Read ქართული ბიბლია, სრული ვერსია 2 Kings 17 Bible Online

2 Kings 17 - ქართული ბიბლია, სრული ვერსია bible

2 Kings 17

¹იუდას მეფის, ახაზის მეთორმეტე წელს გამეფდა ჰოშეაყი, ელას ძე, ისრაელზე სამარიაში და ათი წელი იმეფა.

²ბოროტებას სჩადიოდა უფლის თვალში, თუმცა არც ისე, როგორც მისი წინამორბედი მეფეები ისრაელისა, მასზე უწინ რომ იყვნენ.

³მის წინააღმდეგ წამოვიდა შალმანესერი, აშურის მეფე, და გახდა ჰოშეაყი მისი მსახური და უხდიდა ხარკს.

⁴და შეამჩნია აშურის მეფემ ჰოშეაყში ღალატი, რადგან მოციქულებს უგზავნიდა იგი ეგვიპტის მეფე სოს, და ხარკს აღარ უხდიდა აშურის მეფეს ყოველწლიურად. და დაატუსაღა იგი აშურის მეფემ და საპყრობილეში ჩასვა.

⁵და წამოვიდა აშურის მეფე მთელ ქვეყანაზე, მოადგა სამარიას და სამ წელიწადს ალყაში ჰყავდა.

⁶ჰოშეაყის მეცხრე წელს აიღო აშურის მეფემ სამარია, და გადაასახლა ისრაელიანები აშურში, და დაასახლა ისინი ხალახსა და ხაბორში, მდინარე გოზანთან, და მიდიის ქალაქებში.

⁷და როცა შესცოდეს ისრაელიანთ უფალს, თავიანთ ღმერთს, რომელმაც გამოიყვანა ისინი ეგვიპტიდან და ეგვიპტელთა მეფის, ფარაონის ხელიდან, და თაყვანისცემა დაუწყეს უცხო ღმერთებს,

⁸და აჰყვნენ იმ ხალხთა ჩვეულებებს, რომელნიც აჰყარა უფალმა ისრაელთაგან, და ისრაელის მეფეთა ჩვეულებებს, როგორც ისინი იქცეოდნენ,

⁹და იწყეს უჯერო საქმეები ისრაელიანთ უფლის, თავიანთი ღმერთის მიმართ, და ააგეს გორაკები ყველა ქალაქში, საყარაულო გოდლიდან მოყოლებული გამაგრებულ ქალაქამდე,

¹⁰და დაიდგეს ქანდაკებები და აშერების ძეგლები ყველა მაღალ ბორცვზე და ყოველი დაბურული ხის ქვეშ,

¹¹და საკმეველს აკმევდნენ იქ, ყოველ გორაკზე, იმ ხალხთა მსგავსად, რომელნიც აჰყარა მათგან უფალმა, ბოროტებას იქმოდნენ უფლის გასარისხებლად,

¹²და ემსახურებოდნენ კერპებს, რაზეც ნაბრძანები ჰქონდა მათთვის უფალს: „ნუ გააკეთებთო ამას!“ —

¹³აფრთხილებდა უფალი ისრაელს და იუდას თავისი ყოველი წინასწარმეტყველისა და ყოველი მისნის პირით და ეუბნებოდა: „მოიქეცით თქვენი ბოროტი გზიდან, დაიცავით ჩემი მცნებები და წესები იმ რჯულის მიხედვით, რომელიც შთავაგონე თქვენს მამებს და რომელიც თქვენც გადმოგეცით ჩემს მსახურთა, წინასწარმეტყველთა პირით.“

¹⁴არ შეისმინეს და გაჯიუტდნენ მათი მამებივით, რომელთაც არ ირწმუნეს უფალი, თავიანთი ღმერთი;

¹⁵და შეიძულეს მისი წესები და მისი აღთქმა, რომელიც მან დაუდო მათ მამებს, და მისი გამოცხადებები, რითაც იგი აფრთხილებდა მათ. და მიჰყვნენ ამაოებას და თავადაც ამაონი გახდნენ. და წაბაძეს მეზობელ ხალხებს, რომლებზეც უბრძანა უფალმა, რომ არ მოქცეულიყვნენ მათ მსგავსად.

¹⁶და დაივიწყეს უფლის, თავიანთი ღმერთის მცნებები, და ჩამოასხეს ხბოს ორი გამოსახულება, და მოაწყვეს აშერა, და თაყვანს სცემდნენ ცის მხედრობას, და ბაყალს ემსახურებოდნენ,

¹⁷ცეცხლში ატარებდნენ თავიანთ ძეებსა და ასულებს, მკითხაობდნენ, მისნობდნენ და აღარ ერიდებოდნენ ბოროტის ქმნას უფლის თვალში მის გასარისხებლად.

¹⁸მაშინ დიდად განურისხდა უფალი ისრაელიანთ, და თავიდან მოიშორა ისინი. მხოლოდ ერთი იუდას ტომიღა შერჩა.

¹⁹არც იუდა იცავდა უფლის, თავისი ღმერთის მცნებებს და ისრაელიანთა წესებს მისდევდა, როგორც ისინი იქცეოდნენ.

²⁰და შეიძულა უფალმა ისრაელის მთელი მოდგმა, და მოდრიკა იგი, და მძარცველებს ჩაუგდო ხელში, ვიდრე საბოლოოდ არ მოიშორა თავიდან.

²¹და როცა მოწყდა ისრაელი დავითის სახლს და გაამეფეს იერობოყამ ნებატის ძე, მაშინ ჩამოაშორა იერობოყამმა ისრაელი უფალს და დიდად აცდუნა.

²²და დადიოდნენ ისრაელის ძენი იერობოყამის ცოდვებში, რომლებიც მას ჰქონდა ჩადენილი, და არ განრიდებიან მათ,

²³ვიდრე არ განირიდა უფალმა ისრაელი, როგორც ნათქვამი ჰქონდა თავის მსახურ წინასწარმეტყველთა პირით. და გადასახლებულია ისრაელი თავისი მიწიდან აშურში და დღემდეა იქ.

²⁴და გადმოიყვანა აშურის მეფემ ხალხი ბაბილონიდან, ქუთადან, ყავადან, ხამათიდან, სეფარვაიმიდან და ჩაასახლა სამარიის ქალაქებში ისრაელიანთა ნაცვლად. და დაიმკვიდრეს მათ სამარია და ცხოვრობდნენ მის ქალაქებში.

²⁵და რაკი არ ემორჩილებოდნენ უფალს იქ ცხოვრების პირველ ხანებში, უსევდა მათ უფალი ლომებს, რომლებიც მუსრს ავლებდნენ მათ.

²⁶და უთხრეს აშურის მეფეს: „ხალხმა, რომელიც შენ აჰყარე და სამარიის ქალაქებში ჩაასახლე, არ იცის იმ ქვეყნის ღმერთის წესი, ამიტომაც მან მიუსია მათ ლომები, რომლებიც მუსრს ავლებენ მათ.“

²⁷და ბრძანა აშურის მეფემ და თქვა: „გაგზავნეთ იქ ვინმე მღვდელი იმათგან, ვინც იქიდან გადაასახლეთ; წავიდეს და იცხოვროს იქ და ასწავლოს მათ იმ ქვეყნის ღმერთის წესი.“

²⁸და წავიდა ერთი მღვდელთაგანი, სამარიიდან გადასახლებული, და დაემკვიდრა ბეთელს და ასწავლიდა მათ, როგორ უნდა ეცათ თაყვანი უფლისათვის.

²⁹მაგრამ თავ-თავისი ღმერთები გაიკეთა თითოეულმა ხალხმა და დადგეს გორაკთა სახლებში, სამარიელებს რომ ჰქონდათ მოწყობილი. თითოეულმა ხალხმა თავ-თავის ქალაქში, სადაც ცხოვრობდნენ.

³⁰ბაბილონელებმა გააკეთეს სუქოთ-ბენოთი, ქუთელებმა — ნერგალი, ხამათელებმა — აშიმა,

³¹ყავიმელებმა გააკეთეს ნიბხაზი და თართაკი. ხოლო სეფარვაიმელნი ცეცხლში წვავდნენ თავიანთ შვილებს ადრამელექისთვის და ყანამელექისთვის — სეფარვაიმის ღმერთებისთვის.

³²და ეშინოდათ უფლისაც და გაიჩინეს გორაკთა მღვდლები, რომლებიც მათთვის მსახურობდნენ გორაკთა სახლებში.

³³უფლისაც ეშინოდათ და თავიანთ ღმერთებსაც ემსახურებოდნენ იმ ხალხთა ჩვეულებით, რომელთაგანაც გადმოასახლეს ისინი.

³⁴და დღევანდლამდე ძველი ჩვეულების თანახმად იქცევიან: უფლის არ ეშინიათ; არ მისდევენ იმ წესებს, კანონებს, რჯულსა და მცნებებს, უფალმა რომ დაუდგინა იაკობის შთამომავალთ, რომელთაც ისრაელი უწოდა სახელად.

³⁵და დაუდო უფალმა აღთქმა და ამცნო და უთხრა: „ნუ გეშინიათ უცხო ღმერთების, ნუ სცემთ თაყვანს, ნუ ემსახურებით და მსხვერპლს ნუ სწირავთ.

³⁶მარტოოდენ უფლისა გეშინოდეთ, რომელმაც დიდი ძალითა და აღმართული მკლავით გამოგიყვანათ ეგვიპტიდან, მას სცემდეთ თაყვანს და სწირავდეთ მსხვერპლს.

³⁷და დღენიადაგ იცავდეთ წესებს, მსჯავრს, რჯულსა და მცნებებს, რაც უფალმა დაგიწესათ, და უცხო ღმერთებისა ნუ გეშინიათ.

³⁸ნუ დაივიწყებთ აღთქმას, მე რომ დაგიდევით, და უცხო ღმერთებისა ნუ გეშინიათ.

³⁹მხოლოდ უფლის, თქვენი ღმერთის გეშინოდეთ და ის გიხსნით ყველა თქვენი მტრების ხელიდან.“

⁴⁰მაგრამ არ უსმინეს და წინანდებურად იქცეოდნენ. —

⁴¹ეს ხალხები უფალსაც მიაგებდნენ პატივს და, იმავდროს, კერპებსაც ემსახურებოდნენ; როგორც მამები იქცეოდნენ, ისე იქცევიან მათი შვილები და შვილიშვილები დღემდე.