Read ქართული ბიბლია, სრული ვერსია 2 Chronicles 34 Bible Online

2 Chronicles 34 - ქართული ბიბლია, სრული ვერსია bible

2 Chronicles 34

¹რვა წლისა იყო იოშია, როცა გამეფდა და 31 წელიწადი იმეფა იერუსალიმში.

²სწორედ იქცეოდა უფლის თვალში და დავითის, მამამისის, გზას მიჰყვებოდა, არც მარჯვნივ გადაუხვევია, არც — მარცხნივ.

³თავისი მეფობის მერვე წელს, ჯერ კიდევ ყმაწვილი რომ იყო, ძიება დაუწყო დავითის, მამამისის, ღმერთს. მეთორმეტე წელს კი შეუდგა იუდასა და იერუსალიმის გაწმედას მაღლობებისაგან და აშერებისაგან, გამოქანდაკებული და ჩამოსხმული კერპებისაგან.

⁴მის წინაშე დაანგრიეს ბაყალების სამსხვერპლოები. აჩეხა სამზეო სვეტები, მათ ზემოთ რომ იყო აღმართული, დალეწა აშერები და გამოქანდაკებული და ჩამოსხმული კერპები მტვრად აქცია და იმათ სამარხებს გადააყარა, ვინც მსხვერპლს სწირავდნენ მათ.

⁵მათსავე სამსხვერპლოზე დაწვა მათი ქურუმების ძვლები და გაწმიდა იუდა და იერუსალიმი.

⁶მანაშეს, ეფრემისა და სიმეონის ქალაქებში, ნაფთალიმდე, ირგვლივ მათ ნაოხარებში

⁷დაანგრია სამსხვერპლოები და აშერები, მტვრად აქცია კერპები და აჩეხა სამზეო სვეტები მთელს ისრაელის ქვეყანაში და იერუსალიმში დაბრუნდა.

⁸თავისი მეფობის მეთორმეტე წელს, მას შემდეგ, რაც ქვეყანა და უფლის სახლი გაწმინდა, უფლის, თავისი ღმერთის, სახლის შესაკეთებლად გაგზავნა შაფან აცალიას ძე, ქალაქის თავი მაყასეია და მწერალი იოახ იოახაზის ძე.

⁹მივიდნენ ხილკია მღვდელმთავართან და მისცეს უფლის სახლში შეგროვილი ვერცხლი, რომელიც ლევიანებმა და ზღურბლის მცველებმა აკრიფეს მანაშეს, ეფრემის, სხვა ისრალიანების, მთელი იუდასა და ბენიამინის ხელიდან და დაბრუნდნენ იერუსალიმს.

¹⁰ხელში ჩააბარეს სამუშაოთა შემსრულებლებს, რომელნიც უფლის სახლში იყვნენ განწესებულნი. ისინი აძლევდნენ მას სამუშაოთა შემსრულებლებს, რომელნიც უფლის სახლში მუშაობდნენ მის შეკეთებასა და გამაგრებაზე.

¹¹ისინი კი ურიგებდნენ ხუროებსა და მშენებლებს, რათა ეყიდათ გათლილი ქვები და მორები კოჭებისთვის და სახლების გადასახურავად, იუდას მეფეებმა რომ დაანგრიეს.

¹²ხალხი პატიოსნად ასრულებდა სამუშაოს. თავზე ეყენათ იახათი და ყობადიაჰუ — ლევიანები მერარიანთაგან, ზაქარია და მეშულამი — კოჰათიანთაგან, და ლევიანები, ყველანი, ვინც საკრავების დაკვრაში იყვნენ გაწაფულნი.

¹³მტვირთავებზეც იყვნენ დადგენილნი და თვალყურს ადევნებდნენ ყველა სამუშაოს შემსრულებელს და ყველა საქმეს. ლევიანთაგან იყვნენ: მწერლები, ზედამხედველები და კარისმცველები.

¹⁴როცა უფლის სახლში მიტანილი ვერცხლი გამოჰქონდათ, ხილკია მღვდელმა მოსეს ხელით მოცემული უფლის რჯულის წიგნი იპოვა.

¹⁵უთხრა ხილკიამ შაფან მწერალს: „რჯულის წიგნი ვიპოვე უფლის სახლში.“ და ჩააბარა ხილკიამ წიგნი შაფან მწერალს.

¹⁶შაფან მწერალმა მეფეს წაუღო წიგნი, თან ამბავი მიუტანა და უთხრა: „ყველაფერს აკეთებენ შენი მსახურნი, რაც დავალებული აქვთ.

¹⁷გადმოყარეს ვერცხლი, რაც კი უფლის სახლში აღმოჩნდა, და ხელში ჩააბარეს ზედამხედველებსა და სამუშაოთა შემსრულებლებს.“

¹⁸ამბავი მიუტანა შაფან მწერალმა მეფეს და უთხრა: „წიგნი მომცა მღვდელმა ხილკიამ.“ და წაიკითხა მეფის წინაშე.

¹⁹როცა მეფემ მოისმინა რჯულის სიტყვები, სამოსელი შემოიხია.

²⁰და უბრძანა მეფემ ხილკიას, ახიკამ შაფანის ძეს, ყაბდონ მიქას ძეს, შაფან მწერალს, ყასაიას, მეფის მსახურს:

²¹„წადით და შეეკითხეთ უფალს ჩემზე, ისრაელში და იუდაში დარჩენილებზე და ნაპოვნი წიგნის სიტყვებზე, რადგან დიდია უფლის რისხვა, თავს რომ დაგვატყდა, რადგან არ დაიცვეს ჩვენმა მამებმა უფლის სიტყვები, რომ მოქცეულიყვნენ ყოველივე იმის მიხედვით, რაც ამ წიგნში სწერია.“

²²წავიდნენ ხილკია და, ვისაც მეფემ უბრძანა, ხულდა წინასწარმეტყველთან, ცოლთან შალუმისა, ძისა თოკჰათისა, ძისა ხასრასი, სამოსლის მცველისა (ქალი იერუსალიმის მეორე ნაწილში ცხოვრობდა) და ელაპარაკნენ ამის თაობაზე.

²³უთხრა მათ: „ასე ამბობს უფალი, ღმერთი ისრაელისა: უთხარით იმ კაცს, ვინც ჩემთან გამოგაგზავნათ:

²⁴ასე ამბობს-თქო უფალი: ‘აჰა, უბედურებას დავატეხ იმ ადგილს, მის მკვიდრებს კი — იმ წყევლა-კრულვას, რაც ამ წიგნში სწერია, იუდას მეფის წინაშე რომ წაიკითხეს.

²⁵რაკი მიმატოვეს და სხვა ღმერთებს უკმიეს საკმეველი ჩემს გასარისხებლად თავიანთი ხელის ნამოქმედარით, ამიტომ ჩემი რისხვა გადმოიღვრება იმ ადგილზე და აღარ დაცხრება.

²⁶იუდას მეფეს კი, უფლის საძიებლად რომ გამოგაგზავნათ, ასე უთხარით: ასე ამბობს-თქო უფალი, ღმერთი ისრაელისა, იმ სიტყვათა თაობაზე, შენ რომ მოისმინე:

²⁷რაკი გული მოგილბა და თავი მოიდრიკე ღვთის წინაშე, რაც მისი სიტყვები მოისმინე ამ ადგილისა და მისი მკვიდრების თაობაზე, და მოდრკი ჩემს წინაშე, სამოსელი შემოიხიე და ტიროდი ჩემს წინაშე, მეც ამიტომ შეგიწყნარე, — ამბობს უფალი. —

²⁸აჰა, მოგასვენებ შენს მამებთან, მშვიდობით შეერთვები შენს სამარხს და აღარ იხილავენ შენი თვალები ყველა იმ უბედურებას, რომელსაც ამ ადგილს და მის მკვიდრებს დავატეხო.’“ მიუტანეს მეფეს სიტყვა.

²⁹დაგზავნა მეფემ და შეკრიბა მთელი იუდასა და იერუსალიმის უხუცესობა.

³⁰ავიდა მეფე უფლის სახლში და მასთან მთელი იუდა და იერუსალიმის მკვიდრნი, მღვდლები, ლევიანები, და მთელი ერი დიდიდან პატარამდე. მათ გასაგონად წაიკითხა უფლის სახლში ნაპოვნი აღთქმის წიგნის ყოველი სიტყვა.

³¹დადგა მეფე თავის ადგილზე და აღთქმა დადო უფლის წინაშე, რომ გაჰყვებოდა უფალს, დაიცავდა მის მცნებებს, მოწმობებს და წესებს მთელი თავისი გულითა და სულით, ამ წიგნში ჩაწერილი აღთქმის სიტყვების შესასრულებლად.

³²დაუდგინა იგი ყველას, ვინც იერუსალიმსა და ბენიამინში იმყოფებოდნენ. და იქცეოდნენ იერუსალიმის მკვიდრნი ღმერთის, მათი მამების ღმერთის, აღთქმის თანახმად.

³³განაგდო იოშიამ ყოველი სიბილწე ისრაელიანთა ყველა ქვეყნიდან და უფალს, მათ ღმერთს, ამსახურა ყველა, ვინც კი ისრაელში იმყოფებოდა. თავის დღეში აღარ განდგომიან უფალს, თავიანთი მამების ღმერთს.