Read ქართული ბიბლია, სრული ვერსია Job 12 Bible Online

Job 12 - ქართული ბიბლია, სრული ვერსია bible

Job 12

¹მაშინ მიუგო იობმა და თქვა:

²„ჭეშმარიტად, ხალხი მხოლოდ თქვენა ხართ, და სიბრძნე თქვენთან ერთად მოკვდება.

³მეც თქვენსავით მაქვს გონება, თქვენზე ნაკლები არც მე ვარ. ვინ არ იცის ეს ყოველივე?

⁴მოყვასის დასაცინი შევიქენი, მე, ღვთისმხმობელი და მისგან პასუხის მიმღები. დასაცინი შევიქენი, კაცი მართალი და უდანაშაულო.

⁵გალაღებული კაცისთვის სამარცხვინოა მარცხი, ფეხდასხლეტილის ხვედრი კი უბედურებაა.

⁶მყუდროება სუფევს მძარცველთა კარვებში, უშიშრად არიან ღვთის განმარისხებელნი, მათი ხელებია მათი ღმერთი.

⁷ჰკითხე პირუტყვს და ის გასწავლის, ცის ფრინველს და ის გეტყვის.

⁸გაესაუბრე მიწის მცენარეებს და ისინი გასწავლიან, და მოგახსენებენ ზღვის თევზები.

⁹ვინ არ იცის მათ შორის, რომ უფლის ხელმა შექმნა ეს ყველაფერი?

¹⁰მის ხელთაა ყველა სულდგმულის სული, და ყოველი ძეხორციელის სუნთქვა.

¹¹განა ყური არ განარჩევს სიტყვებს? განა სასა არ გრძნობს საჭმლის გემოს?

¹²განა სიბრძნე მოხუცებშია და გონება — დღეგრძელებში?

¹³ღმერთთანაა სიბრძნე და ძალა, მასთანაა რჩევა და გონება.

¹⁴აჰა, დაანგრევს და ვერავინ ააშენებს, დაამწყვდევს და ვერავინ გამოიხსნის.

¹⁵აჰა, შეაკავებს წყლებს და დაშრებიან, გამოუშვებს მათ და გადათელავენ მიწას.

¹⁶მასთანაა ძალა და ნამდვილი სიბრძნე, მისია მოტყუებული და მომტყუებელი.

¹⁷ტყვედ მიჰყავს მრჩეველნი და მსაჯულებს აბრიყვებს.

¹⁸ბორკილებს ხსნის მეფეებს და წელზე სარტყელს არტყამს.

¹⁹ფეხშიშველი მიჰყავს მღვდლები, და ამხობს ძლიერებს.

²⁰ართმევს მეტყველებას თავდაჯერებულთ და გამჭრიახობას — უხუცესებს.

²¹დამცირებას ანთხევს დიდებულებზე და ძლიერთა სარტყელს ასუსტებს.

²²აცხადებს სიბნელის იდუმალებებს და სიკვდილის აჩრდილი სინათლეზე გამოჰყავს.

²³განადიდებს ერებს და ანადგურებს, განავრცობს ერებს და მიუძღვის მათ.

²⁴გონებას ურევს ქვეყნის თავკაცებს და უგზო-უკვლოდ ახეტიალებს უდაბნოში.

²⁵ხელის ცეცებით დადიან ბნელში უსინათლოდ და მთვრალებივით დაბორიალობენ!