Read ქართული ბიბლია, სრული ვერსია 2 Chronicles 24 Bible Online

2 Chronicles 24 - ქართული ბიბლია, სრული ვერსია bible

2 Chronicles 24

¹შვიდი წლის იყო იოაში, როცა გამეფდა, და 40 წელი იმეფა იერუსალიმში. მისი დედა იყო ციბია, ბეერ-შებაყელი.

²სწორად იქცეოდა უფლის თვალში იოაში იეჰოიადაყ მღვდლის სიცოცხლეში.

³ორი ცოლი მოუყვანა მას იეჰოიადაყმა, და შეეძინა ძენი და ასულნი.

⁴ამის შემდეგ იოაშმა გულით მოიწადინა უფლის ტაძრის შეკეთება.

⁵და შეკრიბა მღვდლები და ლევიანები და უთხრა: „დაიარეთ იუდას ქალაქები და მთელ ისრაელში ვერცხლი აკრიბეთ წლიდან წლამდე უფლის ტაძრის შესაკეთებლად, დააჩქარეთ ეს საქმე!“ მაგრამ ლევიანებმა არ დააჩქარეს.

⁶და დაიბარა მეფემ იეჰოიადაყი, მათი თავკაცი, და უთხრა: „რატომ არ მოსთხოვ ლევიანებს, რომ იუდასგან და იერუსალიმისაგან აკრიბონ ის გადასახადი, რომელიც მოსემ, უფლის მსახურმა, და ისრაელის კრებულმა დაადგინეს სადღესასწაულო კარვისათვის?“

⁷რადგან ურჯულო ღათალიამ და მისმა ვაჟებმა დააზიანეს ღვთის სახლი და უფლის ტაძრის მთელი შემოწირულობა ბაყალებს მოახმარეს.

⁸და ბრძანა მეფემ და გააკეთეს ერთი ყუთი და დადგეს იგი უფლის სახლის შესასვლელთან, გარეთ,

⁹და გამოაცხადეს იუდაში და იერუსალიმში, რომ უფლისთვის მოეტანათ ის შესაწირავი, რაც მოსემ, ღვთის მსახურმა, დაუწესა ისრაელიანთ უდაბნოში ყოფნისას.

¹⁰და გაიხარა ყველა მთავარმა და მთელმა ერმა. და მოდიოდნენ და ყრიდნენ კიდობანში, ვიდრე არ გაივსო.

¹¹როცა ლევიანთა ხელით კიდობანს მეფის მოხელეებს წაუღებდნენ და ნახავდნენ, რომ იგი სავსე იყო ვერცხლით, მოვიდოდნენ მეფის მწერალი და მღვდელმთავრის სანდო კაცი და გადმოაპირქვავებდნენ ყუთს, მერე ისევ წაიღებდნენ და თავის ადგილზე დააბრუნებდნენ. ასე აკეთებდნენ ყოველ ცისმარე და დიდძალი ვერცხლი დააგროვეს.

¹²და აბარებდნენ ამას მეფე და იეჰოიადაყი უფლის ტაძრის სამუშაოთა შემსრულებლებს. ისინი ქირაობდნენ ქვისმთლელებსა და ხუროებს უფლის ტაძრის გასამაგრებლად.

¹³და იშრომეს სამუშაოს შემსრულებლებმა და მოამთავრეს შეკეთება მათი ხელით. და აღადგინეს ღვთის სახლი თავისი წესის და რიგის მიხედვით და გაამაგრეს.

¹⁴როცა მორჩნენ, მეფესა და იეჰოიადაყს მიუტანეს დარჩენილი ვერცხლი. და დაამზადეს მისგან ტაძრისთვის ჭურჭლეული — სამსახურებელი და სრულადდასაწველისთვის საჭირო ჭურჭელი, თასები, ოქროსა და ვერცხლის ჭურჭელი. იეჰოიადაყის მთელი სიცოცხლის მანძილზე მუდამ აღავლენდნენ სრულადდასაწველს უფლის სახლში.

¹⁵და დაბერდა იეჰოიადაყი და გაძღა დღეებით, და მოკვდა. 130 წლისა იყო, როცა მოკვდა.

¹⁶და დამარხეს იგი დავითის ქალაქში, მეფეთა გვერდით, რადგან სიკეთეს აკეთებდა ისრაელში ღვთისთვის და მისი სახლისათვის.

¹⁷იეჰოიადაყის სიკვდილის შემდეგ მოვიდნენ იუდას მთავრები და თაყვანისცეს მეფეს. მაშინ გაუგონა მათ მეფემ.

¹⁸და მიატოვეს უფლის, თავიანთი მამების ღმერთის, სახლი და დაუწყეს მსახურება აშერებსა და კერპებს. და განრისხდა უფალი იუდაზე და იერუსალიმზე ამ დანაშაულის გამო.

¹⁹და მოუვლინა წინასწარმეტყველები, რათა უფალს დაბრუნებოდნენ ისინი, მაგრამ ყურს არ უგდებდნენ მათ.

²⁰ღვთის სულმა მოიცვა ზაქარია, იეჰოიადაყის ძე, მღვდელი, და შედგა იგი ხალხის წინ შემაღლებაზე და თქვა: „ასე ამბობს ღმერთი: რატომ არღვევთ უფლის მცნებებს? ამიტომ ხელი აღარ მოგემართებათ; რაკი მიატოვეთ უფალი, ისიც გტოვებთ თქვენ.“

²¹აუჯანყდნენ ზაქარიას და მეფის ბრძანებით ჩააქვავეს უფლის ტაძრის ეზოში.

²²და არ გაიხსენა მეფე იოაშმა მადლი, რაც იეჰოიადაყმა, მამამისმა, უყო მას, და მოკლა მისი ძე. და როცა კვდებოდა, თქვა: „იხილოს უფალმა და მოჰკითხოს!“

²³წელიწადი რომ შემოიქცა, წამოვიდა მის წინააღმდეგ არამის ლაშქარი, შეიჭრა იუდაში და იერუსალიმში და გაწყვიტა ხალხში ყველა ერისმთავარი. და მთელი ნაალაფარი დამასკოს მეფეს გაუგზავნეს.

²⁴მცირეოდენი ხალხით მოვიდა არამის ლაშქარი, მაგრამ უფალმა მათ ხელში დიდძალი ლაშქარი ჩააგდო, რადგან მიატოვეს უფალი, მამათა ღმერთი. და მსჯავრი დასდეს იოაშს.

²⁵და როცა წავიდნენ მისგან და მძიმედ დასნეულებული მიატოვეს, აუჯანყდნენ მას მისი მსახურნი იეჰოიადაყ მღვდლის შვილის სისხლი რომ აეღოთ და თავისსავე საწოლში მოკლეს. და მოკვდა იგი და დამარხეს დავითის ქალაქში, მაგრამ არა მეფეთა სამარხში.

²⁶აჰა, მის წინააღმდეგ აჯანყებულნი: ზაბადი, ძე შიმეყათისა, ყამონელი დიაცისა, და იეჰოზაბადი, ძე შიმრითისა, მოაბელი დიაცისა.

²⁷მისი ვაჟების, მასზე თქმული მრავალი ნაქადაგარის და ღვთის სახლის შეკეთების ამბავი მეფეთა წიგნის საკითხავშია ჩაწერილი. მის ნაცვლად ამაცია, მისი ძე, გამეფდა.