Read ქართული ბიბლია, სრული ვერსია Ezra 5 Bible Online

Ezra 5 - ქართული ბიბლია, სრული ვერსია bible

Ezra 5

¹წინასწარმეტყველებმა ანგიამ და ზაქარია ყიდოს ძემ იუდასა და იერუსალიმში მცხოვრებ იუდაელებს ისრაელის ღმერთის სახელით უწინასწარმეტყველეს.

²მაშინ ადგნენ ზერუბაბელ შეალთიელის ძე და იესო იოცადაკის ძე, და შეუდგნენ ღმერთის ტაძრის შენებას იერუსალიმში. და მათთან იყვნენ ღვთის წინასწარმეტყველნი, რომელნიც განამტკიცებდნენ მათ.

³მაშინ მოვიდნენ მათთან მდინარისგაღმელი განმგებელი თათენაი და შეთარ-ბოზენაი, და მათი თანამოაზრენი და უთხრეს მათ: „ვინ მოგცათ ბრძანება ამ ტაძრის აშენებისა და ამ კედლების დასრულებისა?“

⁴მაშინ ვუთხარით მათ იმათი სახელები, ვინც ამ შენობას აგებდნენ.

⁵და მათი ღვთის თვალი იყო იუდაელთა უხუცესებზე, და მათაც არ შეუწყვეტინებიათ მათთვის მუშაობა, ვიდრე შეტყობინება მიუვიდოდა დარიოსს და ვიდრე საპასუხო წერილს მიიღებდნენ ამ საქმეზე.

⁶აი, პირი იმ წერილისა, რომელიც მეფე დარიოსს გაუგზავნეს თათენაიმ, მდინარისგაღმელმა განმგებელმა, და შეთარ-ბოზენაიმ და მათმა თანამოაზრე აფარსახელმა ხელისუფლებმა, რომლებიც იმ დროს მდინარის გღმა იყვნენ.

⁷შეტყობინებაში, რომელიც მათ გაუგზავნეს, ნათქვამი იყო: „მშვიდობა ნუ მოაკლოს მეფე დარიოსს!

⁸უწყოდეს მეფემ, რომ ჩვენ ვიყავით იუდას მხარეში, დიდი ღვთის სახლთან. იგი შენდება თლილი ქვით და კედლებში ჩამოგანულ[4] მორებს ატანენ, მუშაობა მათ ხელში სწრაფად და გამართულად მიდის.

⁹ჩვენ ვკითხეთ მათ უხუცესებს და ასე ვუთხარით: ‘ვინ მოგცათ ამ სახლის შენებისა და ამ კედლების ამოყვანის ბრძანება?’

¹⁰და გამოვიკითხეთ მათი სახელები, რომ გვეცნობებინა შენთვის და დაგვეწერა იმათი სახელებიც, ვინც სათავეში უდგანან მათ.

¹¹მათ კი ასეთი პასუხი გაგვცეს: ‘ჩვენ ვართ მსახურნი ცისა და მიწის ღმერთისა; თავიდან ვაშენებთ ტაძარს, რომელიც მრავალი წლის წინ იდგა აქ, და რომელიც ისრაელის დიდმა მეფემ ააგო და სრულქმნა.

¹²მაგრამ, მას შემდეგ, რაც ჩვენმა მამებმა განარისხეს ცათა ღმერთი, მან ბაბილონის მეფის, ქალდეველი ნაბუქოდონოსორის, ხელში ჩაყარა ისინი, რომელმაც ეს ტაძარი დაანგრია და ხალხი ბაბილონში გადაასახლა.

¹³მაგრამ ბაბილონში კიროსის გამეფის პირველივე წელს მეფე კიროსმა გასცა ბრძანება ამ ღვთის სახლის აშენებისა.

¹⁴და ღვთის სახლის ოქროსა და ვერცხლის ჭურჭელი, რაც ნაბუქოდონოსორმა გაზიდა იერუსალიმის ტაძრიდან და წაიღო ბაბილონის ტაძარში, უკან გამოიტანა კიროს მეფემ და გადასცა იგი შეშბაცარს, რომელიც მხარის განმგებლად დასვა მან.

¹⁵და უთხრა მას: აიღეო ეს ჭურჭელი, წადი და წაიღე იერუსალიმის ტაძარში, და აშენდეს ღვთის სახლი თავის ადგილზეო.

¹⁶მაშინ მოვიდა ის შეშბაცარი და საძირკველი ჩაუყარა ღვთის სახლს იერუსალიმში; და იმ დღიდან მოკიდებული აქამდე შენდება ის, მაგრამ ჯერ არ დასრულებულა.’

¹⁷და ახლა, თუ მეფე ინებებს, მოჩხრიკონ მეფის საგანძური იქ, ბაბილონში, ნამდვილად გასცა თუ არა კიროს მეფემ განკარგულება ამ ღვთის სახლის აშენებისა იერუსალიმში, და მეფის ის გადაწყვეტილება ამ საქმის თაობაზე გამოგვიგზავნონ.“