Read ქართული ბიბლია, სრული ვერსია 2 Chronicles 13 Bible Online

2 Chronicles 13 - ქართული ბიბლია, სრული ვერსია bible

2 Chronicles 13

¹იერობოყამის მეფობის მეთვრამეტე წელს აბია გამეფდა იუდაზე.

²იგი სამ წელიწადს მეფობდა იერუსალიმში, დედამისი იყო მიქაია, ურიელის ასული, გიბეყადან. და იყო ომი აბიასა და იერობოყამს შორის.

³აბიამ ომში მამაც მებრძოლთაგან 400 ათასი რჩეული ვაჟკაცი გამოიყვანა. იერობოყამი კი მათ წინააღმდეგ საომრად 800 ათასი რჩეული მეომრით გამოვიდა.

⁴და დადგა აბია ცემარაიმის მწვერვალზე, ეფრემის მთებში რომ არის, და თქვა: „მისმინეთ, იერობოყამ და მთელო ისრაელო!

⁵განა არ იცით, რომ უფალმა, ისრაელის ღმერთმა, დავითსა და მის ძეებს საუკუნო აღთქმით მისცა მეფობა ისრაელზე საუკუნოდ?

⁶და მაინც აღდგა იერობოყამ ნებატის ძე, დავითის ძის, სოლომონის მსახური, და გაილაშქრა თავისი ბატონის წინააღმდეგ.

⁷და შემოიკრიბა თავის ირგვლივ უღირსი, უგვანი ხალხი, და გამაგრდნენ რეხობოყამის, სოლომონის ძის წინააღმდეგ. რეხობოყამი ყმაწვილი იყო და გულდედალი, ამიტომ ვერ გაუძლო მათ.

⁸ახლა თქვენ ფიქრობთ, გაუმკლავდეთ უფლის სამეფოს, რომელიც დავითის ძეთა ხელშია? თქვენ ჩვენზე ბევრად მეტნი ხართ და თქვენთან არის ოქროს ხბორები, იერობოყამმა რომ ღმერთებად დაგიყენათ.

⁹განა თქვენ არ გამორეკეთ უფლის მღვდლები — აარონის ძენი და ლევიანები? განა თქვენ არ იყავით, რომ სხვა ქვეყნების ხალხთა მსგავსად მღვდლები გაიჩინეთ? ყველა, ვინც თავის საკურთხებლად მოდის ხბოთი და შვიდი ვერძით, ცრუღმერთის მღვდელი ხდება.

¹⁰ჩვენ კი უფალი, ჩვენი ღმერთი, გვყავს. არ მიგვიტოვებია იგი. მღვდლები უფალს ემსახურებიან, აარონის ძენი და ლევიანები საქმეზე დგანან.

¹¹დილა-საღამოს უფლისთვის სრულადდასაწველს აღავლენენ, სურნელებას აკმევენ, შესაწირ პურს სუფთა ტაბლაზე აწყობენ, ანთებენ ლამპრებს ოქროს სასანთლეებზე, ღამ-ღამობით რომ ენთოს, რადგან უფლის, ჩვენი ღმერთის მცნებებს ვასრულებთ, თქვენ კი მიატოვეთ ისინი.

¹²აჰა, ღმერთი და მისი მღვდლები ჩვენთან არიან და სათავეში გვიდგანან, მომარჯვებული გვაქვს მჭექარე საყვირები თქვენს წინააღმდეგ დასაჭექებლად; ისრაელის ძენო! არ გაბედოთ უფალთან, თქვენი მამების ღმერთთან ბრძოლა, რადგან არ მოგემართებათ ხელი.“

¹³ამასობაში იერობოყამმა უკან ჩაუსაფრა ხალხი; თვით იუდაელთა წინ იყვნენ, საფარი კი მათ უკან ეყენათ.

¹⁴თვალი მოავლო იუდამ, და აჰა, წინიდან და უკნიდან ომია გაჩაღებული. მაშინ მოუხმეს მათ უფალს და მღვდლებმაც ჩაჰბერეს საყვირებს.

¹⁵საომარი კიჟინა დასცეს იუდაელებმა. და როდესაც კიჟინა დასცეს, ღმერთმა დაამარცხა იერობოყამი და მთელი ისრაელი აბიასა და იუდას წინაშე.

¹⁶და გაექცნენ ისრაელიანები იუდას, მაგრამ ღმერთმა მათ ხელში ჩაყარა ისინი.

¹⁷და სძლია მათ აბიამ და მისმა ხალხმა დიდი ძლევით, 500 ათასი მკვდარი დაეცა ისრაელის რჩეულ ვაჟკაცთაგან.

¹⁸და მოდრკნენ ისრაელიანები, ხოლო იუდაელები კი გაძლიერდნენ, რადგან მინდობილნი იყვნენ უფალს, თავიანთი მამების ღმერთს.

¹⁹და გაედევნა აბია იერობოყამს და წაართვა ქალაქები: ბეთელი თავისი დაბებით, იეშანა თავისი დაბებით, ყეფრონი თავისი დაბებით.

²⁰და ვეღარ მოიკრიბა იერობოყამმა ძალა აბიას დღეებში, და დაჰკრა მას უფალმა და მოკვდა იგი.

²¹აბია კი განმტკიცდა და 14 ცოლი შეირთო. და შეეძინა 22 ძე და 16 ასული.

²²აბიას დანარჩენი ამბები, საქმეები და მისი სიტყვები აღწერილია ყიდო წინასწარმეტყველის წიგნში.