Read ქართული ბიბლია, სრული ვერსია Exodus 36 Bible Online

Exodus 36 - ქართული ბიბლია, სრული ვერსია bible

Exodus 36

¹ბეცალელს, აჰოლიაბს და ყველა ხელოვან ოსტატს უფალმა მიანიჭა სიბრძნე და გამჭრიახობა, რათა შეეცნოთ და ეკეთებინათ საწმიდრის ყველა სამუშაო, ყველაფერი ისე, როგორც უფალმა ბრძანა.

²და მოუხმო მოსემ ბეცალელს, აჰოლიაბს და ყველა ხელოვან ოსტატს, რომელთაც უფალმა უნარი მისცა, ყველას, ვისაც გული ერჩოდა შესდგომოდა საქმეს და ემუშავა.

³ჩაიბარეს მოსესგან მთელი შემოწირულობა, რაც კი მოტანილი ჰქონდათ ისრაელიანთ საწმიდრის საქმის საკეთებლად. და კვლავაც მიჰქონდათ მასთან ნებაყოფლობითი ძღვენი ყოველ დილას.

⁴და მოვიდა ყველა ხელოვანი ოსტატი საწმიდრის ყოველი სამუშაოს საკეთებლად, თითოეული თავის სამუშაოზე, ვის რისი გაკეთებაც შეეძლო.

⁵და უთხრეს მოსეს: „ხალხს მოაქვს მეტი, ვიდრე საჭიროა სამუშაოს შესასრულებლად, რისი გაკეთებაც ბრძანა უფალმა.“

⁶მაშინ ბრძანა მოსემ და გამოაცხადეს ბანაკში: „ნურც მამაკაცი, ნურც დედაკაცი ნუღარაფერს გაამზადებს საწმიდრისათვის შესაწირავად.“ და შეწყვიტა ხალხმა მოტანა.

⁷მარაგი საკმაო იყო ყველა საქმისათვის, რაც უნდა ეკეთებინათ, და ზედმეტიც კი დარჩა.

⁸ხელოვანმა ოსტატებმა, რომლებიც სავანის საქმეზე მუშაობდნენ, გააკეთეს ქსოვილის 10 ნაჭერი გრეხილი ბისონისა და ცისფერი, ძოწეული და ჭიაფერი ნართისა. ამოქარგეს ქერუბიმები მათზე ოსტატური ნაკეთობით.

⁹თითოეული ნაჭრის სიგრძე 28 წყრთა იყო, და სიგანე — ოთხი წყრთა. ყველა ნაჭერი ერთი ზომისა იყო.

¹⁰ხუთი ნაჭერი ერთმანეთს გადააკერეს, სხვა ხუთი ნაჭერიც — ერთმანეთს.

¹¹და გაუკეთეს ცისფერი კილოები განაპირა ნაჭერს კიდეზე, და ასევე გააკეთეს მეორე ნაჭრის კიდეს.

¹²50 კილო გაუკეთეს ერთი ნაჭრის კიდეს, 50 კილო — მეორე ნაჭრის კიდეს. კილოები ესადაგებოდნენ ერთმანეთს.

¹³და გააკეთეს 50 დუგმა ოქროსი, და შეაერთეს ნაჭრები ურთიერთთან დუგმებით, და მთლიანი გამოვიდა სავანე.

¹⁴და გააკეთეს გადასაფარებელი თხისურისგან, სავანის გადასახურავად. 11 ასეთი ნაჭერი გაამზადეს.

¹⁵სიგრძე თითოეული გადასაფარებლისა იყო 30 წყრთა, ხოლო სიგანე — ოთხი წყრთა. თერთმეტივე გადასაფარებლი ერთი ზომისა იყო.

¹⁶და შეაერთეს ხუთი გადასაფარებელი ცალკე და ექვსი ცალკე.

¹⁷და გაუკეთეს 50 კილო ერთ გადასაფარებელს კიდეზე, და 50 მეორე გადასაფარებელს კიდეზე.

¹⁸და გააკეთეს ბრინჯაოს 50 დუგმა სავანის შესაერთებლად, რათა ყოფილიყო ერთიანი.

¹⁹და გააკეთეს საფარველი კარვისათვის ვერძის დათრიმლული ტყავისა და გამოყვანილი ტყავის საფარი ზემოდან.

²⁰და გააკეთეს კეტები სავანისათვის აკაციის ხისაგან.

²¹10 წყრთა იყოს სიგრძე თითოეული ძელისა და წყრთანახევარი — სიგანე,

²²ორ-ორი რიკი თითოეული ძელისათვის, ერთიმეორეზე მიერთებული. ასე გაუკეთეს სავანის ყოველ ძელს.

²³და გააკეთეს კეტები სავანისათვის: 20 ძელი სამხრეთის მხარეს.

²⁴და ვერცხლის 40 კვარცხლბეკი გააკეთეს ოცივე ძელის დასადგმელად: ორი კვარცხლბეკი თითო ძელისთვის, მისი ორი რიკისთვის და ორი კვარცხლბეკი ყველა სხვა ძელისთვის მისი ორი რიკისთვის.

²⁵და სავანის მეორე გვერდისათვის, ჩრდილოეთ მხარეს, გაუკეთეს 20 ძელი

²⁶და მათთვის ვერცხლის 40 კვარცხლბეკი: ორ-ორი კვარცხლბეკი თითო ძელისთვის.

²⁷სავანის უკანა, დასავლეთი მხარისათვის, გააკეთეს ექვსი ძელი.

²⁸და ორი ძელი გააკეთეს სავანის კუთხეებისთვის, უკანა მხარეს.

²⁹იყო ისინი შეკრული ქვემოდან და ზემოდან თითო რგოლით. ასე გაუკეთეს ორივეს ორივე კუთხეში.

³⁰და იყო რვა ძელი და ვერცხლის 16 კვარცხლბეკი, ორ-ორი კვარცხლბეკი თითოეული ძელისთვის.

³¹და გააკეთეს ლარტყები აკაციის ხისაგან: ხუთი — სავანის ერთი გვერდის კეტებისათვის,

³²და ხუთი ლარტყი სავანის მეორე მხარის კეტებისათვის, და ხუთი — სავანის უკანა მხარის კეტებისათვის, დასავლეთით.

³³და გააკეთეს შუა ლარტყი კეტების ერთი ბოლოდან მეორემდე.

³⁴მოჭედეს კეტები ოქროთი, ლარტყების გასაყრელი რგოლები ოქროსი გააკეთეს და ლარტყებიც ოქროთი მოჭედეს.

³⁵და გააკეთეს ფარდა ცისფერი, ძოწეული და ჭიაფერი ნართისა, და გრეხილი ბისონისა. ოსტატური ნაკეთობით ამოქარგეს მასზე ქერუბიმები.

³⁶და ჩამოკიდეს იგი ოქროთი მოჭედილ აკაციის ოთხ ბოძზე, მოჭედეს ისინი ოქროთი, ოქროსი იყო მათი დუგმები. და ჩამოასხეს მათთვის ოთხი კვარცხლბეკი ვერცხლისა.

³⁷და გააკეთეს ჩამოსაფარებელი სავანის შესასვლელთან ცისფერი, ძოწეული და ჭიაფერი ნართისა, და გრეხილი ბისონისაგან, მქარგავის ნაკეთობით,

³⁸და ხუთი სვეტი მათივე დუგმებით. და მოჭედეს მათი თავები და სალტეები ოქროთი. მათი ხუთი კვარცხლბეკი კი ბრინჯაოსაგან იყო.