Read ქართული ბიბლია, სრული ვერსია Ezra 10 Bible Online

Ezra 10 - ქართული ბიბლია, სრული ვერსია bible

Ezra 10

¹და როცა ეზრა უფლის ტაძრის წინ მუხლმოყრილი ლოცულობდა ტირილით და აღსარებას ამბობდა, თავი მოიყარა მის გარშემო ისრაელიანთა დიდძალმა კრებულმა: კაცებმა, ქალებმა და ბავშვებმა, რადგან ხალხიც მწარედ ტიროდა.

²და მიუგო ყელამელმა შექანიამ, იეხიელის ძემ, და უთხრა ეზრას: „დანაშაული ჩავიდინეთ ჩვენი ღმერთის წინაშე და უცხოელი ქალები დავისვით ცოლებად ამ ქვეყნის ხალხთაგან, მაგრამ, მიუხედავად ამისა, არის იმედი ისრაელიანთათვის ამ საქმეში!

³ახლა აღთქმა დავუდვათ ჩვენს ღმერთს, რომ ყველანი გავუშვებთ ცოლებსა და მათგან შობილ ბავშვებს ჩემი უფლისა და ჩვენი ღმერთის მცნებების მოშიში ხალხის რჩევით, — იყოს, როგორც რჯული ამბობს.

⁴ადექი, რადგან შენზეა ეს საქმე და ჩვენც შენთან ვართ. გამხნევდი და იმოქმედე!“

⁵და ადგა ეზრა და სთხოვა მღვდლების, ლევიანებისა და მთელი ისრაელის უფროსებს, მიეცათ ფიცი, რომ ასე იზამდნენ. და მათ დადეს ფიცი.

⁶და ადგა ეზრა ღვთის ტაძრიდან და წავიდა იეჰოხანანის, ელიაშიბის ძის, სენაკისაკენ, და მივიდა იქ. პური არ უჭამია და წყალი არ დაულევია, რადგან ტყვედნამყოფი ხალხის ურჯულოებას გლოვობდა.

⁷და გამოუცხადეს იუდასა და იერუსალიმში მყოფ ყველა ტყვედნამყოფს, რათა იერუსალიმში მოეყარათ თავი.

⁸და ყველას, ვინც სამ დღეში არ მოვიდოდა, მთავართა და უხუცესთა გადაწყვეტილებით ჩამოერთმეოდა მთელი ქონება და მოიკვეთებოდა ტყვედნამყოფთა კრებულიდან.

⁹და სამ დღეში იერუსალიმში თავი მოიყარა ბენიამინისა და იუდას ყველა მამაკაცმა; ეს იყო მეცხრე თვის მეოცე დღეს. ისხდა მთელი ხალხი ღვთის ტაძრის მოედანზე და კანკალებდა, როგორც ამ ამბის, ისე თავსხმა წვიმის გამო.

¹⁰და ადგა ეზრა მღვდელი და უთხრა მათ: „თქვენ დანაშაული ჩაიდინეთ და უცხოთესლთა ქალები დაისხით ცოლებად, რითაც გაზარდეთ ისრაელის დანაშაული.

¹¹და ახლა მოინანიეთ უფლის, თქვენი მამების ღმერთის, წინაშე და აღასრულეთ მისი ნება: განუდექით ამ ქვეყნის ხალხებს და უცხოელ ცოლებს.“

¹²და მიუგო მთელმა კრებულმა და უთხრა დიდი ხმით: „ისე იქნება, როგორც შენ თქვი!

¹³მაგრამ ხალხი ბევრია და წვიმიანობის დროა, და აღარ შეგვიძლია გარეთ დგომა; თანაც ეს ერთი-ორი დღის ამბავი არ არის, რადგან ჩვენ ბევრი შეგვიცოდავს ამ საქმეში.

¹⁴დადგნენ ჩვენი თავკაცები მთელი კრებულის ნაცვლად, ხოლო ყველა, ვისაც ჩვენ ქალაქებში უცხოელი ცოლები ჰყავთ, მოვიდნენ დანიშნულ დროზე თავიანთი ქალაქების უხუცესებთან და მსაჯულებთან ერთად, ვიდრე აგვცილდება ჩვენი ღვთის რისხვა ამ ამბის გამო.“

¹⁵მხოლოდ იონათან ყასაელის ძე და იახზეია თიკვას ძე გამოვიდნენ ამის წინააღმდეგ; მეშულამი და ლევიანი შაბეთაი უჭერდნენ მათ მხარს.

¹⁶ასე გააკეთეს ტყვეობიდან დაბრუნებულებმა. ეზრა მღვდელმა ამისთვის გამოარჩია კაცები, თავ-თავისი მამისსახლების მიხედვით, და ყველა მათგანი თავისი სახელით იყო ჩაწერილი. და დასხდნენ ისინი მეათე თვის პირველ დღეს ამ საქმის გამოსაძიებლად.

¹⁷და მორჩნენ პირველი თვის პირველი დღისათვის ყველა იმ მამაკაცის საქმეს, რომელთაც უცხოელი ცოლები ჰყავდათ.

¹⁸სამღვდელოთა შთამომავლებში, რომელთაც უცხოელი ცოლები ჰყავდათ, აღმოჩნდნენ: იესო იოცადაკის ძის ძენი და მისი ძმები: მაყასეია, ელიყეზერი, იარიბი და გედალია;

¹⁹მათ ხელი მისცეს იმის დასტურად, რომ გაუშვებდნენ ცოლებს, და რომ თავისი დანაშაულის გამო ვერძებს შესწირავდნენ ცოდვის მსხვერპლად.

²⁰და იმერის ძეთაგან: ხანანი და ზებადია;

²¹და ხარიმის ძეთაგან: მაყასეია, ელია, შემაყია, იეხიელი, ყუზია;

²²და ფაშხურის ძეთაგან: ელიოყენაი, მაყასეია, ისმაელი, ნეთანელი, იოზაბადი და ელყასა;

²³და ლევიანთაგან: იოზაბადი, შიმეყი, კელაია, იგივე კელიტა, ფეთახია, იუდა და ელიყეზერი;

²⁴და მგალობელთაგან: ელიაშიბი; და კარის მცველთაგან: შალუმი, ტელემი და ხური;

²⁵და ისრაელიანთაგან, — ფარყოშის ძენი: რამია, იზია, მალქია, მიამინი, ელეაზარი, მალქია, ბენაია;

²⁶ყელამის ძეთაგან: მათანია, ზაქარია, იეხიელი, ყაბდი, იერემოთი, ელია;

²⁷ზათუს ძეთაგან: ელიოყენაი, ელიაშიბი, მათანია, იერემოთი, ზაბადი, ყაზიზა;

²⁸ბებაის ძეთაგან: იეჰოხანანი, ხანანია, ზაბაი, ყათლაი;

²⁹ბანის ძეთაგან: მეშულამი, მალუქი, ყადაია, იაშუბი, შეალი, იერემოთი;

³⁰და ფახათ-მოაბის ძეთაგან: ყადნა, ქელალი, ბენაია, მაყასეია, მათანია, ბეცალელი, ბინუი და მანაშე;

³¹ხარიმის ძეთაგან: ელიყეზერი, იშია, მალქია, შემაყია, შიმყონი,

³²ბენიამინი, მალუქი, შემარია;

³³ხაშუმის ძეთაგან: მათენაი, მათათა, ზაბადი, ელიფელეტი, იერემაი, მანაშე, შიმეყი;

³⁴ბანის ძეთაგან: მაყადაი, ყამრამი, უელი,

³⁵ბენაია, ბედია, ქელუჰი,

³⁶ვანია, მერემოთი, ელიაშიბი,

³⁷მათანია, მათენაი და იაყასუ,

³⁸ბანი, ბინუი შიმეყი,

³⁹შელემია, ნათანი, ყადაია,

⁴⁰მაქნადებაი, შაშაი, შარაი,

⁴¹ყაზარელი, შელემია, შემარია,

⁴²შალუმი, ამარია, იოსები,

⁴³ნებოს ძეთაგან: იეყიელი, მათითია, ზაბადი, ზებინა, იადაი, იოელი და ბენაია.

⁴⁴ყველა ამათ უცხოელი ცოლები ჰყავდათ. ზოგიერთებს მათი ცოლებიდან შვილებიც შესძენოდათ.