Read ქართული ბიბლია, სრული ვერსია Job 2 Bible Online

Job 2 - ქართული ბიბლია, სრული ვერსია bible

Job 2

¹ერთ დღესაც მივიდნენ ღვთის შვილები უფლის წინაშე წარსადგომად, და ეშმაკიც მივიდა მათ შორის.

²ჰკითხა უფალმა ეშმაკს: „საიდან მოდიხარ?“ მიუგო ეშმაკმა უფალს: „ქვეყნაზე აღმა-დაღმა ხეტიალიდან.“

³და კვლავ ჰკითხა უფალმა ეშმაკს: „თუ შეგინიშნავს ჩემი მსახური იობი? არავინ არის მისი მსგავსი ამ ქვეყანაზე: უმწიკვლო და მართალი, ღვთისმოშიში და უკეთურებას განრიდებული. იგი კვლავ ინარჩუნებს უმწიკვლოებას, შენ კი მაქეზებდი მის წინააღმდეგ, რომ უმიზეზოდ დამეღუპა იგი.“

⁴ეშმაკმა კი მიუგო უფალს: „ტყავი ტყავის წილ, მაგრამ სიცოცხლისათვის ყველაფერს გაიღებს კაცი.

⁵აბა, გაიწოდე ხელი, და შეახე მის ძვალსა და რბილს, თუ პირში გმობას არ დაგიწყებს.“

⁶და უთხრა უფალმა ეშმაკს: „აჰა, შენს ხელთ იყოს იგი, ოღონდ მის სიცოცხლეს გაუფრთხილდი.“

⁷და განშორდა ეშმაკი უფალს და შეჰყარა იობს საშინელი წყლულები ფეხის ტერფიდან თხემამდე.

⁸აიღო იობმა კეცის ნატეხი წყლულების მოსაფხეკად და ნაცარში ჩაჯდა.

⁹მაშინ უთხრა მას ცოლმა: „შენ კიდევ მტკიცედ დგახარ შენს უმწიკვლოებაში? დაგმე ღმერთი და მოკვდი!“

¹⁰მან კი მიუგო: „უგუნური დედაკაცივით ლაპარაკობ. თუ სიკეთეს ვიღებთ ღმერთისგან, განსაცდელი აღარ უნდა მივიღოთ?“ არც ყოველივე ამაში შეუცოდავს იობს თავისი ბაგეებით.

¹¹როდესაც იობის სამმა მეგობარმა შეიტყო ყველა ის უბედურება, რაც იობს დაატყდა თავს, გამოვიდნენ თავიანთი ადგილებიდან: ელიფაზ თემანელი, ბილდად შუხელი და ცოფარ ნაყამათელი, შეიკრიბნენ ერთად, რათა მასთან მისულიყვნენ თანაგრძნობის გამოსახატავად და სანუგეშებლად.

¹²და შორიდან რომ დაინახეს, ვერ იცნეს იგი, ხმამაღალი ტირილი მორთეს. შემოიხიეს სამოსი, და თავს ზევით მტვერი გადაიყარეს.

¹³ისხდნენ მასთან ერთად მიწაზე შვიდ დღეს და შვიდ ღამეს. არავის არაფერი უთქვამს მისთვის, რადგან ხედავდნენ, რომ მეტისმეტად დიდი იყო მისი სატანჯველი.