Read ქართული ბიბლია, სრული ვერსია Job 22 Bible Online

Job 22 - ქართული ბიბლია, სრული ვერსია bible

Job 22

¹მიუგო ელიფაზ თემანელმა და თქვა:

²„რას არგებს ღმერთს კაცი? განა ბრძენიც კი თავის თავს არა რგებს?

³რა აზრი აქვს ყოვლადძლიერისთვის, შენ თუ მართალი ხარ? და რას მოუტანს მას, თუ წრფელია შენი გზები?

⁴განა შენი ღვთისმოშიშების გამო გყვედრის შენ და შედის შენთან სამსჯავროში?

⁵განა დიდი არაა შენი ბოროტება? განა აქვს ბოლო შენს შეცოდებებს?

⁶რადგან არაფრის გულისთვის ართმევდი გირაოს შენს ძმებს, და შიშველ-ტიტვლებს ხდიდი ტანსაცმელს.

⁷წყურვილით დატანჯულს წყალს უკავებდი და მშიერს პურს არ აწვდიდი.

⁸განა ძლიერი კაცისაა ეს ქვეყანა, და წარჩინებული უნდა მკვიდრობდეს მასზე?

⁹ქვრივებს ხელცარიელს ისტუმრებდი და ობლებს მკლავებს უმსხვრევდი.

¹⁰ამიტომ გახვევიან გარს მახეები და გაკრთობს ანაზდეული შიში.

¹¹იქნებ ბნელა და ვეღარ ხედავ, და წყლის ნიაღვარმა დაგფარა?

¹²განა ღმერთი ცათა მწვერვალზე არ არის? ახედე ვარსკვლავებს, რა მაღალნი არიან!

¹³და შენ ამბობ: ‘რა იცის ღმერთმა? ბნელ ღრუბელთაგან განიკითხავს?

¹⁴ღრუბელნი საფარველად აქვს და ვერ იხედება, ცის კაბადონზე დადის.’

¹⁵ნუთუ იმ ძველ გზას ადგახარ, ავკაცნი რომ დადიოდნენ,

¹⁶რომელნიც უდროოდ იქნენ წარტაცებულნი, რომელთა საძირკველიც მდინარემ გადარეცხა?

¹⁷ისინი ეუბნებოდნენ ღმერთს: ‘გაგვეცალე!’ და: ‘ყოვლადძლიერი რას გვარგებს?’

¹⁸მან კი სიკეთით აუვსო მათ სახლები. მაგრამ ურჯულოთა რჩევა შორსაა ჩემგან!

¹⁹უყურებენ მართალნი და ხარობენ და უმწიკვლონი დასცინიან მათ.

²⁰ამბობენ: ‘აჰა, გამწყდარა ჩვენი მტერი და მათი ნარჩენი ცეცხლმა შთანთქა.’

²¹დაუახლოვდი მას — და იყავი მშვიდობით; ასე მოვა სიკეთე შენთან.

²²მიიღე მისი პირიდან რჯული და მისი სიტყვები გულში ჩაიმარხე.

²³თუ დაუბრუნდები ყოვლადძლიერს, კვლავ აშენდები, განაშორე უსამართლობა შენს კარავს.

²⁴თუ შენს ოქროს მტვერში ჩაყრი, და ოფირის ოქროს — ხევების ლოდებში.

²⁵და თუ ყოვლადძლიერი იქნება შენი ოქრო, და ძვირფასი ვერცხლი იქნება შენთვის,

²⁶მაშინ დატკბები ყოვლადძლიერში და ღმერთს მიაპყრობ სახეს.

²⁷ილოცებ მის მიმართ და მოგისმენს, და აღასრულებ შენს აღთქმებს.

²⁸რასაც გადაწყვეტ, აგისრულდება, და შენს გზაზე ნათელი იბრწყინებს.

²⁹როცა დაგამდაბლებენ, იტყვი: ‘ამაღლება’ და ის იხსნის თვალდახრილს.

³⁰ის გადაარჩენს დამნაშავესაც; და გადარჩება ის შენს ხელთა სიწმიდით.“