³იუდას მეფის, ყაზარიას ორმოცდამეათე წელს გამეფდა ფეკახია, მენახემის ძე, ისრაელზე, სამარიაში და ორი წელი იმეფა.

²⁴ბოროტებას სჩადიოდა უფლის თვალში, და არ განრიდებია იერობოყამის, ნებატის ძის ცოდვებს, რომელმაც აცდუნა ისრაელი.

²⁵და აუჯანყდა მას ფეკახი, რემალიას ძე, მისი კარისკაცი, მიუხდა სამარიაში, სასახლის სიმაგრის წინ, არგობსა და არიესთან ერთად, თან 50 გალაადელი იახლა; მოკლა იგი და მის ნაცვლად გამეფდა.

²⁶ფეკახიას დანარჩენი საქმენი, ყველაფერი, რაც გაუკეთებია, ისრაელის მეფეთა მატიანეშია ჩაწერილი.

²⁷იუდას მეფის, ყაზარიას ორმოცდამეთორმეტე წელს გამეფდა ფეკახი რემალიას ძე, ისრაელზე სამარიაში და 20 წელი იმეფა.

²⁸და ბოროტებას სჩადიოდა უფლის თვალში, და არ განრიდებია ნებატის ძის — იერობოყამის ცოდვებს, რომელმაც აცდუნა ესრაელი.

²⁹ისრაელის მეფის, ფეკახის დროს მოვიდა თიგლათ-ფილესარი, აშურის მეფე, და აიღო ყიონი, აბელ-ბეთ-მაყაქა, იანოახი, კედეში, ხაცორი, გალაადი და გალილეა, მთელი ნაფთალის ქვეყანა და ტყვედ წაასხა აშურში.

³⁰და აუჯანყდა ჰოშეაყი, ელას ძე, ფეკახს, რემალიას ძეს, და სძლია და მოკლა, და გამეფდა მის ნაცვლად იოთამის, ყუზიას ძის მეოცე წელს.

³¹ფეკახის დანარჩენი საქმენი, ყველაფერი, რაც გაუკეთებია, ისრაელის მეფეთა მატიანეშია ჩაწერილი.

³²ისრაელის მეფის, ფეკახის, რემალიას ძის მეორე წელს გამეფდა იოთამი, ყუზიას ძე, იუდას მეფე.

³³25 წლისა იყო, როცა გამეფდა, და 16 წელი იმეფა იერუსალიმში. დედამისი იყო იერუშა, ცადოკის ასული.

³⁴უფლის მოსაწონად იქცეოდა, სწორედ ისე, როგორც მამამისი, ყუზია იქცეოდა.

³⁵ოღონდ გორაკები არ იყო გაუქმებული. ჯერაც გორაკებზე სწირავდა ხალხი მსხვერპლს და იქ აკმევდა საკმეველს. მან აღადგინა უფლის ტაძრის ზემო კარიბჭე.

³⁶იოთამის დანარჩენი საქმენი, ყველაფერი, რაც გაუკეთებია, იუდას მეფეთა მატიანეშია ჩაწერილი.

³⁷იმ დღეებში შეუჩინა უფალმა იუდას რეცინი, არამის მეფე, და ფეკახი, რემალიას ძე.

³⁸და განისვენა იოთამმა თავის მამებთან და დაიმარხა თავის მამათა გვერდით თავისი მამის, დავითის ქალაქში; და მის ნაცვლად მისი ძე ახაზი გამეფდა.