Read ქართული ბიბლია, სრული ვერსია 2 Kings 9 Bible Online

2 Kings 9 - ქართული ბიბლია, სრული ვერსია bible

2 Kings 9

¹ელისე წინასწარმეტყველმა მოუხმო წინასწარმეტყველთა ერთ-ერთ ძეს და უთხრა: „შეიბი სარტყელი წელზე, აიღე ეს ზეთის ჭურჭელი და წადი გალაადის რამოთში.

²და როცა იქ მიხვალ, მოძებნე იეჰუ, იოშაფატ ნიმშის ძის ძე და მიდი და წამოაყენე მისი ძმებისგან და უკანა ოთახში შეიყვანე;

³და აიღე ზეთის ჭურჭელი და ზეთი დაასხი თავზე, და უთხარი: ასე ამბობს-თქო უფალი: ‘მე გცხებ ისრაელის მეფედ.’ შემდეგ გააღე კარი, გაიქეცი და არ მოიცადო.“

⁴და წავიდა ყმაწვილი, წინასწარმეტყველის მსახური, გალაადის რამოთში.

⁵მივიდა, და, აჰა, სხედან მხედართმთავრები, და უთხრა: „სიტყვა მაქვს შენთან, მეთაურო.“ და თქვა იეჰუმ: „რომელ ჩვენგანთან?“ და თქვა: შენთანო, მხედართმთავარო.

⁶და ადგა, და შევიდა სახლში. და დაასხა ზეთი თავზე და უთხრა: „ასე ამბობს უფალი, ისრაელის ღმერთი: მე გცხებ უფლის ერის, ისრაელის მეფედო.

⁷შენ მოსპობ შენი ბატონის, ახაბის სახლს, რომ ავიღო ჩემს მსახურთა, წინასწარმეტყველთა სისხლი და უფლის ყველა მსახურის სისხლი, იეზებელის ხელით რომ დაეცნენ.

⁸და განადგურდება ახაბის მთელი სახლი, და ამოვუძირკვავ ახაბს კაცს, და ყმასა და აზატს ისრაელში.

⁹და ვაქცევ ახაბის სახლს იერობოყამ ნებატის ძის სახლივით, და ახიას ძის, ბაყაშას სახლივით.

¹⁰იეზებელს კი ძაღლები შეჭამენ იზრეყელის ველზე და არავინ დამარხავს მას.“ და გააღო კარი და გაიქცა.

¹¹და გავიდა იეჰუ თავისი ბატონის მსახურებთან, და უთხრეს: „ხომ მშვიდობაა? რისთვის მოვიდა შენთან ეგ შეშლილი?“ და უთხრა მათ: „თქვენ იცით ეს კაციც და მისი ნალაპარაკევიც.“

¹²და თქვეს: „ტყუილია, გვითხარი.“ და თქვა: „ასე და ასე მითხრა, ასე ამბობსო უფალი: მე გცხებ ისრაელის მეფედო.“

¹³და საჩქაროდ დაავლეს ხელი თავიანთ მოსასხამებს, და ზედ საფეხურებზე დაუფინეს, და ბუკსა ჰკრეს და გამოაცხადეს: გამეფდაო იეჰუ!

¹⁴აუჯანყდა იეჰუ, იოშაფატ ნიმშის ძის ძე იორამს; ხოლო იორამი მთელ ისრაელთან ერთად არამის მეფე ხაზაელს უდარაჯებდა გალაადის რამოთში.

¹⁵თავად იორამ მეფე უკან დაბრუნდა, რათა იზრეყელში მოეშუშებინა არამის მეფე ხაზაელთან ბრძოლის დროს არამელთა მიერ მიყენებული ჭრილობები. და თქვა იეჰუმ: „თუ თანახმა ხართ, ნურავის გაუშვებთ ქალაქიდან იზრეყელში ამბის წასაღებად.“

¹⁶და ამხედრდა იეჰუ და გასწია იზრეყელისაკენ, რადგან იქ იწვა იორამი; და იუდას მეფე ახაზიაც იქ იყო მისული იორამის სანახავად.

¹⁷ებგური იდგა კოშკზე იზრეყელში. და დაინახა, იეჰუს ჯარი რომ მოდიოდა, და თქვა: „ჯარსა ვხედავ!“ და თქვა იორამმა: „ადექი და გააგზავნე მხედარი შესახვედრად, და იკითხოს: ‘ხომ მშვიდობა არის?’“

¹⁸და წავიდა მხედარი მისაგებებლად და უთხრა: „მეფე კითხულობს, ხომ მშვიდობა არისო?“ და თქვა იეჰუმ: „შენ ვინ გეკითხება მშვიდობას? უკან წამომყევი.“ შეატყობინა ებგურმა მეფეს: „მივიდა ის მათთან, მაგრამ უკან აღარ ბრუნდება.“

¹⁹და გაგზავნა მან მეორე მხედარი. ისიც მივიდა მათთან და თქვა: „ასე ამბობს მეფე, ხომ მშვიდობა არისო?“ და თქვა იეჰუმ: „შენ ვინ გეკითხება მშვიდობას? უკან წამომყევი.“

²⁰შეატყობინა ებგურმა მეფეს: „მივიდა ის მათთან და უკან აღარ ბრუნდება. ჯარის წინამძღოლი კი საქციელით იეჰუ უნდა იყოს, ნიმშის ძე, რადგან გამალებული მოქრის.“

²¹და თქვა იორამმა: შემიბითო ეტლი! და შეუბეს ეტლი. და გავიდნენ იორამი, ისრაელის მეფე, და ახაზია, იუდას მეფე, თავ-თავისი ეტლებით. და გავიდნენ იეჰუს შესახვედრად, და შეეყარნენ მას ნაბოთ იზრეყელელის მინდორზე.

²²და როცა დაინახა იორამმა იეჰუ, თქვა: „ხომ მშვიდობაა, იეჰუ?“ და თქვა: „რა მშვიდობა უნდა იყოს დედაშენის, იეზებელის გარყვნილებისა და მისი ამდენი ჯადოქრობის მერე?“

²³და უკან გატრიალდა იორამი და გაიქცა, და უთხრა ახაზიას: „ღალატია, ახაზია!“

²⁴და მოზიდა მშვილდი იეჰუმ, და ბეჭებს შორის დაჰკრა და გულს უწვდინა ისარი. და ჩაიჩოქა თავის ეტლზე იორამმა.

²⁵და უთხრა იეჰუმ ბიდეკარს, თავის მხლებელს: „აიღე და გადააგდე იგი ნაბოთ იზრეყელელის მინდორში. და გაიხსენე, ორივე რომ მივყვებოდით უკან ცხენდაცხენ მე და შენ მამამისს, ახაბს, და ეს განაჩენი რომ გამოუტანა უფალმა:

²⁶‘განა ნაბოთისა და მისი შვილების სისხლი არ ვიხილე გუშინ?’ — ამბობს უფალი. აიღე და გადააგდე მინდორში, უფლის სიტყვისამებრ.“

²⁷ეს რომ დაინახა იუდას მეფე ახაზიამ, ბეთ-ჰაგანისკენ გაიქცა. და გაეკიდა იეჰუ და თქვა: „მაგასაც დაჰკარით მისსავე ეტლზე.“ და დაჰკრეს მას გურის მაღლობზე, იბლეყამთან რომ არის. და გაიქცა ის მეგიდოსაკენ და იქ მოკვდა.

²⁸და წაასვენეს მისმა მსახურებმა იერუსალიმს და დამარხეს იგი თავის სამარხში, მის მამათა გვერდით, დავითის ქალაქში.

²⁹ახაბის ძის, იორამის მეთერთმეტე წელს გამეფდა ახაზია იუდაში.

³⁰და მივიდა იეჰუ იზრეყელში და, როცა მოესმა ამბავი იეზებელს, საოლავი წაისვა თვალებზე, თავი გაილამაზა და გაიხედა სარკმელში.

³¹და შევიდა თუ არა იეჰუ კარიბჭეში, ქალმა თქვა: „ხომ მშვიდობითაა ზიმრი, თავისი ბატონის მკვლელი?“

³²ახედა სარკმელს კაცმა და დაიძახა: „ვინ არის ჩემს მხარეზე, ვინ?“ და გადმოხედა მას ორმა-სამმა საჭურისმა.

³³და თქვა: „გადმოაგდეთ ქალი!“ და გადმოაგდეს. და მიესხა მისი სისხლი კედელს და ცხენებს. და გადათელეს მათ იგი.

³⁴და მივიდა იეჰუ, და ჭამა და სვა, და თქვა: „მოძებნეთ ის შეჩვენებული და დამარხეთ, რადგან მაინც მეფის ასულია.“

³⁵და წავიდნენ მის დასამარხად, მაგრამ ვერაფერი ნახეს მისი, თავის ქალისა და ხელ-ფეხის მეტი.

³⁶და დაბრუნდნენ და მოახსენეს. და თქვა იეჰუმ: „ასეთი იყო უფლის სიტყვა, რომელიც გამოაცხადა მან თავისი მსახურის, ელია თიშბელის პირით: იზრეყელის ველზე შეჭამენო ძაღლები იეზებელს.“

³⁷და ეგდება იეზებელის გვამი იზრეყელის ველზე, როგორც ნეხვი მინდორში, ისე რომ ვერავინ იტყვის: აი, ეს არისო იეზებელი.