Read ქართული ბიბლია, სრული ვერსია 1 Chronicles 16 Bible Online

1 Chronicles 16 - ქართული ბიბლია, სრული ვერსია bible

1 Chronicles 16

¹მოაბრძანეს უფლის კიდობანი და დაასვენეს შუაგულ კარავში, რომელიც მისთვის ჰქონდა დავითს მოწყობილი; და სრულადდასაწველი და სამშვიდობო მსხვერპლი შესწირეს ღმერთს.

²დაამთავრა დავითმა სრულადდასაწველის და სამშვიდობო მსხვერპლის შეწირვა და უფლის სახელით დალოცა ერი

³და ჩამოურიგა ისრაელის მთელ კრებულს, კაცსა და ქალს, თითო პურის კვერი, თითო ხორცის ნაჭერი და თითო კვერი ჩამიჩისა.

⁴და დააყენა დავითმა ლევიანები უფლის კიდობნის წინაშე სამსახურის გასაწევად, რათა მოეხსენებინათ, ედიდებინათ და ექოთ უფალი, ღმერთი ისრაელისა.

⁵ასაფი, მათი მეთაური იყო; ასაფის შემდეგ მეორე იყო ზაქარია. იეყიელი, შემირამოთი, იეხიელი, მათითია, ელიაბი, ბენაია, ყობედ-ედომი და იეყიელი — ბობღნებსა და ქნარებზე უკრავდნენ, ხოლო თვითონ ასაფი წინწილების დამკვრელი იყო.

⁶მღვდლებს: ბენაიასა და იახაზიელს კი საყვირები შეუჩერებლივ უნდა ეყვირებინათ ღვთის აღთქმის კიდობნის წინაშე.

⁷იმ დღეს პირველად ბრძანა დავითმა, რომ ასაფსა და მის ძმებს ქება ეძღვნათ უფლისათვის;

⁸ადიდეთ უფალი, მოუხმეთ მის სახელს, აუწყეთ ხალხებს საქმენი მისნი.

⁹უმღერეთ მას, უგალობეთ მას, ილაპარაკეთ ყველა მის სასწაულზე.

¹⁰დაიკვეხეთ მისი წმიდა სახელით, გამხიარულდეს გული უფლის მეძიებელთა.

¹¹ეძიეთ უფალი და ძლიერება მისი; ეძიეთ პირი მისი მარადის.

¹²გაიხსენეთ მისი ნამოქმედარი სასწაულები, საოცრებანი და მისი ბაგის სამართალნი.

¹³შთამომავალნო ისრაელისა, მისი მსახურისა, ძენო იაკობისა, რჩეულნო მისნო.

¹⁴ის არის უფალი, ღმერთი ჩვენი, მთელ ქვეყნიერებაზეა სამართალნი მისნი.

¹⁵ახსოვს საუკუნოდ აღთქმა თვისი, სიტყვა, რომელიც ბრძანა ათასი თაობისთვის,

¹⁶რომელიც დაუდო აბრაამს, და თავისი ფიცი — ისააკთან.

¹⁷და დაუდგინა იაკობს იგი წესად და ისრაელს — საუკუნო აღთქმად.

¹⁸უთხრა: „შენ მოგცემ ქანაანის ქვეყანას წილად თქვენი მემკვიდრეობისა.“

¹⁹როცა ისინი, თითზე ჩამოსათვლელნი, ცოტანი და იქ შეხიზნულნი,

²⁰იარებოდნენ ერთი ხალხიდან მეორესთან, სამეფოდან — სხვა ერთან,

²¹უფალი არავის ანებებდა მათს დაჩაგვრას და მიუთითა მათზე მეფეებს:

²²„არ შეეხოთ ჩემს ცხებულებს და ჩემს წინასწარმეტყველებს არ უბოროტოთ.“

²³უგალობე უფალს, მთელო ქვეყნიერებავ! ამახარობლეთ დღითი დღე ხსნა მისმიერი.

²⁴მოუთხრეთ ხალხებს მისი ღირსება, ყოველ ერს — მისი სასწაულები.

²⁵რადგან დიდია უფალი და ღირსსაქებარი მეტად, ყველა ღმერთზე საშიშია ის.

²⁶რადგან ხალხთა ყველა ღმერთი კერპებია, ხოლო უფალმა ცანი შექმნა.

²⁷მშვენიერება და ბრწყინვალებაა მის წინაშე, სიძლიერე და მომხიბლაობა — მის ტაძარში.

²⁸შესწირეთ უფალს, ტომებო ხალხთა, შესწირეთ უფალს ქება და დიდება.

²⁹შესწირეთ უფალს ქება მისი სახელისა. წაუღეთ ძღვენი და მიდით მის ეზოებში.

³⁰ათრთოლდი მის წინაშე, მთელო ქვეყნიერებავ! მტკიცეა სამყარო, არ შეირყევა.

³¹გამხიარულდებიან ცანი და მოილხენს ქვეყანა. უთხარით ხალხებს: „უფალი მეფობს!“

³²იხმაურებს ზღვა და სავსება მისი, გაიხარებს ველი და ყოველი, რაც მასზეა,

³³მაშინ იზეიმებენ ყოველნი ხენი ტევრისანი უფლის წინაშე, რადგან მოვა ის ქვეყნიერების განსასჯელად.

³⁴აქეთ უფალი, რადგან კეთილია იგი. რადგან უკუნისამდეა წყალობა მისი.

³⁵და თქვით: „გვიხსენი, ჩვენი ხსნის ღმერთო, შეგვკრიბე და დაგვიცავ ხალხებისგან, რათა ვადიდოთ შენი წმიდა სახელი, დავიქადნო შენი ქება-დიდებით.

³⁶კურთხეულ არს უფალი, ღმერთი ისრაელისა უკუნითი უკუნისამდე!“ და მიუგო ერმა: „ამინ! დიდება უფალს!“

³⁷და დატოვა დავითმა უფლის აღთქმის კიდობნის წინაშე ასაფი და მისი ძმები, რათა კიდობნის წინაშე სამსახური გაეწიათ მუდმივად, ყოველდღიურად,

³⁸და ყობედ-ედომი და მისი ძმები, 68 კაცი, და ყობედ-ედომი, იედუთუნის ძე და ხოსა — კარისმცველებად,

³⁹მღვდელი ცადოკი და მისი მღვდელმსახური ძმები უფლის სავანის წინ, გიბეონში რომ ბორცვია, იქ დააყენა,

⁴⁰რომ მუდამ, დილა-საღამოობით, სრულადდასაწველი აღევლინათ უფლისათვის სრულადდასაწველის სამსხვერპლოზე, და რომ ყოველივე შეესრულებინათ, რაც უფლის რჯულში სწერია და რაც მან დაუწესა ისრაელს.

⁴¹მათთან იყვნენ: ჰემანი, იედუთუნი და სხვა რჩეულნი, რომელნიც სახელებით იყვნენ დადგენილნი, რათა ექოთ უფლის სახელი, რადგან უკუნისამდეა წყალობა მისი.

⁴²მათთან ერთად ჰემანი და იედუთუნი საყვირებით, წინწილებითა და საკრავებით ღვთის მგალობლებად იყვნენ დადგენილნი, იედუთუნის ძენი კი — კარიბჭესთან.

⁴³ყველანი თავ-თავიანთ სახლებში წავიდ-წამოვიდნენ. და დავითიც თავისი სახლის დასალოცად გაბრუნდა.