Read ქართული ბიბლია, სრული ვერსია 2 Kings 24 Bible Online

2 Kings 24 - ქართული ბიბლია, სრული ვერსია bible

2 Kings 24

¹მის დღეებში გამოვიდა ნაბუქოდონოსორი, ბაბილონის მეფე, და იყო იეჰოიაკიმი მისი მსახური სამი წლის მანძილზე. მერე კი კვლავ განუდგა.

²მიუსევდა ხოლმე მას უფალი ქალდეველთა, არამელთა, მოაბელთა და ყამონიანთა ურდოებს; უსევდა იუდას, რათა დაეღუპა იგი უფლის სიტყვისამებრ, როგორც ნაბრძანები ჰქონდა თავის მსახურთა, წინასწარმეტყველთა პირით.

³უფლის ბრძანებით მოეწეოდა ხოლმე ეს იუდას, რათა თავიდან მოეშორებინა იგი მანაშეს ცოდვების გამო, და ყოველივე იმისათვის, რაც მან ჩაიდინა.

⁴და იმ უდანაშაულოდ დაღვრილი სისხლის გამოც, რომლითაც აავსო იერუსალიმი. უფალმა არ ინება მისი პატიება.

⁵იეჰოიაკიმის დანარჩენი საქმენი, ყველაფერი, რაც გაუკეთებია, იუდას მეფეთა მატიანეშია ჩაწერილი.

⁶განისვენა იეჰოიაკიმმა თავის მამებთან და მის ნაცვლად იეჰოიაქინი, მისი ძე გამეფდა.

⁷და მეტად აღარ გამოსულა ეგვიპტის მეფე თავისი ქვეყნიდან, რადგან დაიპყრო ბაბილონის მეფემ ყველაფერი, რაც ეგვიპტელთა მეფეს ეკუთვნოდა, ეგვიპტის ნაღვარევიდან მდინარე ევფრატამდე.

⁸18 წლისა იყო იეჰოიაქინი, როცა გამეფდა, და სამი თვე იმეფა იერუსალიმში. დედამისი იყო ნეხუშთა, იერუსალიმელი ელნათანის ასული.

⁹ბოროტებას სჩადიოდა უფლის თვალში, მსგავსად მამამისისა.

¹⁰მაშინ დაიძრა ბაბილონის მეფის, ნაბუქოდონოსორის ლაშქარი იერუსალიმისაკენ და ქალაქი ალყაში მოექცა.

¹¹და მოადგა ბაბილონის მეფე ნაბუქოდონოსორი ქალაქს, როცა მის მოლაშქრეებს ალყაში ჰყავდათ ქალაქი მოქცეული.

¹²და გავიდა იეჰოიაქინი, იუდას მეფე, ბაბილონის მეფესთან, და გავიდნენ დედამისიც, მისი მსახურნიც და დიდებულნიც, და კარისკაცებიც, და წაიყვანა იგი ბაბილონის მეფემ თავისი მეფობის მერვე წელს.

¹³და გაზიდა იქიდან უფლის ტაძრის განძეული და მეფის სახლის განძეული, და დაამსხვრია მთელი ოქროს ჭურჭელი, რომელიც გააკეთა სოლომონმა, ისრაელის მეფემ უფლის ტაძარში.

¹⁴და გაასახლა მთელი იერუსალიმი, ყველა დიდებული, ყველა მამაცი მებრძოლი — 10 ათასი კაცი იყო გასახლებული — ყველა ხურო და მჭედელი; არავინ დარჩენილა, ქვეყნის ღარიბთა გარდა.

¹⁵და გადაასახლა იეჰოიაქინი ბაბილონს, და მეფის დედა, და მეფის ცოლები, და მისი საჭურისნი, და ძლიერნი ქვეყნისანი წაასხა იერუსალიმიდან ბაბილონში დასასახლებლად.

¹⁶ყველა მეომარი — 7 ათასი კაცი, ხელოსნები და მშენებლები — 100 კაცი, ყველა ვაჟკაცი, ომის შემძლე, წაასხა ბაბილონის მეფემ ბაბილონში დასასახლებლად.

¹⁷და დასვა მეფედ ბაბილონის მეფემ იოიაქინის ნაცვლად მისი ბიძა, მათანია, და სახელად ცედეკია უწოდა.

¹⁸21 წლისა იყო ცედეკია, როცა გამეფდა, და 11 წელი იმეფა იერუსალიმში. დედამისი იყო ხამუტალი, ლიბნელი იერემიას ასული.

¹⁹ბოროტებას სჩადიოდა უფლის თვალში მსგავსად იეჰოიაკიმისა.

²⁰და მრისხანებდა უფალი იერუსალიმზე და იუდაზე, ვიდრე საბოლოოდ არ მოიშორა ისინი თავიდან. და განუდგა ცედეკია ბაბილონის მეფეს.