Read ქართული ბიბლია, სრული ვერსია Esther (Hebrew) 6 Bible Online

Esther (Hebrew) 6 - ქართული ბიბლია, სრული ვერსია bible

Esther (Hebrew) 6

¹იმ ღამეს ძილი გაუკრთა მეფეს. და ბრძანა მოეტანათ ყოველდღიური ამბების ჩანაწერების წიგნი, და როდესაც ის წაკითხულ იქნა მეფის წინაშე,

²აღმოჩნდა ჩანაწერი თუ როგორ ამხილა მორდექაიმ ბიგთანა და თერეში, მეფის ორი საჭურისი, ზღურბლის მცველნი, რომელთაც მეფე ახაშვეროშზე ხელის აღმართვა ჰქონდათ განზრახული.

³და თქვა მეფემ: რა პატივი და დიდება მიაგესო მორდექაის ამისათვის? და მოახსენეს მეფეს მისმა მსახურებმა: მას არაფერი რგებიაო.

⁴და იკითხა მეფემ: ვინ არისო ეზოში? ხოლო ჰამანი იყო მოსული მეფესთან იმის სათქმელად, რომ ჩამოეხრჩოთ მორდექაი მისთვის გამზადებულ ძელზე.

⁵და მოახსენეს მეფის მსახურებმა მას: აჰა, ჰამანი დგასო ეზოში. და ბრძანა მეფემ: შემოვიდესო.

⁶და შევიდა ჰამანი, და ჰკითხა მას მეფემ: რა ვუყოთ კაცს, ვისი პატივისცემაც სურს მეფეს? და გაიფიქრა ჰამანმა გულში: ვისი პატივისცემა უნდა სურდეს მეფეს, თუ არა ჩემიო?

⁷და უთხრა მეფეს: იმ კაცს, ვისი პატივისცემაც სურს მეფეს,

⁸უბოძონ სამეფო მოსასხამი, რომელიც ემოსა მეფეს, და ცხენი, რომელზეც იგი იჯდა, როცა გვირგვინი უკურთხეს.

⁹ხელში მისცენ მოსასხამი და ცხენი მეფის ყველაზე დიდებულ მთავარს; შემოსონ ის კაცი, ვისი პატივისცემაც სურს მეფეს; გაატარონ ცხენით ქალაქის მოედანზე და იყვირონ მის წინაშე: ასე ექცევიან მას, ვისაც მეფე მიაგებსო პატივს!

¹⁰და უბრძანა მეფემ ჰამანს: ახლავე აიღეო მოსასხამი და ცხენი, როგორც თქვი, და ასე მოექეცი მორდექაის, იუდაელს, მეფის კარიბჭესთან რომ ზის; არაფერი დააკლოო შენს ნათქვამს.

¹¹და აიღო ჰამანმა მოსასხამი და ცხენი, შემოსა მორდექაი, ამხედრებული გაიყვანა ქალაქის მოედანზე და მის წინაშე ყვიროდა: ასე ექცევიან მას, ვისაც მეფე მიაგებსო პატივს!

¹²და დაბრუნდა მორდექაი მეფის კარიბჭესთან, ჰამანი კი გაეშურა შინისაკენ, დამწუხრებული და თავდაბურული.

¹³და უამბო ჰამანმა ზერეშს, თავის ცოლს, და ყველა თავის მეგობარს, ყველაფერი, რაც მას შეემთხვა. და უთხრეს მას მისმა ბრძენკაცებმა და ზერეშმა, მისმა ცოლმა: თუ მორდექაი, რომლის გამოც ემხობი, იუდაელთა მოდგმისაა, მაშინ ვერ დასძლევო მას, უსათუოდ დაემხობიო მის წინაშე.

¹⁴ისინი ჯერ კიდევ ამას ელაპარაკებოდნენ, რომ მოვიდნენ მეფის საჭურისები და დააჩქარეს ჰამანი, ესთერის მიერ მომზადებულ ნადიმზე წასასვლელად.