Read ქართული ბიბლია, სრული ვერსია 2 Chronicles 16 Bible Online

2 Chronicles 16 - ქართული ბიბლია, სრული ვერსია bible

2 Chronicles 16

¹ასას მეფობის ოცდამეთექვსმეტე წელს ამხედრდა ისრაელის მეფე ბაყაშა იუდას წინააღმდეგ და იწყო რამას შენება, რათა ასასთან, იუდას მეფესთან შეწყვეტილიყო მისვლა მოსვლა.

²და გამოიტანა ასამ ვერცხლი და ოქრო უფლის ტაძრისა და მეფის სახლის საგანძურიდან და გაუგზავნა ბენ-ჰადადს, არამის მეფეს, დამასკოში რომ იჯდა, და შეუთვალა:

³„იყოს კავშირი ჩვენს შორის, როგორც ჩვენს მამებს შორის იყო. აჰა, გიგზავნი ვერცხლსა და ოქროს, რათა კავშირი გაწყვიტო ბაყაშასთან, ისრაელის მეფესთან, და ჩამომეხსნება ის მე.“

⁴და დაუჯერა ბენ-ჰადადმა მეფე ასას და გაგზავნა თავისი მხედართმთავრები, ვინც ჰყავდა, ისრაელის ქალაქების წინააღმდეგ. და დალაშქრეს ყიონი, დანი, აბელ-მაიმი, და ნაფთალის ყველა სამარაგო ქალაქი.

⁵ეს რომ შეიტყო ბაყაშამ, შეწყვიტა რამას შენება და შეაჩერა თავისი საქმე.

⁶და შეკრიბა მეფე ასამ მთელი იუდა და გადაზიდეს რამადან ქვა და ხე-ტყე, რითაც ბაყაშა აშენებდა. და ააშენა ამით გებაყი და მიცფა.

⁷იმ დროს მივიდა იუდას მეფე ასასთან ხანან მხილველი და უთხრა: „არამის მეფეს რომ მიენდე და არ მიენდე უფალს, შენს ღმერთს, ამის გამო გადაურჩა არამის ჯარი შენს ხელს.

⁸განა ქუშელთა და ლიბიელთა ლაშქარი დიდი არ იყო, მრავლის უმრავლესი ეტლი და მხედარი არ ჰყავდათ? მაგრამ უფალს რომ იყავი მინდობილი, ამიტომაც ჩაყარა ისინი შენს ხელში;

⁹რადგან უფლის თვალი დაჰყურებს მთელ ქვეყანას, რომ მხარი დაუჭიროს იმას, ვინც მთელი გულით არის მასზე მინდობილი. უგუნურად მოგივიდა ეს. ამიტომ ომები გექნება ამიერიდან.“

¹⁰და განურისხდა ასა მხილველს და საპყრობილეში ჩააგდო, რადგან გაგულისებული იყო მისი ნათქვამის გამო; სხვა მრავალი ადამიანიც დაიჩაგრა მაშინ.

¹¹ასას პირველი და უკანასკნელი ამბები ჩაწერილია იუდასა და ისრაელის მეფეთა წიგნში.

¹²თავისი მეფობის ოცდამეცხრამეტე წელს ასას ფეხები დაუავადდა. ძალზე მძიმე იყო მისი სენი, მაგრამ თავის სნეულებაშიც კი არ ეძებდა უფალს, არამედ მკურნალებს.

¹³და განისვენა ასამ თავის მამებთან, და მიიცვალა თავისი მეფობის ორმოცდამეერთე წელს.

¹⁴და დამარხეს მის სამარხში, თავისთვის რომ გაიმზადა, დავითის ქალაქში. და დაასვენეს იგი სარეცელზე, რომელიც აავსეს საამო სურნელებებითა და მენელსაცხებლეთა ხელობით დამზადებული ნაირნაირი ნელსაცხებლებით. და დაუნთეს მას დიდზე დიდი კოცონი.