Read ქართული ბიბლია, სრული ვერსია Job 19 Bible Online

Job 19 - ქართული ბიბლია, სრული ვერსია bible

Job 19

¹მაშინ მიუგო იობმა და თქვა:

²„როდემდე უნდა მიწუხებდეთ სულს და მთრგუნავდეთ სიტყვებით?

³უკვე ათჯერ შეურაცხმყავით, და არ გრცხვენიათ, რომ მძრახავთ.

⁴თუ მე მართლა შევცდი, ჩემი შეცდომა ჩემთანვე რჩება.

⁵თუ თქვენ მართლა ჩემზე დიდად მოგაქვთ თავი და ჩემს შერცხვენას ჩემს წინააღმდეგ საბუთად აქცევთ,

⁶იცოდეთ, რომ ღმერთმა ჩამაგდო განსაცდელში და გამხვია თავის ბადეში.

⁷აჰა, ვღაღადებ: ‘ძალადობაა!’ მაგრამ პასუხს არავინ მაძლევს, შველას ვითხოვ, მაგრამ არ არის სამართალი.

⁸მან გადამიღობა გზა და ვეღარ გადავსულვარ, მან მოჰფინა ჩემს ბილიკებს ბნელი.

⁹შემომაძარცვა ჩემი დიდება, და თავიდან გვირგვინი მომხადა.

¹⁰ყოველმხრივ დამაქცია და უკვე მივდივარ, ხესავით ამომიძირკვა სასოება.

¹¹აღაგზნო ჩემზე თავისი რისხვა. და თავის მტრად შემრაცხა.

¹²ერთად მომადგნენ მისი ურდოები, ალყა შემომარტყეს და ჩემი კარვის ირგვლივ დაიბანაკეს.

¹³ჩემი ძმები ჩამომაშორა, და ჩემი ნაცნობები გამიუცხოვდნენ.

¹⁴მახლობლები განმიდგნენ და ნაცნობებმა დამივიწყეს.

¹⁵ჩემ სახლში მოსული სტუმრები და ჩემი სახლის მხევლები ხიზნად მთვლიან, მათ თვალში უცხო გავხდი.

¹⁶ჩემს მსახურს ვეძახი და არ მპასუხობს; ვევედრები მას ჩემი პირით.

¹⁷ჩემი სუნთქვა შესძაგდა ჩემს ცოლს, და ჩემი სიმყრალე — დედაჩემის ძეთ.

¹⁸ბავშვებმაც შემიზიზღეს მე, წამოვდგები და აბუჩად მიგდებენ.

¹⁹მომიძულეს ჩემმა სანდო მეგობრებმა და ვინც მიყვარდა, ზურგი მაქცია.

²⁰ჩემი ტყავი და ხორცი ძვალს მიეკრა, ცარიელი ღრძილებიღა დავრჩი.

²¹შემიწყალეთ, მეგობრებო, რადგან ღვთის ხელი შემეხო მე!

²²რატომ მდევნით თქვენც, როგორც ღმერთი? და რატომ არ ძღებით ჩემი ხორცით?

²³ნეტავ ჩაიწერებოდეს ჩემი სიტყვები, ნეტავ წიგნში ჩაიბეჭდებოდეს,

²⁴რკინისა და ტყვიის საჭრეთლით კლდეზე ამოიკვეთებოდეს სამარადისოდ!

²⁵რადგან მე ვიცი, რომ ცოცხალია ჩემი მხსნელი და საბოლოოდ მიწაზე წამოიმართება.

²⁶მას შემდეგ, რაც ასე შემომეძარცვება კანი ჩემი ხორციდან, ვიხილავ ღმერთს,

²⁷მე თავად ვიხილავ მას ჩემს გვერდით და ჩემი თვალები დაინახავენ მას და არა სხვისი. დამელია გული ჩემს წიაღში.

²⁸თუ იტყვით: ‘აი, როგორ ვდევნით მას!’ და: ‘საქმის ფესვი ნაპოვნია მასში!’

²⁹გეშინოდეთ მახვილისა, რადგან რისხვას მოაქვს მახვილით სასჯელი, რათა იცოდეთ, რომ არის განკითხვა!“