Read ქართული ბიბლია, სრული ვერსია 2 Chronicles 2 Bible Online

2 Chronicles 2 - ქართული ბიბლია, სრული ვერსია bible

2 Chronicles 2

¹და ბრძანა სოლომონმა სახლის აშენება უფლის სახელზე და სამეფო სასახლისა თავისთვის.

²და აღრიცხა სოლომონმა 70 ათასი მტვირთავი, 80 ათასი ქვის მფლეთელი მთებში და 3600 მათი ზედამხედველი.

³და შეუთვალა სოლომონმა ხურამს, ცორის მეფეს: „როგორც დავითთან, მამაჩემთან, აკეთებდი და კედარის ხე-ტყეს უგზავნიდი მისი საცხოვრებელი სახლის ასაშენებლად, რომელშიც ის ცხოვრობდა, —

⁴აჰა, მე მსურს უფლის, ჩემი ღმერთის, სახელზე სახლი ავაშენო, მის საკურთხევლად, საკმევლის საკმევად, საწირი პურების მუდამჟამს მისართმევად, სრულადდასაწველის აღსავლენად დილა-საღამოს, შაბათობით, ახალ მთვარობასა და ჩვენი უფლის დღესასწაულებზე, რაც სამარადისოდ აკისრია ისრაელს.

⁵და ის სახლი, უფლისათვის რომ მსურს ავაშენო, დიდი უნდა იყოს, რადგან ჩვენი ღმერთი ყველა ღმერთებზე დიდია.

⁶ვის შესწევს ძალი, რომ უფლის სახლი ააშენოს, როცა უფალს ცანი და ცათა-ცათანი ვერ იტევენ? ან მე ვინა ვარ, რომ შემეძლოს მისი სახლის აშენება? გარდა მის წინაშე, საკმევლის საკმევი ალაგისა?

⁷ახლა კი გამომიგზავნე ოქროს, ვერცხლის, ბრინჯაოს, რკინის და ძოწეულის, მეწამული და ლურჯი ფერის ნართების დამუშავების მცოდნე კაცი, ჩუქურთმის კვეთა რომ იცოდეს და იმუშაოს იმ ხელოსნებთან ერთად, იუდასა და იერუსალიმში რომ მყავს, რომლებიც დავითმა, მამაჩემმა, მოამზადა.

⁸ლიბანიდან გამომიგზავნე კედარის ხე-ტყე, კვიპაროსის და სანდალოზის მორები, რადგან ვიცი, რომ შენმა მსახურებმა იციან ლიბანის ხეების ჭრა და აჰა, ჩემი ხალხი შენს ხალხთან ერთად იქნება,

⁹რათა უხვად დამიმზადონ ხე-ტყე, რადგან სახლი, მე რომ ვაშენებ, დიდებული და მშვენიერი უნდა იყოს.

¹⁰აჰა, ვაძლევ ტყის მკაფავებს, შენს მუშებს, ხე-ტყეს რომ მიმზადებენ, 20 ათასი ქორ ხორბალს, 20 ათას ქორ ქერს, 20 ათას ბათ ღვინოსა და 20 ათას ბათ ზეთს.“

¹¹და უპასუხა ხურამმა, ცორის მეფემ, წერილით, რომელიც გამოუგზავნა სოლომონს: „რაკი უფალს უყვარს თავისი ერი, ამიტომ დაგადგინა მის მეფედ.“

¹²კიდევ ეს მოსწერა ხურამმა: „კურთხეულ იყოს უფალი, ღმერთი ისრაელისა, რომელმაც შექმნა ცა და მიწა, რომელმაც მეფე დავითს ბრძენი, ჭკვიანი და გონიერი ძე უბოძა, რომელიც აშენებს სახლს უფლისთვის და სამეფო სასახლეს თავისთვის.

¹³ახლა კი გიგზავნი ბრძენსა და გამოცდილ კაცს — ხურამ-აბის, ჩემს მრჩეველს,

¹⁴დანელი ქალის ძეს, მამით ცორელს, რომელმაც იცის ოქროს, ვერცხლის, ბრინჯაოს, რკინის, ქვის, ხის, ძოწეულის და ლურჯი ნართების, სელისა და ყირმიზის დამუშავება; იცის ყოველგვარი ჩუქურთმის კვეთა, ყველა ჩანაფიქრის განსახორციელებლად, რაც კი დაევალება შენს ხელოსნებთან და ჩემი ბატონის, დავითის, ხელოსნებთან ერთად.

¹⁵ახლა გამოუგზავნოს ჩემმა ბატონმა ის ხორბალი, ქერი, ზეთი და ღვინო, თავის მსახურთ რომ შეჰპირდა.

¹⁶ჩვენ კი ლიბანში მოვჭრით ხე-ტყეს, რამდენიც დაგჭირდება, და ზღვაზე ტივებით დავაცურებთ იაფოსაკენ, იქიდან კი იერუსალიმს აზიდეთ.“

¹⁷და აღრიცხა სოლომონმა ყველა ხიზანი, ვინც კი ისრაელის ქვეყნად მამამისის, დავითის აღრიცხვის შემდეგ მოსულიყო, და აღმოჩნდა 153600 კაცი.

¹⁸მათგან 70 ათასი მტვირთავად გაამწესა, 40 ათასი — ქვის მფლეთელად მთაში, 3600 — ზედამხედველად, ხალხი რომ ემუშავებინათ.