Read ქართული ბიბლია, სრული ვერსია Job 14 Bible Online

Job 14 - ქართული ბიბლია, სრული ვერსია bible

Job 14

¹ადამიანი, ქალის ნაშობი, დღემოკლეა და სავსეა ურვით.

²ყვავილივით იფურჩქნება და ჭკნება, ჩრდილივით გადაივლის და კვალს არ ტოვებს.

³და მაინც თვალს აპყრობ მას, და სამსაჯავროში მიგყავარ შენთან?

⁴ვინ შექმნის წმიდას უწმიდურისგან? ვერავინ!

⁵თუ მისი დღეები განსაზღვრულია, თუ მისი თვეების რიცხვი შენს ხელთაა, თუ საზღვარი დაუდე მას და ვერ გადავა,

⁶დაეხსენი, მოისვენოს, ვიდრე დღიურ მუშასავით დაამთავრებდეს თავის დღეს.

⁷რადგან ხესაც აქვს იმედი, რომ თუ მოჭრიან, კვლავ განახლდება, აყვავდება და ყლორტები არ მოაკლდება.

⁸თუ ფესვი მიწაში დაუბერდა და ღერო მტვერში ჩაუკვდა,

⁹წყლის სუნზე კვლავ გაყვავილდება და ნერგივით ყლორტებს გამოიყრის.

¹⁰კაცი კი კვდება და უძლურდება, სულს განუტევებს ადამიანი და სადღა არის?

¹¹როგორც წყალი გაედინება ტბიდან, და მდინარე იწრიტება და შრება,

¹²ასევე ადამიანებიც წვებიან და ვეღარ დგებიან. ვერ გაიღვიძებენ, ვიდრე არ გაქრება ცანი, ძილისაგან ვერ გამოფხიზლდებიან.

¹³ნეტავ შავეთში დაგემალე, დაგეფარე, ვიდრე დაცხრებოდა შენი რისხვა, დრო დაგენიშნა ჩემთვის და შემდეგ გაგხსენებოდი.

¹⁴თუ მოკვდა ადიმიანი, განა გაცოცხლდება? მთელი ჩემი მსახურების დღეებში დავიცდიდი, ვიდრე არ დადგებოდა ჩემი ხსნა.

¹⁵დამიძახებდი და გიპასუხებდი, მოგენატრებოდა შენს ხელთა ქმნილება,

¹⁶რადგან ჩემს ნაბიჯებს დაითვლიდი, მაგრამ ჩემს ცოდვებს არ უთვალთვალებდი.

¹⁷ჩაიბეჭდებოდა გრაგნილში ჩემი დანაშაული, და ჩემს ბრალს შენ წარხოცავდი.

¹⁸მაგრამ როგორც ჩამოქცეული მთა იშლება და კლდე ცურდება თავისი ადგილიდან,

¹⁹როგორც ქვებს ცვეთს წყალი, როგორც მისი ნიაღვრები წალეკავენ მიწას, ასევე წარხოცავ შენ კაცთა იმედს.

²⁰სძლევ მათ სამუდამოდ და მიდიან, სახეს შეუცვლი და უშვებ.

²¹პატივში იქნებიან მათი შვილები, მათ კი არ ეცოდინებათ; დამცირდებიან ისინი, ისინი კი ვერ მიხვდებიან.

²²მათ მხოლოდ საკუთარი ხორცი სტკივათ, და საკუთარ თავს გლოვობენ ისინი!“