Read ქართული ბიბლია, სრული ვერსია 2 Chronicles 15 Bible Online

2 Chronicles 15 - ქართული ბიბლია, სრული ვერსია bible

2 Chronicles 15

¹მაშინ ყაზარია ყოდედის ძეზე გადმოვიდა ღვთის სული,

²და გამოეგება იგი ასას და უთხრა: „მისმინეთ, ასავ, მთელო იუდავ და ბენიამინო, უფალი თქვენთან არის, როცა თქვენ მასთან ხართ. თუ ძებნას დაუწყებთ მას, იპოვით; თუ თქვენ მიატოვებთ, ისიც მიგატოვებთ.

³დიდხანს იყო ისრაელი ჭეშმარიტი ღმერთის გარეშე, დამმოძღვრავი მღვდლისა და რჯულის გარეშე.

⁴გასაჭირში იყო და მოუხმო უფალს, ისრაელის ღმერთს. და ეძებდნენ მას და აპოვნინა თავი.

⁵იმ ხანებში არ ჰქონდა მშვიდობა არც გამომსვლელს და არც შემსვლელს, რადგან დიდი შფოთი იყო ატეხილი იმ ქვეყნების მთელ მოსახლეობაში.

⁶ხალხი ხალხს ებრძოდა, ქალაქი — ქალაქს, რადგან ღმერთმა შეაშფოთა ისინი ყოველგვარი უბედურებით.

⁷თქვენ კი განმტკიცდით და მხრებს ნუ ჩამოყრით, რადგან თქვენი საქმისამებრ მოგეზღვებათ.“

⁸ხოლო როცა ასამ მოისმინა ეს სიტყვები და აზარიას, ყოდედის ძის წინასწარმეტყველება, გამხნევდა და აღმოფხვრა სიბილწენი იუდასა და ბენიამინის ქვეყნიდან, აგრეთვე იმ ქალაქებიდან, ეფრემის მთაზე რომ დაიპყრო. და განაახლა უფლის სამსხვერპლო, უფლის ტაძრის წინ რომ არის.

⁹და შემოიკრიბა მთელი იუდა და ბენიამინი, ეფრემისგან, მანაშესგან და სიმეონისგან წამოსულ ხიზნებთან ერთად, რადგან მრავალნი გადავიდნენ მის მხარეს ისრაელიდან, რაკი დაინახეს, რომ მასთან უფალი იყო.

¹⁰ასას მეფობის მეთხუთმეტე წელს, მესამე თვეში, შეიყარნენ ისინი იერუსალიმს.

¹¹და მსხვერპლად შესწირეს უფალს იმ დღეს მოტანილი ნადავლიდან 700 ხარი და 7 ათასი ცხვარი.

¹²და აღთქმა დადეს, რომ ეძიათ უფალი, თავიანთი მამების ღმერთი, მთელი გულითა და მთელი სულით.

¹³და ყველა, ვინც არ ეძიებდა უფალს, ისრაელის ღმერთს, უნდა მომკვდარიყო — დიდი იქნებოდა თუ პატარა, კაცი, თუ ქალი.

¹⁴და ეფიცებოდნენ უფალს დიდი ხმითა და ღაღადით, საყვირებითა და ბუკებით.

¹⁵და ხარობდა მთელი იუდა ამ ფიცის გამო, რადგან მთელი გულით შეჰფიცეს, მთელი გულმოდგინებით ეძიებდნენ მას და ისიც გამოუჩნდა მათ; და უბოძა უფალმა სიმშვიდე ყოველი მხრიდან.

¹⁶მაყაქას, თავის დედასაც კი, ჩამოართვა დედოფლობა ასამ, რადგან აშერასათვის კერპი ჰქონდა გაკეთებული. და აჩეხა ასამ მისი კერპი, ნაფოტებად აქცია და კიდრონის ხევში დაწვა.

¹⁷ისრაელში კი არ მოუშლიათ გორაკები. მხოლოდ ასას გული იყო სრულიად მინდობილი უფალს მთელი მისი სიცოცხლე.

¹⁸და შეიტანა ღვთის სახლში მამამისისა და მის მიერ შეწირული ნივთები: ოქრო-ვერცხლი და ჭურჭელი.

¹⁹და ომებიც აღარ ყოფილა ასას მეფობის ოცდამეათე წლამდე.