Read ქართული ბიბლია, სრული ვერსია Job 13 Bible Online

Job 13 - ქართული ბიბლია, სრული ვერსია bible

Job 13

¹აჰა, ეს ყოველივე ჩემმა თვალმა იხილა, ჩემმა ყურმა ისმინა და შეიგნო.

²რაც თქვენ იცით, მეც ვიცი, არც მე ვარ თქვენზე ნაკლები.

³მაგრამ მე დაველაპარაკებოდი ყოვლადძლიერს, და ჩემს საბუთებს მოვახსენებდი ღმერთს.

⁴თქვენ კი სიცრუის მთხზველები ხართ, უვარგისი მკურნალები ხართ!

⁵ნეტავ დუმილით მაინც დადუმდებოდეთ! ეს იქნებოდა თქვენი სიბრძნე.

⁶გთხოვთ, ისმინეთ ჩემი საბუთები და ისმინეთ ჩემი ბაგეების საჩივარი!

⁷ღმერთის გულისათვის იტყვით ტყუილს? მისი გულისთვის იტყვით სიცრუეს?

⁸მიკერძოებას გამოიჩენთ მის მიმართ? ღმერთს გამოესარჩლებით?

⁹კარგი იქნება, რომ გამოგააშკარავოთ მან? კაცი კაცს რომ ატყუებს, ისე მოატყუებთ მას?

¹⁰ნამდვილად გაგკიცხავთ ის თქვენ, მიკერძოებას თუ გამოიჩენთ მალულად.

¹¹ნუთუ არ შეგეშინდებათ მისი სიდიადისა და მისი შიში თავს არ დაგატყდებათ?

¹²თქვენი შეგონებანი ნაცრის არაკებია, თქვენი სიმაგრეები თიხის სიმაგრეებია.

¹³დადუმდით ჩემს წინაშე და მალაპარაკეთ, და მერე, რაც მომივა, მომივიდეს.

¹⁴კბილით ვზიდავ ჩემს ხორცს და ხელში დავიჭერ ჩემს სიცოცხლეს.

¹⁵რომ მომკლას კიდეც, მაინც მისი იმედი მექნება, მაინც დავიცავ ჩემს გზებს მის წინაშე.

¹⁶ესეც ჩემი ხსნა იქნება, რადგან უღვთო კაცი ვერ მივა მის წინაშე.

¹⁷სმენით ისმინეთ ჩემი სიტყვა, ყური უგდეთ ჩემს ნათქვამს!

¹⁸აჰა, სამსჯავროსთვის გამიმზადებია ჩემი სარჩელი! ვიცი, რომ გავმართლდები.

¹⁹ვინ არის ჩემი მოდავე? რადგან მაშინ დავდუმდებოდი და მოვკვდებოდი!

²⁰ოღონდ ორ რამეს ნუ მიზამ, და შენს სახეს არ დავემალები:

²¹შენი ხელი ამარიდე და შენი შიშის ზარი ნუ შემაძრწუნებს.

²²მაშინ მიხმე და პასუხს გაგცემ, ან მე ვილაპარაკებ და შენ მიპასუხე!

²³რამდენი ბრალი და ცოდვა მაწევს? მაცოდინე ჩემი დანაშაული და ჩემი ცოდვა!

²⁴რად მალავ სახეს? შენს მტრად რადა მთვლი?

²⁵მოფარფატე ფოთოლს აფრთხობ და ხმელ ჩალას სდევნი?

²⁶რადგან მწარე ამბებს წერ ჩემს წინააღმდეგ და მიმკვიდრებ სიჭაბუკის ცოდვებს,

²⁷ხუნდებში მაყოფინებ ფეხებს, უდარაჯებ ყველა ჩემს გზას, და ჩემს ნაკვალევს იკვლევ.

²⁸კაცი კი იხრწნება, როგორც დამპალი რამ, როგორც ჩრჩილისგან დაჭმული სამოსელი.