Read ქართული ბიბლია, სრული ვერსია 2 Kings 21 Bible Online

2 Kings 21 - ქართული ბიბლია, სრული ვერსია bible

2 Kings 21

¹მანაშე 12 წლისა იყო, როცა გამეფდა; და 50 წელი იმეფა იერუსალიმში. დედამისი იყო ხეფციბა.

²ბოროტებას სჩადიოდა უფლის თვალში მსგავსად იმ ხალხების სიბილწისა, რომლებიც აჰყარა უფალმა ისრაელიანთაგან.

³და ისევ ააგო გორაკები, ხიზკიამ, მამამისმა რომ მოსპო; სამსხვერპლოები აღუმართა ბაყალს და მოაწყო აშერა, როგორც ახაბს, ისრაელის მეფეს ჰქონდა გაშენებული; თაყვანს სცემდა მთელს ციურ მხედრობას და ემსახურებოდა მათ.

⁴და ააშენა სამსხვერპლოები უფლის სახლში, რაზეც ნაბრძანები ჰქონდა უფალს: იერუსალიმში დავიდებო ჩემს სახელს.

⁵და აუშენა სამსხვერპლოები მთელ ციურ მხედრობას უფლის ტაძრის ორსავე ეზოში.

⁶და ცეცხლში გაატარა თავისი შვილი, და მკითხაობდა, მისნობდა და განაწესა მესულთანენი და მჩხიბავნი. და ბევრ უკუღმართობას აკეთებდა უფლის თვალში მის გასარისხებლად.

⁷და გააკეთა აშერას კერპი და დადგა სახლში, რომელზეც ეუბნებოდა უფალი დავითსა და მის ძეს სოლომონს: „ამ სახლში და იერუსალიმში, რომელიც მე ამოვირჩიე ისრაელის ყველა შტოდან, საუკუნოდ დავამკვიდრებ ჩემს სახელს;

⁸აღარ მოვაცვლევინებ ფეხს ისრაელს ამ მიწიდან, რომელიც მივეცი მის მამებს, ოღონდ მოიქცნენ ისე, როგორც ვუბრძანე, და თანახმად რჯულისა, მოსემ, ჩემმა მსახურმა რომ დაუწესა მათ.“

⁹მაგრამ არ ისმინეს, და აცდუნა ისინი მანაშემ და იმ ხალხებზე მეტ ბოროტებას იქმოდნენ, რომლებიც ამოწყვიტა უფალმა ისრაელიანთა სახის წინაშე.

¹⁰და ამბობდა უფალი თავის მსახურთა, წინასწარმეტყველთა პირით:

¹¹„იმის გამო, რომ მანაშემ, იუდას მეფემ, ეს სიბილწენი ჩაიდინა, გადააჭარბა ბოროტის ქმნაში ამორეველებს, მასზე უწინ რომ იყვნენ, და იუდაც აცდუნა თავისი კერპებით,

¹²ამიტომაც ასე ამბობს უფალი, ისრაელის ღმერთი: აჰა, ისეთ ბოროტებას დავატეხ იერუსალიმს და იუდას, რომ ყურები ჟუილს დაუწყებს იმის გამგონეს.

¹³სამარიის ლარს და ახაბის სახლის შვეულს გადავჭიმავ იერუსალიმზე, და პირწმინდად ამოვრეცხავ იერუსალიმს, როგორც ჯამს ამორეცხავს კაცი, ამორეცხავს და გადმოაპირქვავებს.

¹⁴და მივატოვებ ჩემი წილხვედრის ნარჩომს და მტრებს ჩავუგდებ ხელში, და საძარცვავად და დასატაცებლად შეიქმნებიან მათი მტრებისთვის.

¹⁵რადგან ბოროტებას იქმოდნენ ჩემს თვალში და მარისხებდნენ იმ დღიდან, რაც მათი მამები გამოვიდნენ ეგვიპტიდან, დღევანდლამდე.“

¹⁶და უბრალო სისხლიც ბევრი დაღვარა მანაშემ, იმდენი, რომ პირთამდე აავსო იერუსალიმი, გარდა იმ ცოდვისა, იუდა რომ აცდუნა და უფლის თვალში ბოროტი აკეთებინა.

¹⁷მანაშეს დანარჩენი საქმენი, ყველაფერი, რაც გაუკეთებია, მისი ცოდვები, რაც კი შეუცოდავს, იუდას მეფეთა მატიანეშია ჩაწერილი.

¹⁸და განისვენა მანაშემ თავის მამებთან და დაიმარხა თავისი სასახლის ბაღში, ყუზას ბაღში. და მის ნაცვლად მისი ძე ამონი გამეფდა.

¹⁹22 წლისა იყო ამონი, როცა გამეფდა, და ორი წელი იმეფა იერუსალიმში; დედამისი იყო მეშულემეთი, იოტბაელი ხარუცის ასული.

²⁰ბოროტებას სჩადიოდა უფლის თვალში, როგორც მამამისი, მანაშე იქცეოდა.

²¹და ყველაფერში იმ გზას ადგა, რომლითაც მამამისი დადიოდა, და ემსახურებოდა იმ კერპებს, რომელთაც მამამისი ემსახურებოდა და თაყვანს სცემდა;

²²და დაივიწყა უფალი, თავისი მამების ღმერთი, და უფლის გზით არ დადიოდა.

²³აუჯანყდნენ ამონს მისი მსახურები და საკუთარ სახლში მოკლეს მეფე.

²⁴მაგრამ ხალხმა დახოცა მეფე ამონის წინააღმდეგ აჯანყებულნი; და მის ნაცვლად მისი ძე, იოშია გაამეფა.

²⁵ამონის დანარჩენი საქმენი, რაც გაუკეთებია, იუდას მეფეთა მატიანეშია ჩაწერილი.

²⁶და დამარხეს იგი თავის სამარხში, ყუზას ბაღში; და მის ნაცვლად მისი ძე იოშია გამეფდა.