Read ქართული ბიბლია, სრული ვერსია 2 Chronicles 25 Bible Online

2 Chronicles 25 - ქართული ბიბლია, სრული ვერსია bible

2 Chronicles 25

¹25 წლისა იყო ამაცია, როცა გამეფდა, და 29 წელი იმეფა იერუსალიმში. დედამისი იყო იეჰოყადინი, იერუსალიმელი ქალი.

²სწორად იქცეოდა უფლის თვალში, თუმცა არა მთელი გულით.

³და, როცა განიმტკიცა მეფობა, დახოცა თავისი მსახურნი, რომელთაც მოკლეს მეფე, მამამისი,

⁴მაგრამ მათი შვილები არ დაუხოცია, რადგან სწერია მოსეს რჯულის წიგნში, უფლის ბრძანებისამებრ: „არ უნდა მოიკლან მამები შვილების გამო, და შვილები — მამების გამო, არამედ ყველა თავისი დანაშაულის გამო უნდა მოიკლას.“

⁵და შეკრიბა ამაციამ იუდა და დააყენა მამისსახლების, ათასისთავების და ასისთავების მიხედვით მთელი იუდა და ბენიამინი. და აღრიცხა 20 წლის ასაკს გადაცილებულნი და გამოვიდა 300 ათასი ლაშქარში გამსვლელი რჩეული ვაჟკაცი, და ფარ-შუბოსანი.

⁶ას ქანქარ ვერცხლად იქირავა ისრაელისაგან 100 ათასი მამაცი მებრძოლი.

⁷და მივიდა მასთან ღვთისკაცი და უთხრა: „მეფეო, ნუ გაიყოლებ ისრაელის ჯარს, რადგან არ არის უფალი ისრაელთან, არც ერთთან ეფრემის ძეთაგან.

⁸მხოლოდ შენ წადი, იმოქმედე და მტკიცედ იყავი ბრძოლაში, თორემ დაგამარცხებს უფალი შენი მტრების წინაშე, რადგან ღმერთს შეწევნაც შეუძლია და დამარცხებაც.“

⁹და უთხრა ამაციამ ღვთის კაცს: „ას ქანქარს რაღა ვუყო, რომელიც უკვე მივეცი ისრაელის მოქირავნეებს?“ და თქვა ღვთისკაცმა: „უფალს ამაზე მეტი შეუძლია მოგცეს.“

¹⁰და გამოაცალკევა ამაციამ ჯარი, ეფრემიდან რომ მოუვიდა, თავიანთ ადგილზე დასაბრუნებლად. ძალიან განრისხდნენ იუდაზე და გაცეცხლებულნი დაბრუნდნენ თავ-თავიანთ ადგილას.

¹¹და ძალი მოიცა ამაციამ, გაუძღვა თავის ხალხს მარილოვანი ველისაკენ და 10 ათასი სეყირის ძე ამოხოცა.

¹²10 ათასი კაცი ცოცხლად ჩაიგდეს ტყვედ და წამოასხეს იუდას ძეთ. და აიყვანეს კლდის თავზე და გადმოყარეს კლდიდან. და ყველანი ერთიანად დაიხოცნენ.

¹³ხოლო ლაშქარი, რომელიც ამაციამ უკან გააბრუნა, რომ საომრად არ გაჰყოლოდა, შეესია იუდას ქალაქებს სამარიიდან ბეთ-ხორონამდე და 3 ათასი კაცი დახოცეს და დიდძალი ნაძარცვი დახვეტეს.

¹⁴და, როცა დაბრუნდა ამაცია ედომელების განადგურების შემდეგ, წამოიღო სეყირიანთა ღმერთები და ღმერთებად დაიყენა. და სცემდა მათ თაყვანს და უკმევდა.

¹⁵და განურისხდა უფალი ამაციას და მოუვლინა წინასწარმეტყველი, რომელმაც უთხრა: „რად მოძებნე მაგ ხალხის ღმერთები, რომელთაც ვერ იხსნეს თავისი ხალხი შენი ხელიდან?“

¹⁶და როცა ამას ეუბნებოდა, უპასუხა მეფემ: „რაო, მეფის მრჩევლად დაგაყენეს? შეწყვიტე, რომ თავი არ მოაკვლევინო!“ გაჩერდა წინასწარმეტყველი და თქვა: „ვიცი, შენი დაღუპვა გადაწყვიტა უფალმა, რადგან ეს გააკეთე და არ გაიგონე ჩემი რჩევა.“

¹⁷და ითათბირა ამაციამ, იუდას მეფემ, და კაცი გაუგზავნა იოაშს, იოახაზ იეჰუს ძის ვაჟს, ისრაელის მეფეს, და შეუთვალა: „მოდი, მოვსინჯოთ ერთმანეთი.“

¹⁸და შეუთვალა იოაშმა, ისრაელის მეფემ, ამაციას, იუდას მეფეს: „ლიბანის ძეძვმა შეუთვალა ლიბანის კედარს: ‘ცოლად მიათხოვე შენი ასული ჩემს ძეს.’ მაგრამ ჩაიარა ლიბანის ნადირმა და გადათელა კვრინჩხი.

¹⁹შენ ამბობ: ‘ედომი დავამარცხე,’ და აჰა, გული მოგეცა საამპარტავნოდ. ახლა იჯექი შენს სახლში, რატომ ატეხე შფოთი? შენც დაეცემი და შენთან ერთად იუდაც.“

²⁰ყური არ ათხოვა ამაციამ, რადგან ღმერთს ასე უნდოდა, რომ მტერს ჩავარდნოდა ხელში, რადგან ედომელთა ღმერთებს შეუდგა.

²¹და გამოვიდა იოაში, ისრაელის მეფე, და მოსინჯეს ერთმანეთი ამაციამ და იუდას მეფემ ბეთ-შემეშთან, იუდაში რომ არის.

²²და დამარცხდა იუდა ისრაელის ძეებთან და თავ-თავის კარვებში გაიფანტნენ.

²³ხოლო ამაცია, იუდას მეფე, ძე იოაშისა, ძისა იეჰოახაზიასა, შეიპყრო იოაშმა, ისრაელის მეფემ, ბეთ-შემეშში და მიადგა იერუსალიმს, და დაანგრია იერუსალიმის კედელი ეფრემის კარიბჭიდან კუთხის კარიბჭემდე 400 წყრთის სიგრძეზე.

²⁴და გაზიდა მთელი ოქრო-ვერცხლი და მთელი ჭურჭელი, რაც კი უფლის სახლში ინახებოდა ყობედ-ედომთან, და მეფის სახლის საგანძურიც. და აიყვანა მძევლები და გაბრუნდა სამარიაში.

²⁵ისრაელის მეფის, იოაშ იეჰოახაზიას ძის, სიკვდილის შემდეგ 15 წელი იცოცხლა ამაციამ, იოაშის ძემ, იუდას მეფემ.

²⁶ამაციას დანარჩენი საქმეები — პირველნი და უკანასკნელნი — იუდასა და ისრაელის მეფეთა წიგნშია ჩაწერილი.

²⁷მას შემდეგ, რაც ამაცია უფალს განუდგა, იერუსალიმი აუჯანყდა მას და მან თავი ლაქიშს შეაფარა. მიუგზავნეს კაცები ლაქიშში და იქ მოკლეს.

²⁸და წამოასვენეს ცხენებით და დამარხეს თავის მამათა გვერდით იუდას ქალაქში.