Read ქართული ბიბლია, სრული ვერსია 1 Chronicles 15 Bible Online

1 Chronicles 15 - ქართული ბიბლია, სრული ვერსია bible

1 Chronicles 15

¹და აიშენა დავითმა სახლები თავის ქალაქში და მოამზადა ადგილი ღვთის კიდობნისათვის და კარავი დაუდგა მას.

²მაშინ თქვა დავითმა: ლევიანთა გარდა არავინ ატაროს კიდობანი, რადგან ისინი ამოირჩია უფალმა ღვთის კიდობნის მტარებლებად და მუდმივ მსახურებად.

³და შეყარა დავითმა მთელი ისრაელი იერუსალიმში, რომ დაესვენებინათ უფლის კიდობანი იმ ადგილზე, რომელიც მისთვის იყო გამზადებული.

⁴და შეკრიბა დავითმა აარონიანები და ლევიანები.

⁵კოჰათის ძეთაგან: მთავარი ურიელი და მისი მოძმენი — 120 კაცი;

⁶მერარის ძეთაგან: მთავარი ყასაია და მისი მოძმენი — 220 კაცი;

⁷გერშომის ძეთაგან: მთავარი იოელი და მისი მოძმენი — 130 კაცი;

⁸ელიცაფანის ძეთაგან: მთავარი შემაყია და მისი მოძმენი — 200 კაცი;

⁹ხებრონის ძეთაგან: მთავარი ელიელი და მისი მოძმენი — 80 კაცი;

¹⁰ყუზიელის ძეთაგან: მთავარი ყამინადაბი და მისი მოძმენი — 112 კაცი;

¹¹და მოუხმო დავითმა მღვდლებს: ცადოკსა და აბიათარს, და ლევიანებს: ურიელს, ყასაიას, იოელს, შემაყიას, ელიელს და ყამინადაბს,

¹²და უთხრა: „თქვენა ხართ ლევიანთა მამისსახლთა თავკაცები; განიწმიდენით თქვენ და თქვენი ძმანი, და დაასვენეთ უფლის, ისრაელის ღმერთის, კიდობანი მისთვის მომზადებულ ადგილზე;

¹³და რაკი უწინ ამას არ ასრულებდით, უფალმა, ჩვენმა ღმერთმა, შეგვმუსრა, რადგან წესისამებრ არ ვეკითხებოდით მას.“

¹⁴და განიწმიდნენ მღვდლები და ლევიანები, რათა აეწიათ უფლის, ისრაელის ღმერთის კიდობანი.

¹⁵და ასწიეს ლევიანებმა ღვთის კიდობანი და, როგორც მოსეს ჰქონდა ნაბრძანები მათთვის უფლის სიტყვისამებრ, კეტებით შეიდგეს მხრებზე.

¹⁶დავითმა ლევიანთა მთავრებს უბრძანა, რომ მათი ძმები დაეყენებინათ მგალობლებად საკრავი იარაღებით, ბობღნებით, ქნარებით და წინწილებით, რათა სიხარულის ხმები გამოეცათ.

¹⁷და დააყენეს ლევიანებმა: ჰემან იოელის ძე, მის მოძმეთაგან ასაფ ბერექიას ძე, ხოლო მათი ძმების, მერარის ძეთაგან, ეთან კუშაიას ძე.

¹⁸მათთან ერთად მათი მეორე რიგის მოძმენი: ზაქარია, იაყაზიელი, შემირამოთი, იეხიელი, ყუნი, ელიაბი, ბენაია, მაყასეია, მათითია, ელიფელეჰუ, მიკნეია და კარისმცველნი: ყობედ-ედომი და იეყიელი;

¹⁹მგალობელნი: ჰემანი, ასაფი და ეთანი ბრინჯაოს წინწილებს ახმიანებდნენ.

²⁰ხოლო ზაქარია, ყაზიელი, შემირამოთი, იეხიელი, ყუნი, ელიაბი, მაყასეია და ბენაია — ქნარებს ქალწულურ ჰანგზე.

²¹ხოლო მათითია, ელიფელეჰუ, მიკნეია, ყობედ-ედომი, იეყიელი, ყაზაზია — ებნებს, რვასიმიანს, სალოტბაროდ.

²²ხოლო ქენანია, ლევიანთა მთავარი, სახიობის ხელმძღვანელად განაწესეს, ვინაიდან მცოდნე იყო.

²³ბერექია და ელკანა კიდობნის კარისმცველები იყვნენ.

²⁴ხოლო მღვდლები შებანია, იოშაფატი, ნეთანელი, ყამასაი, ზაქარია, ბენაია და ელიყეზერი საყვირებს უკრავდნენ ღვთის კიდობნის წინაშე. ყობედ-ედომი და იეხია კი კიდობნის კარისმცველნი იყვნენ.

²⁵და გაემართნენ დავითი, ისრაელის უხუცესობა და ათასისთავები სიხარულით უფლის აღთქმის კიდობნის წამოსასვენებლად ყობედ-ედომის სახლიდან.

²⁶ღვთის შეწევნით იყო რომ გადაასვენეს ლევიანებმა უფლის აღთქმის კიდობანი და შვიდი ზვარაკი და შვიდი ვერძი შესწირეს.

²⁷დავითს ბისონის მოსასხამი ეხვია და აგრეთვე ყველა კიდობნის მატარებელ ლევიანს, ასევე მგალობლებს და ქენანიას, მგალობელთა ლოტბარს. დავითს ამასთან ერთად სელის ეფოდიც ემოსა.

²⁸მთელი ისრაელი მიაცილებდა უფლის აღთქმის კიდობანს ყიჟინით, ბუკისცემით, საყვირების, წინწილების, ბობღნებისა და ქნარების დაკვრით.

²⁹და როცა უფლის აღთქმის კიდობანმა დავითის ქალაქს მიაღწია, სარკმლიდან გამოიხედა საულის ასულმა მიქალმა და დაინახა მეფე დავითი მოთამაშე და მროკველი და გულში დასცინა.