Read ქართული ბიბლია, სრული ვერსია Exodus 39 Bible Online

Exodus 39 - ქართული ბიბლია, სრული ვერსია bible

Exodus 39

¹ცისფერი, ძოწეული და ჭიაფერი ქსოვილისაგან შეკერეს საწესო შესამოსელი საწმიდარში სამსახურისათვის, და წმიდა შესამოსელი შეუკერეს აარონს, როგორც უბრძანა უფალმა მოსეს.

²და დაამზადა ეფოდი ოქროსაგან და ცისფერი, ძოწეული, ჭიაფერი ნართისა და გრეხილი ბისონისაგან.

³და გამოჭედეს ოქროს ფურცლები, და დაჭრეს ძაფებად, რათა შეეგრიხათ ცისფერ, ძოწეულ, ჭიაფერ ნართთან და გრეხილ ბისონთან. და მოქსოვეს ოსტატურად.

⁴მისამაგრებელი სამხრეები გაუკეთეს მას. მის ორივე კიდეზე იყო შეერთებული.

⁵მასზე შემოსაკრავი სარტყელი იმავე მასალისა და ნაკეთობისა იყო: ოქროსაგან, ცისფერი, ძოწეული, ჭიაფერი ნართისა და გრეხილი ბისონისაგან, როგორც უბრძანა უფალმა მოსეს.

⁶და დაამუშავეს სარდიონის ქვები, ჩასხეს ისინი ოქროს ბუდეებში და ზედ ამოტვიფრეს ისრაელის ძეთა სახელები.

⁷და მიამაგრა ისინი ეფოდის სამხრეებს — ისრაელის ძეთა სამახსოვრო ქვებად, როგორც უბრძანა უფალმა მოსეს.

⁸და გააკეთა სამკერდული, ოსტატურად ნახელავი, მსგავსი ეფოდის ნაკეთობისა ოქროსაგან, ცისფერი, ძოწეული, ჭიაფერი ნართისა და გრეხილი ბისონისაგან.

⁹ოთხკუთხედი იყო იგი. ორკეცი გააკეთეს სამკერდული — სიგრძით მტკაველი და სიგანით მტკაველი, ორკეცი.

¹⁰და ოთხ რიგად განალაგეს მასზე ძვირფასი ქვები: ლალი, ტოპაზი და ბივრილი — ერთი რიგი.[19]

¹¹მეორე რიგი: ზურმუხტი, საფირონი და ალმასი.

¹²მესამე რიგი: იაგუნდი, აქატი და ამეთვისტო.

¹³მეოთხე რიგი: ქრიზოლითი, სარდიონი და იასპი; ისინი ჩასხმული იყო ოქროს ბუდეებში.

¹⁴12 ქვა იყო ისრაელის ძეთა სახელების მიხედვით, და თითოეულზე 12 ტომიდან თითოს სახელი იყო ამოტვიფრული.

¹⁵გაუკეთეს სამკერდულს გრეხილი ჯაჭვები წნული ნაკეთობით, ხალასი ოქროსი.

¹⁶და გააკეთეს ოქროს ორი ბუდე და ოქროს ორი რგოლი, და მიამაგრეს ორივე რგოლი სამკერდულის ორ კიდეს.

¹⁷და გაუყარეს ოქროს ორივე წნული ორივე რგოლში სამკერდულის კიდეებზე.

¹⁸და ორივე წნულის ორივე ბოლო მიამაგრეს ორივე ბუდეს, და მიამაგრეს ისინი ეფოდის სამხრეებს წინიდან.

¹⁹და გააკეთეს ორი რგოლი ოქროსი და მიამაგრეს სამკერდულის ორ კიდეს იმ არშიაზე, რომელიც ეფოდის შიდა მხარეს არის მოქცეული.

²⁰და გააკეთეს ოქროს ორი რგოლი და მიამაგრეს ისინი ეფოდის ორივე სამხრეზე ქვემოდან, წინა მხარეს, შესაკრავთან, ზემოთ, ეფოდის სარტყელზე.

²¹და მიამაგრეს სამკერდული მისი რგოლებით ეფოდის რგოლებს ცისფერი ზონრით, რათა იყოს ეფოდის სარტყელზე და მჭიდროდ ეკვროდეს სამკერდული ეფოდს, როგორც უბრძანა უფალმა მოსეს.

²²და გაუკეთა მოსასხამი ეფოდისათვის, მთლიანად ცისფერი ქსოვილისაგან.

²³თავის გასაყოფი ჭრილი მოსასხამს შუაზე ჰქონდა, ჯაჭვის პერანგის ჭრილივით, არშია გასდევდა ჭრილს ირგვლივ, რომ არ შემორღვეულიყო.

²⁴და ამოქარგეს მოსასხამის კალთებზე ბროწეულები ცისფერი, ძოწეული, ჭიაფერი ნართით და გრეხილი ბისონით.

²⁵და გააკეთეს ხალასი ოქროს ეჟვნები, და შეაბეს ეჟვნები ბროწეულთა შორის მოსასხამის კალთებს ირგვლივ.

²⁶ეჟვანი და ბროწეული, ეჟვანი და ბროწეული მსახურების მოსასხამის კალთებს ირგვლივ, როგორც უბრძანა უფალმა მოსეს.

²⁷მოუქსოვეს კვართები ბისონისა აარონსა და მის ძეებს,

²⁸და თავსაბურველი ბისონისა, და თავსამკაულნი ბისონისა, და სელის შარვალი გრეხილი ბისონისა,

²⁹და სარტყელი გრეხილი ბისონისა და ცისფერი, ძოწეული და ჭიაფერი ნართისა, ნაქარგი, როგორც უბრძანა უფალმა მოსეს.

³⁰და გაუკეთეს სიწმიდის გვირგვინი — ხალასი ოქროს ფირფიტა, და ამოკვეთეს მასზე წარწერა ბეჭდის ტვიფარივით: „სიწმიდე უფლისა.“

³¹და მოაბეს მას ცისფერი ზონარი, რათა მიებნიათ იგი თავსაბურველზე ზემოდან, როგორც უბრძანმა უფალმა მოსეს.

³²ასე დასრულდა საკრებულო სავანის მთელი სამუშაო. ყველაფერი ისე გააკეთეს ისრაელიანთ, როგორც უბრძანა უფალმა მოსეს.

³³და მიიტანეს მოსესთან სავანე და ყოველი მისი მოწყობილობა, მისი დუგმები, მისი კეტები, მისი ძელაკები, მისი სვეტები და მისი კვარცხლბეკები,

³⁴საბურველი ვერძთა დათრიმლული ტყავისა და საბურველი გამოყვანილი ტყავისა და ფარდა,

³⁵კიდობანი მოწმობისა და კეტები მისი, და სარქველი,

³⁶ტაბლა, მთელი მისი მოწყობილობა და საწინაშეო პურები,

³⁷ხალასი ოქროს სასანთლე, მისი კანდელები, ზედ გამწკრივებული კანდელები, და მთელი მისი მოწყობილობა და ზეთი სანათებლად,

³⁸ოქროს სამსხვერპლო და საცხები ზეთი, და კეთილსურნელება საკმევლისა და ფარდა კარვის შესასვლელისა,

³⁹ბრინჯაოს სამსხვერპლო და მისი ბრინჯაოს ცხაური, მისი კეტები და ყოველი მისი მოწყობილობა და საბანელი და მისი კვარცხლბეკი,

⁴⁰ეზოს ფარდები, მისი სვეტები და მისი კვარცხლბეკები, ეზოს კარიბჭის ფარდები, მისი საბელები და მისი პალოები და ყოველი მოწყობილობა სავანეში — საკრებულო კარავში მსახურებისათვის,

⁴¹საწესო სამოსელი წმიდაში მსახურებისათვის და წმიდა შესამოსელი აარონ მღვდლისათვის და მის ძეთათვის.

⁴²როგორც უფალმა უბრძანა მოსეს, ისე გააკეთეს ისრაელიანთ ყველაფერი.

⁴³და ნახა მოსემ ყოველი საქმე, და აჰა, გაუკეთებიათ იგი. როგორც უბრძანა უფალმა, ისე გააკეთეს. და აკურთხა ისინი მოსემ.