Read ქართული ბიბლია, სრული ვერსია Ezra 7 Bible Online

Ezra 7 - ქართული ბიბლია, სრული ვერსია bible

Ezra 7

¹და ამ ამბების შემდეგ სპარსეთის მეფის, ართახშასთას, მეფობაში ეზრა, ძე სერაიასი, ძისა ყაზარიასი, ძისა ხილკიასი,

²ძისა შალუმისა, ძისა ცადოკისა, ძისა ახიტუბისა,

³ძისა ამარიასი, ძისა ყაზარიასი, ძისა, მერაიოთისა,

⁴ძისა ზერახიასი, ძისა ყუზისა, ძისა ბუკისა,

⁵ძისა აბიშუაყისა, ძისა ფინეხასისა, ძისა ელეაზარისა, ძისა აარონისა, მღვდელმთავრისა, —

⁶ეს ეზრა, რომელიც გამოვიდა ბაბილონიდან, იყო მწიგნობარი, მოსეს რჯულში ჩახედული, რომელიც მისცა უფალმა, ისრაელის ღმერთმა. და მისცა მას მეფემ ყოველივე, რაც ითხოვა, რადგან უფლის, მისი ღმერთის, ხელი იყო მასზე.

⁷ართახშასთა მეფის მეფობის მეშვიდე წელს იერუსალიმში დაბრუნდნენ ისრაელიანთაგან, მღვდელთაგან, ლევიანთაგან, მგალობელთაგან, კარისმცველთაგან და ტაძრის მსახურთაგან ზოგიერთები.

⁸და მივიდა ეზრა იერუსალიმში მეფის მეშვიდე წლის მეხუთე თვეს.

⁹რადგან მან პირველი თვის პირველ დღეს დაიწყო გამოსვლა ბაბილონიდან და მეხუთე თვის პირველ დღეს დაბრუნდა იერუსალიმში, რადგან მისი ღმერთის კეთილი ხელი იყო მასზე.

¹⁰რადგან ეზრამ გულს-იდვა უფლის რჯულის ძიება, მისი შესრულება და წესისა და სამართლის სწავლება ისრაელში.

¹¹და აჰა, პირი წერილისა, რომელიც მისცა მეფე ართახშასთამ ეზრას, რომელიც იყო მღვდელი, მწიგნობარი, განსწავლული უფლის მცნებების და მის წესთა მოძღვარი ისრაელში:

¹²„ართახშასთა, მეფეთა მეფე, ეზრა მღვდელს, ცათა ღმერთის რჯულის მწიგნობარს, სრული მშვიდობა!

¹³მე ვბრძანე, რომ თუ ვინმეს, ჩემს სამეფოში მყოფ ისრაელიანთა მღვდლებსა და ლევიანთ სურთ იერუსალიმში წასვლა, შენთან ერთად წამოვიდნენ.

¹⁴რადგან შენ იგზავნები მეფისა და მისი შვიდი მრჩევლისგან, რათა იხილო იუდასა და იერუსალიმში როგორ სრულდება შენი ღმერთის რჯული, რომელიც შენ ხელთა გაქვს;

¹⁵და რომ წაიღო იქ ვერცხლი და ოქრო, რომელიც მეფემ და მისმა მრჩევლებმა შესწირეს ისრაელის ღმერთს, რომლის სავანეც იერუსალიმშია,

¹⁶და მთელი ვერცხლი და ოქრო, რასაც შენ შეაგროვებ მთელი ბაბილონის მხარეში, იმ ერისკაცთა და მღვდელთა შემოწირულობასთან ერთად, რაც ნებაყოფლობით შესწირეს თავიანთი ღვთის სახლს იერუსალიმში.

¹⁷ამიტომ დაუყოვნებლივ იყიდე ამ ვერცხლით ზვარაკები, ვერძები და კრავები, აგრეთვე პურეულის შესაწირავი მათთან ერთად, და საღვრელი მათთვის, და მიიტანე ის თქვენი ღვთის ტაძრის სამსხვერპლოზე იერუსალიმში.

¹⁸და დანარჩენი ვერცხლითა და ოქროთი, თქვენი ღმერთის ნებით შენ და შენმა მოძმეებმა ის გააკეთეთ, რასაც კეთილგონივრულად ჩათვლით.

¹⁹და ჭურჭელი, რომელიც შენი ღმერთის ტაძრის მღვდელმსახურების აღსასრულებლად მიიღე, უკლებლივ მიიტანე იერუსალიმის ღმერთის წინაშე.

²⁰და დანარჩენი, რაც საჭიროა შენი ღვთის ტაძრისათვის, რასაც შენ საჭიროდ ჩათვლი, გაეცი სამეფო საგანძურებიდან.

²¹და მე, მეფე ართახშასთა, ვიძლევი განკარგულებას მდინარისგაღმელ ყველა მეგანძურის მიმართ, რომ რასაც მოგთხოვთ ეზრა მღვდელი, ცათა ღმერთის მწიგნობარი, დაუყოვნებლივ მიეცით:

²²ვერცხლი 100 ტალანტი, ხორბალი 100 ქორი, ღვინო 100 ბათი, ზეთიც 100 ბათი, ხოლო მარილი, რამდენიც საჭირო იქნება.

²³ყოველი, რაც ნაბრძანებია ცათა ღმერთისაგან, აღსრულდეს ზუსტად ცათა ღმერთის ტაძრისათვის, რათა არ დაატყდეს რისხვა სამეფოს, მეფეს და უფლისწულთ.

²⁴და გაცნობებთ, რომ არც ერთ მღვდელს, ლევიანს, მგალობელს, კარისმცველს, ტაძრის მსახურს, და ვინც ამ ღვთის სახლს ემსახურება, არ უნდა დაეკისროს ხარკი, გადასახადი და ბეგარა.

²⁵ხოლო შენ, ეზრა, შენი ღვთის სიბრძნისამებრ, რაც შენ გაგაჩნია, დანიშნე მმართველნი და მსაჯულნი, რათა განსაჯონ მთელი მდინარისგაღმელი ხალხი და ყველა, ვინც იცის შენი ღმერთის კანონები, ხოლო ვინც არ იცის, ასწავლეთ.

²⁶და ვინც არ აღასრულებს შენი ღვთის სჯულსა და მეფის კანონებს, დაუყოვნებლივ აღასრულონ მასზე სამართალი: სიკვდილი ან განდევნა, ფულადი გადასახადი ან დაპატიმრება.“

²⁷კურთხეულ იყოს უფალი, ჩვენი მამების ღმერთი, რომელმაც მეფეს შთააგონა, რომ უფლის ტაძარი იერუსალიმში ასე დიდებულად შეემკო,

²⁸და ჩემსკენაც მომართა მოწყალება მეფისა, მისი მრჩევლებისა და მამაცი მთავრებისა; და მეც გავმაგრდი, რადგან უფლის, ჩემი ღმერთის, ხელი იყო ჩემზე; და შევკრიბე ისრაელიანთა მთავრები, რათა ჩემთან ერთად დაბრუნებულიყვნენ.