Read ქართული ბიბლია, სრული ვერსია 2 Chronicles 26 Bible Online

2 Chronicles 26 - ქართული ბიბლია, სრული ვერსია bible

2 Chronicles 26

¹და გამოიყვანა მთელმა იუდამ ყუზია, 16 წლის ყმაწვილი, და მამამისის, ამაციას, ნაცვლად გაამეფა.

²მან აღადგინა ელოთი და დაუბრუნა იუდას, მას შემდეგ, რაც განისვენა მეფე ამაციამ თავის მამებთან.

³16 წლისა გამეფდა ყუზია და 52 წელი იმეფა იერუსალიმში. დედამისი იყო იერუსალიმელი იექოლია.

⁴სწორად იქცეოდა უფლის თვალში, როგორც ამაცია, მამამისი, იქცეოდა,

⁵და ეძიებდა ღმერთს, ვიდრე ცოცხალი იყო ზაქარია წინასწარმეტყველი, საღვთო ხილვებში განბრძნობილი. ვიდრე ეძიებდა უფალს, ღმერთიც შეეწეოდა მას.

⁶და გადიოდა და ებრძოდა ფილისტიმელებს. და დაანგრია გათის, იაბნესა და აშდოდის კედლები, და ქალაქები გააშენა აშდოდსა და ფილისტიმში.

⁷ღმერთი შეეწეოდა ყუზიას ფილისტიმელების, გურ-ბაყალში მცხოვრები არაბებისა და მეყუნელთა წინააღმდეგ.

⁸ყამონელნი ძღვენს უგზავნიდნენ ყუზიას და მისმა სახელმა ეგვიპტის საზღვრებამდე მიაღწია, რადგან მეტად გაძლიერდა იგი.

⁹და ააგო ყუზიამ გოდოლნი იერუსალიმში კუთხის კარიბჭის თავზე და ველის კარიბჭეზე და კუთხეში, და გაამაგრა ისინი.

¹⁰და ააგო გოდოლნი უდაბნოშიც და მრავალი ჭა ამოთხარა, რადგან ბევრი ცხვარ-ძროხა ჰყავდა დაბლობებსა და ვაკეებზე. მიწისმუშაკნი და მევენახენი კი მთებში და ქარმელში ჰყავდა, რადგან მიწის მოყვარული იყო.

¹¹ყუზიას მებრძოლი ჯარი ჰყავდა, რომელიც გუნდ-გუნდად გამოდიოდა ომში და აღნუსხული იყო მათი რიცხვის მიხედვით იეყიელ მწერლისა და მაყასეია ზედამხედველის ხელით, და ხანანიას, მეფის ერთ-ერთი კარისკაცის, ხელმძღვანელობით.

¹²მამისსახლთა თავკაცების, მაგარ ვაჟკაცთა, სრული რიცხვი იყო 2 600.

¹³მათ ხელში იყო 307 500 კაცისგან შემდგარი ლაშქარი, რომელიც თავგამოდებით იბრძოდა მეფის დასახმარებლად მტრების წინააღმდეგ.

¹⁴და დაუმზადა ყუზიამ მთელ ლაშქარს ფარები, შუბები, მუზარადები, ჯაჭვის პერანგები, მშვილდები და შურდულის ქვები.

¹⁵და ააწყო იერუსალიმში გონიერი ოსტატების მიერ მოფიქრებული მანქანები, რომ დაედგათ გოდლებსა და კუთხეებში დიდრონი ისრებისა და ლოდების სატყორცნად. შორს გაითქვა სახელი, რადგან საოცრად შეეწეოდა უფალი, ვიდრე გაძლიერდებოდა,

¹⁶და, როცა გაძლიერდა, გაამპარტავნდა და თავის დასაღუპავად შესცოდა უფალს, თავის ღმერთს, რადგან შევიდა უფლის ტაძარში საკმევლის საკმევად სამსხვერპლოზე.

¹⁷და მიჰყვა უკან მღვდელი ყაზარია და მასთან ერთად უფლის მღვდლები — 80 მაგარი ვაჟკაცი.

¹⁸ისინი წინ გადაუდგნენ მეფე ყუზიას და უთხრეს: „შენ არ გეკუთვნის, ყუზია, უფლისათვის კმევა, არამედ მღვდლებს, აარონის ძეთ, რომელნიც მკვმევლებად არიან ნაკურთხი. გამოდი საწმიდრიდან, რადგან შესცოდე და პატივად არ ჩაგეთვლება უფლისგან, შენი ღმერთისაგან.“

¹⁹და განრისხდა ყუზია, ხელში კი საცეცხლური ეჭირა საკმევად. და როცა განურისხდა მღვდლებს, კეთრი გამოაჩნდა შუბლზე მღვდლების წინაშე, უფლის სახლში, საკმევლის სამსხვერპლოსთან.

²⁰და მიიხედეს მისკენ ყაზარია მღვდელმთავარმა და ყველა მღვდელმა და აჰა, შუბლზე კეთრი აქვს. და სასწრაფოდ გამოიყვანეს იქიდან. თვითონაც ჩქარობდა გამორიდებას, რადგან უფალმა დაჰკრა მას.

²¹სიკვდილამდე კეთროვანი იყო მეფე ყუზია, და ცხოვრობდა ცალკე სახლში, როგორც კეთროვანი, რადგან მოკვეთილი იყო უფლის სახლიდან. და იოთამი, მისი ძე, განაგებდა მეფის სახლს და განიკითხავდა ქვეყნის ერს.

²²ყუზიას დანარჩენი ამბები — პირველნი და უკასკნელნი — აღწერა წინასწარმეტყველმა ესაიამ, ამოცის ძემ.

²³და განისვენა ყუზიამ თავის მამებთან და დამარხეს იგი თავისი მამების გვერდით, მეფეთა სამარხავ მინდორზე, რადგან ამბობდნენ: კეთროვანიაო. მის ნაცვლად მისი ძე, იოთამი, გამეფდა.