Read ქართული ბიბლია, სრული ვერსია 2 Chronicles 27 Bible Online

2 Chronicles 27 - ქართული ბიბლია, სრული ვერსია bible

2 Chronicles 27

¹იოთამი 25 წლისა იყო, როცა გამეფდა და 16 წელი იმეფა იერუსალიმში. დედამისი იყო იერუშა, ცადოკის ასული.

²და სწორად იქცეოდა უფლის თვალში, როგორც მამამისი, ყუზია, იქცეოდა. ოღონდ ტაძარში არ შესულა. ხალხი კი ძველებურად სცოდავდა.

³და ააგო უფლის ტაძრის ზემო კარიბჭე და ყოფელის კედელიც ბევრგან აღადგინა.

⁴და იუდას მთაზე ქალაქები ააშენა, ტყეებში კი — ციხესიმაგრეები და გოდლები.

⁵ყამონელთა მეფეს ებრძოდა და სძლია მას. ყამონელთ იმ წელიწადს 100 ტალანტი ვერცხლი, 10 ათასი ქორი ხორბალი და 10 ათასი ქორი ქერი მისცეს. ამდენსავე აძლევდნენ ყამონიანები მეორე და მესამე წელს.

⁶და გაძლიერდა იოთამი, რადგან თავის გზებს უფლის, თავისი ღმერთის, წინაშე წარმართავდა.

⁷იოთამის დანარჩენი ამბები, ყველა მისი ომი და ნამოქმედარი ჩაწერილია იუდასა და ისრაელის მეფეთა წიგნში.

⁸25 წლისა იყო იოთამი, როცა გამეფდა და 16 წელი იმეფა იერუსალიმში.

⁹და განისვენა იოთამმა თავის მამებთან და დამარხეს დავითის ქალაქში. მის ნაცვლად მისი ძე ახაზი გამეფდა.