Read ქართული ბიბლია, სრული ვერსია Ezra 6 Bible Online

Ezra 6 - ქართული ბიბლია, სრული ვერსია bible

Ezra 6

¹მაშინ დარიოს მეფემ გასცა ბრძანება, გადაესინჯათ საგანძურთსაცავები ბაბილონში, სადაც წიგნებიც უნდა ყოფილიყო.

²და იპოვეს ეკბატანაში, მიდიის მხარის ციხე-ქალაქში, ერთი გრაგნილი, რომელზედაც ეწერა: „ძეგლის-წერა —

³მეფე კიროსის მეფობის პირველ წელს მეფე კიროსმა გასცა ბრძანება ღვთის სახლის იერუსალიმში ხელახლა აშენების თაობაზე: დაე აშენდეს ტაძარი იმ ადგილას, სადაც მსხვერპლს სწირავენ, და მტკიცე საძირკველი ჩაეყაროს მას. სიმაღლე მისი 60 წყრთა იყოს, სიგანე მისი — 60 წყრთა;

⁴სამი რიგი დიდი გათლილი ქვა ეწყოს, და ერთი რიგი — ჩამოგანული მორი; ხარჯები კი მეფის სასახლიდან გაიცეს.

⁵ღვთის სახლის ჭურჭელიც, ოქროსი და ვერცხლისა, რაც ნაბუქოდონოსორმა გაიტანა იერუსალიმის ტაძრიდან და ბაბილონში წაიღო, უკან იქნას დაბრუნებული თავის ადგილზე, იერუსალიმის ტაძარში, და ღვთის სახლში იქნას დაბინავებული.

⁶და ახლა, თათენაი, მდინარისგაღმელო განმგებელო, შეთარ-ბოზენაი, შენი თანამდგომი მდინარისგაღმელი აფარსახელებიანად, დაეხსენით მათ!

⁷დაანებეთ ღვთის სახლზე მუშაობა! იუდას განმგებელმა და მათმა უხუცესებმა ააშენონ ეს ღვთის სახლი თავის ძველ ადგილას.

⁸და ვიძლევი ბრძანებას იმის თაობაზე, კერძოდ, რით უნდა შეეწიოთ იუდას უხუცესებს, ღვთის სახლის შენებაში: სამეფო ქონებიდან — მდინარისგაღმა მხარის ხარკიდან — დაუყოვნებლივ აიღეთ და მიეცით იმ ხალხს, რათა სამუშაოები არ შეჩერდეს.

⁹და რამდენიც საჭიროა, მოზვრები იქნება, თუ ვერძები, თუ კრავები ცათა ღმერთისათვის სრულადდასაწველის აღსავლენად; ასევე ხორბალი, მარილი, ღვინო და ზეთი, როგორც იერუსალიმის მღვდლები იტყვიან, მიეცეს მათ ყოველდღიურად, შეუფერხებლივ,

¹⁰რათა მათ შესწირონ სურნელოვანი მსხვერპლები ცათა ღმერთს და ილოცონ მეფისა და მის ძეთა დღეგრძელობისათვის.

¹¹და ვბრძანებ, რომ თუ ვინმე შეცვლის ამ ბრძანებას, გამოიღონ მისი სახლის თავხე, აღმართონ და ზედ მიალურსმონ იგი, ხოლო მისი სახლი ნანგრევებად აქციონ;

¹²და ღმერთმა, რომლის სახელიც იქ არის დავანებული, დაამხოს ყოველი მეფე და ხალხი, ვინც ხელს აღმართავს ამ ბრძანების შესაცვლელად, ან ამ ღვთის სახლის საზიანოდ, რომელიც იერუსალიმშია. მე, დარიოსმა, გავეცი ეს ბრძანება; დაე, ზედმიწევნით შესრულდეს იგი!“

¹³მაშინ თათენაიმ, მდინარისგაღმელმა განმგებელმა, შეთარ-ბოზენაიმ და მათმა თანამოაზრეებმა, დარიოს მეფის მიერ გამოგზავნილი სიტყვისამებრ, ყველაფერი ზედმიწევნით შეასრულეს.

¹⁴და იუდას უხუცესნი აშენებდნენ და ხელი ემართებოდათ თანახმად წინასწარმეტყველ ანგიასა და ზაქარია ყიდოს ძის წინასწარმეტყველებისა. და ააშენეს და დაასრულეს ისრაელის ღმერთის ბრძანებისამებრ და სპარსეთის მეფეების: კიროსის, დარიოსისა და ართახშასთას ბრძანებისამებრ.

¹⁵და დასრულდა ეს ტაძარი ადარის თვის მესამე დღეს; ეს იყო მეფე დარიოსის მეფობის მეექვსე წელი.

¹⁶და ისრაელის ძეთ, მღვდლებმა, ლევიანებმა და დანარჩენმა ტყვედნამყოფმა ხალხმა სიხარულით აღასრულეს ღვთის სახლის კურთხევა.

¹⁷და შესწირეს ღვთის ამ სახლის კურთხევისათვის 100 მოზვერი, 200 ვერძი, 400 კრავი, და 12 ვაცი — ისრაელის ტომთა რიცხვის მიხედვით — მთელი ისრაელის ცოდვათა განსატევებლად.

¹⁸და დააყენეს მღვდლები თავიანთი ხარისხის მიხედვით და ლევიანები თავიანთი რიგის მიხედვით ღვთის სამსახურისათვის იერუსალიმში, როგორც დაწესებულია მოსეს წიგნში.

¹⁹და აღასრულა ტყვედნამყოფმა ხალხმა პასექი პირველი თვის მეთოთხმეტე დღეს.

²⁰რადგან განიწმიდნენ მღვდლები და ლევიანები, როგორც ერთი კაცი, ყველანი წმიდები გახდნენ, და დაკლეს საპასექო მსხვერპლი ყველა ტყვედნამყოფი ხალხისთვის, თავიანთი მოძმე მღვდლებისა და თავისთვის.

²¹ჭამდნენ გადასახლებიდან დაბრუნებული ისარელიანები და ყველა, ვინც განუდგა მათთან ერთად ქვეყნის ერის ბიწიერებას, რათა შევრდომოდნენ უფალს, ისრაელის ღმერთს.

²²და იზეიმეს უფუარობის დღესასწაული შვიდ დღეს, რადგან გაახარა ისინი უფალმა და გული მოაბრუნებინა მათკენ აშურის მეფეს, რათა მკლავი განემტკიცებინა მათთვის ისრაელის უფალი ღმერთის ტაძრის შენების საქმეში.