Read ქართული ბიბლია, სრული ვერსია 2 Chronicles 5 Bible Online

2 Chronicles 5 - ქართული ბიბლია, სრული ვერსია bible

2 Chronicles 5

¹დაამთავრა ყველა საქმე, რასაც უფლის ტაძრისათვის აკეთებდა სოლომონი; და მოიტანა მამამისისგან შემოწირული: ვერცხლი, ოქრო და ყოველგვარი სხვა ჭურჭელი, და ღვთის სახლის საგანძურში დააწყო,

²მაშინ შეკრიბა სოლომონმა იერუსალიმში ისრაელის უხუცესობა და ტომთა ყველა თავკაცი, ისრაელიანთა მამისსახლთა თავკაცი, რომ გადმოესვენებინათ უფლის აღთქმის კიდობანი დავითის ქალაქიდან, ანუ სიონიდან.

³და შეიყარა სოლომონ მეფესთან მთელი ისრაელი სადღესასწაულოდ მეშვიდე თვეში,

⁴და მოვიდა ისრაელის მთელი უხუცესობა და ლევიანებმა ასწიეს კიდობანი,

⁵და წაასვენეს კიდობანი და სადღესასწაულო კარავი და ყველა წმიდა ჭურჭელი, კარავში რომ ინახებოდა. და წაასვენეს ისინი მღვდლებმა და ლევიანებმა.

⁶მეფე სოლომონი და მთელი ისრაელის კრებული, რომელიც მასთან შეიკრიბა კიდობნის წინ, მსხვერპლად სწირავდნენ ცხვრებსა და კურატებს, რომელსაც სათვალავი არ ჰქონდა.

⁷და დაასვენეს მღვდლებმა უფლის აღთქმის კიდობანი მისთვის განკუთვნილ ადგილზე ტაძრის დაბირში, წმიდათა წმიდაში, ქერუბიმთა ფრთებქვეშ,

⁸რადგან ფრთები ჰქონდათ გაშლილი ქერუბიმებს კიდობნის ადგილზე, და ზემოდან ფარავდნენ კიდობანს და მის კეტებს.

⁹კეტები იმ სიგრძისა იყო, რომ მითი ბოლოები კიდობანს სცდებოდა, დაბირის წინ, გარეთ კი არ ჩანდა, და დღემდე იქ არის ისინი.

¹⁰არაფერი არ იყო კიდობანში გარდა ორი ქვის დაფისა, მოსემ რომ ჩააწყო ხორების მთაზე, როცა კავშირი შეკრა უფალმა ისრაელიანებთან ეგვიპტიდან მათი გამოსვლის შემდეგ.

¹¹და გამოვიდნენ მღვდლები წმიდადან, რადგან ყველა იქ მყოფი მღვდელი განიწმიდა, განურჩევლად დასებისა;

¹²ასევე ყველა მგალობელი ლევიანი: ასაფი, ჰემანი, იედუთუნი, მათი ძენი და მათი ძმანი — სელით შემოსილნი, წინწილებით, ქნარებით, ებნებით სამსხვერპლოს აღმოსავლეთით მდგარნი, მათთანვე 120 მესაყვირე მღვდელი,

¹³ხმაშეწყობილნი იყვნენ მესაყვირენი და მგალობელნი, რათა ერთხმად ეგალობათ უფლისთვის და ედიდებინათ, და როცა იქუხა საყვირების და წინწილების ხმამ, უფლის ქებით: „რადგან კეთილია იგი, რადგან უკუნისამდეა წყალობა მისი.“ მაშინ უფლის სახლი ღრუბელმა აავსო,

¹⁴და ვეღარ შეძლეს მღვდლებმა იქ დგომა და სამსახურის გაწევა ღრუბლის გამო, რადგან უფლის დიდებამ აავსო ღვთის სახლი.