Read ქართული ბიბლია, სრული ვერსია Job 11 Bible Online

Job 11 - ქართული ბიბლია, სრული ვერსია bible

Job 11

¹მაშინ მიუგო ცოფარ ნაყამათელმა:

²„ნუთუ სიტყვათა სიმრავლე უპასუხოდ დარჩება? ნუთუ მრავალსიტყვაობა გამართლდება?

³ნუთუ შენი ფუჭსიტყვაობა დაადუმებს მამაკაცებს? ნუთუ დაცინვას მოჰყვები და არავინ იქნება შემარცხვენელი?

⁴შენ ამბობდი: ‘ხალასია ჩემი განსჯა და სუფთა ვარ შენს თვალში!’

⁵ნეტავ ღმერთი ალაპარაკდებოდეს და გახსნიდეს ბაგეებს შენს მიმართ,

⁶და გაგიცხადებდეს თავისი სიბრძნის საიდუმლოებებს! რადგან მრავალმხრივია სიბრძნე და, იცოდე, რომ ღმერთი შენთვის ივიწყებს ზოგიერთ შენს შეცოდებას.

⁷შეგიძლია ჩასწვდე ღმერთის სიღრმეს? მისწვდე ყოვლადძლიერის საზღვარს?

⁸იგი ზეცაზე მაღალია — რას იზამ? ქვესკნელზე ღრმაა — რას გაიგებ?

⁹ზომით იგი დედამიწის უგრძესია და ზღვაზე უვრცესია.

¹⁰თუ ჩაივლის, შებორკავს და წარუდგენს სამსჯავროს, წინ ვინ აღუდგება?

¹¹რადგან ის სცნობს ცბიერ ადამიანებს და როცა უსამართლობას ხედავს, განა ყურადღებას არ მიაპყრობს?

¹²ცარიელი თავის განსწავლა ისევე შეუძლებელია, როგორც კანჯრის ჩოჩრის მოთვინიერება.

¹³თუ შენ განაწყობ შენს გულს და მისკენ გაიწვდი ხელს,

¹⁴თუ შენს ხელში უსამართლობაა და განიშორებ მას, რომ შენს კარვებში არ დაივანოს უსამართლობამ,

¹⁵მაშინ აღმართავ შენს სახეს უმწიკვლოდ, განმტკიცდები და შიში არ გექნება,

¹⁶დაივიწყებ შენს ტანჯვას, და როგორც ჩავლილ წყალს, ისე გაიხსენებ.

¹⁷შენი სიცოცხლე შუადღეზე ნათელი გახდება, და ბნელი დილასავით განათდება.

¹⁸იმედიანად იქნები, რადგან არის სასოება. მიმოიხედავ და იმედით დაწვები.

¹⁹და დაივანებ, და არავინ იქნება შენი შემწუხებელი, და მრავალნი დაგიწყებენ პირფერობას.

²⁰ურჯულოთა თვალნი კი დაივსებიან, დაეკარგებათ თავშესაფარი, და მათი სასოება მხოლოდ სულის განტევება იქნება.“